Xuanxo Mariño: “Lo que nos fixo más dañu foi’l robu de la llicencia”

Esti sábadu, trés bandes asturianes xúnense n’Uviéu nun conciertu pa recaudar perres pa Radio Sele, única dafechu n’asturianu. El so direutor, Xuanxo Mariño Fernández (Uviéu, 1957), faló con Asturies.com de la situación de la emisora.

Radio Sele fixo hai pocu tiempu un llamáu a los sos oyente y simpatizantes pa poder cubrir los gastos d’emisión. ¿Qué tal ta siendo la respuesta?

Bona. Radio Sele foi una emisora que siempre tuvo bona acoyida ente la xente y dalgo como esto nunca lo fixéramos de manera pública. Según como tán les coses, va tener que ser asina: nós vamos tener que paganos los proyeutos qu’entamemos, como yá pasa n’otros países con esti tipu de radios.

¿Cuántes perres son necesaries p’acabar l’añu?

6.000 euros estimamos que seya’l coste total de gastos; y non entren equi averíes, imprevistos qu’apaezan y demás.

L’afición del Uviéu, los músicos asturianos, particulares… ¿Sorprende-y dalgún xestu de los munchos que surden pa sofitar a Radio Sele?

Sorpréndenos toos. El conciertu, por exemplu, foi iniciativa de Miguel Fernandi (Skama la Rede) y va tener llugar el sábadu 26 de xineru en La Antigua Estación (Uviéu), a les ocho la tarde, con un bonu d’ayuda de 6 euros. Nél participen Skama la Rede, La Tarrancha y La Coruxa. Amás, otros amigos pensaron en sacar camisetes. En cuantes falamos de la situación, la xente principió a buscar alternatives.  

¿Qué ye lo que lleva a la emisora a dar el pasu de pidir ayuda económica?

Foi la salida, va 5 años, d’un local del Ayuntamientu y la baxada de los ingresos pola crisis que toca a tolos sectores

Radio Sele ta cerca de cumplir 27 años n’antena. ¿Ye ésti’l momentu más complicáu de la so esistencia?

Sí. La falta d’ingresos ye una de les mayores torgues poles que pasamos, pero en tou esti tiempu tuvimos problemes serios que vamos resolviendo. Esta radio entamó les emisiones nel 1986, asina que lo que queda n’alcordanza son les coses bones, qu’hai munches.  

¿Qué fixo más dañu a la so emisora, la negación final de la llicencia por parte del Gobiernu d’Álvarez Areces o’l nun poder emitir pela FM tres l’amenaza de Telecomunicaciones?

Les dos fixeron munchu dañu, pero más el robu de la llicencia. Nós siguimos en conversaciones col Gobiernu y, aparte de la sentencia favorable que tenemos, ellos saben que tenemos razón, pero nun quieren dar una llicencia a una radio n’asturianu; meyor pa los amigos, anque la pongan al serviciu de la derecha mediática. Cometióse un atropellu gravísimu a Radio Sele y a la nuesa llingua con esta decisión interesada. 

Como dicía, siguimos coles conversaciones y ellos sigen dando llargues al asuntu, ente otres coses, diciendo que tienen munches presiones. Ye dalgo surrealista del too. Tenemos unos políticos n’Asturies que nun pasen l’esame; nun lleguen nin a mediocres y asina nos va a toos, pero seguimos nello.

Caltiénense como la única radio qu’emite dafechu n’asturianu. ¿Por qué nun hai más ‘Radio Seles’ na xeografía asturiana?

Porque la xente tien yá otros medios d’espresion al travies d’Internet y los costes d’una radio son demasiao altos y conlleva munches hores de dedicación, amás de la llucha costante contra los poderes públicos.

¿Tien sentíu una RPA en castellanu y conteníos residuales n’asturianu?

Non. La RPA debería ser n’asturianu, al igual que la televisión. Muncho s’avanzara si fora asina, pero la RPA ta mal xestionada y fai falta un compromiso políticu.

¿Qué significaría pal idioma tener un güecu nel dial?

De dase esa situación, agora tariamos falando d’otres coses. De aspuestos como ési depende la normalización social de la nuesa llingua, pero, como dicía, colos políticos que tenemos ye imposible

Otra manera, sigue ensin solucionase’l problema de les radios comunitaries. ¿Hai falta de voluntá por parte de les alministraciones?

Pasa lo mesmo que col idioma; nun hai voluntá dalguna y los políticos siguen el camin marcáu poles corporaciones mediátiques que nun quieren que  se faiga una llexislación coherente col tiempo nel que vivimos. Too queda en bones intenciones; ta estancao.  

¿Continúa l’acosu de la delegación asturiana de Telecomunicaciones a les radios llibres asturianes?

Non, de momentu non.

¿Cuándo vamos poder sentir Radio Sele otra vuelta pela FM?

Nun lo sé, pero esperamos que seya pronto.

¿Cómo pueden collaborar les persones interesaes en sofitar a la emisora?

Pueden facer aporte económicu nel númberu de cuenta que tenemos en www.radiosele.net o facese sociu de la radio, con una cuota trimestral –la que puedan–, o faciendo un programa. El nuesu corréu electrónicu ye radiosele@yahoo.es.