Spanta la Xente: “Nestos tiempos que cuerren, los grupos tamos obligaos a canalizar al traviés de la música’l sentimientu del pueblu”

|

Mil copies vendíes nuna selmana son númberos importantes, más nun mercáu tan pequeñu como l’asturianu. Spanta la Xente consiguiólo col so trabayu d’estudiu últimu, ‘Revolucionando’, que la banda va presentar en La Pola Ḷḷena’l día 25 con un conciertu abiertu nel que tamién ta prevista l’actuación de Chus Pedro y Gabino Antuña.

L’acoyida de ‘Revolucionando’ ta siendo perbona. ¿Esperábenlo?

Teníemos una esperanza grande y mui bones sensaciones cola acoyida del discu, yá que la xente nun dexaba d’entruganos por él: cuándo podríen sentilu, ónde podríen mercalu, cuándo saldría a la venta… Pero al final la realidá superó toles nueses espectatives, yá que namái nuna selmana vendiéronse más de 1.000 copies.

¿Qué van atopar los vuesos siguidores nél?

A Spanta la Xente n’estáu puru, pero con un toque más rockeru. Non dexamos de llau la nuesa esencia yá que, como nos anteriores discos, tenemos chisgos al folk o al ska, inclusive una balada, pero en términos xenerales el discu gana más pesu y fuercia con una llinia más rock y un mayor protagonismu de les guitarres llétriques.  

Lo primero que llama l’atención ye la portada y el diseñor interior.

Anguaño too ta politizáu. Tamos cansaos de los grandes partidos políticos ‘dinosauriu’ (PP, PSOE y IX); d’una derecha intransixente, escura y involutiva y una izquierda acomodada y inoperante. Los partíos nuevos que lleguen nun nos acaben de tresmitir confianza, yá que paecen utres al acechu de los restos que dexen los enantes mencionaos, y nun acabamos de creenos si’l so mensaxe ye verdaderu o en realidá ye propaganda barata col oxetivu únicu de sentase nel tronu cómodu de los sos enemigos políticos. Y xunto a la política tenemos a la so gran amiga la banca, que colos sos xuegos macabros tán llevando a esti país a tar como ta, na llende, y al final acabamos pagando les sos cagaes siempre los mesmos: los d’abaxo.

Nel diseñu del discu queríemos representar la xunión del pueblu con una revolución y una llucha vertical contra esos dos grandes monstruos, banca y política, representaos pol CaxAstur d’Uviéu y la sede del Parllamentu asturianu, tomaos por una población cansada de siguir tragando y pagando toles sos aiciones. Y ye equí onde entra en xuegu José Ramón García Franco ‘Chechu’, de Digital Art, que plasmó la idea a la perfeición con un grandísimu trabayu. La verdá ye que’l diseñu nun dexa indiferente a naide y llama muncho l’atención. Toles crítiques foron mui positives. Pa nós el trabayu de Chechu foi una obra d’arte.

¿Trátase d’un trabayu más reivindicativu que los anteriores?

Spanta la Xente siempre se carauterizó por facer lo que-y apeteció y por cantar lo que quixo, pudiendo acertar o equivocase, pero siempre sintiendo lo que facía y dicía a cada momentu. Pue tocar dende rock a folk; dende un ska a una balada; y cantar dende a la mina o les barricaes hasta a la llibertá o l’amor. Siempre inspiraos y influenciaos pol entornu que-y rodea, esto ye, la so tierra, la so xente, la so historia… ‘Revolucionando’ ta escritu nun entornu y un tiempu sociopolíticu mui turbiu, polémicu y enllenu de desigualdaes, d’inxusticies, de traiciones, de corruptos…

Agora esi entornu ye axeitera pura pa reivindicase, porque tán dexándonoslo a güevu. La clase obrera y los estamentos más baxos d’esta sociedá tán llevando todos los palos, mientres que los d’arriba siguen como si nada y inclusive oprimiéndonos más y más. Tenemos que ser más reivindicativos, y non sólo nosotros, sinón toos. La nuesa arma ye la música y el nuesu campu de batalla, l’escenariu. Nun ye muncho pa la llucha, pero si más que’l que mira pa otru llau o se queda en casa nel sofá sentáu ensin facer nada. Nestos tiempos que cuerren, los grupos musicales tamos obligaos a canalizar al traviés de la música’l sentimientu del pueblu, que munches vegaes quier dicir lo que siente y nun puede o nun sabe cómo facelo. Debemos ser el so canalizador y amás continuar removiendo la conciencia de los dormíos. 

El discu inclúi’l tema ‘Díes de barricá’. ¿Por qué decidieron grabalu otra vuelta?

Ye un tema del nuesu primer discu, ‘Fíos d’esta tierra’, que poco a poco, y ensin nosotros querelo, convirtióse nel nuesu cenciellu; tamién na banda sonora de les revueltes mineres y, quiciabes, nel tema más escucháu y conocíu de Spanta la Xente. Quiximos facer una versión nueva grabada con más potencia, fuercia y pegada; la fuercia que se merez un tema como ‘Dies de barricá’, con muncha más presencia de les guitarres llétriques y sustituyendo l’acordión que grabamos nel primer discu pol violín de Natalia, componente actual de Spanta la Xente.

Tamién una collaboración de Chus Pedro.

Chus Pedro ye’l nuesu padre musical; gran persona, gran cantante y, sobre manera, gran collaciu. Apostó y creyó en nós dende l’entamu y siempre tuvo al nuesu llau. Ye’l novenu componente de Spanta la Xente y un pegoyu fundamental d’esti grupu, yá qu’ensin él enxamás consiguiéramos la evolución y la repercusión que tenemos anguaños.

Tamién foi productor de los nuesos dos primeros discos, ‘Fíos d’esta tierra’ y ‘Alienda’, al traviés del so sellu discográficu La Mula Torda. Col primer disco protexónos y enseñónos, y col segundu llevantónos y sostúvonos. Agora, nel terceru, yá nos dexa caleyar solos pa qu’aprendamos a movenos nesti mundu por cuenta propia, como un padre col so fíu.

Tenemos que destacar que ‘Revolucionando’ ye un discu autoproducíu y que, dende’l principio, teníemos nidio que, anque nun tuviera detrás moviendo los filos como nos dos trabayos anteriores, Chus Pedro tenía que tar presente nél. Asina, él collabora nel tema ‘El nome la Llibertá’, lo que pa nós ye un arguyu, un placer y un auténticu privilexu. Esperamos que continúe formando parte d’esta gran familia que ye Spanta la Xente, de la que, vuelvo a repetir, él ye pieza fundamental.  Querría tamién destacar que tamién collaboren con nós nesti discu otros habituales: los gaiteros de Güestia na versión nueva de ‘Díes de Barricá’.

‘Revolucionando’ ye’l tercer discu de la banda. ¿Cómo evolucionó’l grupu dende ‘Fíos d’esta tierra’ (2009)?

Cuando escoyimos el nome del discu quiximos da-y un sentíu doble; xugar colos dos conceptos: evolución y revolución. Por eso na portada del discu apaez la pancarta cola ‘R’ de revolucionando en colloráu y como cortada, pa da-y esi sentíu doble. Nun s’entiende la evolución ensin la revolución, y nel nuesu caso, la evolución se pue ver al sentir los discos. Cuando empecemos yéremos mui mozos y, poco a poco, maduremos, tanto a nivel musical como a nivel de composición y esixencia. Munchu trabayu, munches horas d’ensayu y tomar tolos conciertos con muncha seriedá y respetu inflúi nel resultáu final: vas ganando calidá; vas evolucionando… Y por supuesto ta’l fechu de que tanto na vida como na música hai que siguir aprendiendo cada día y probando esperiencies nueves, fixando metes nueves y ensin dexar nunca de disfrutar y divertite colo que faes.

Nesti tiempu consiguieron algamar un nome dientro de la escena musical n’Asturies.

Yá hai 8 años que comencemos esti proyeutu y tuviemos el placer de tocar n’escenarios per toda Asturies. Siempre nos trataron fenomenal allá onde vamos y a anguaño tovía se nos fai raro tocar lloñe de casa y que la xente nos conoza, siga, escuche y cante les nueses canciones. Cuando empezamos nunca nos punximos más meta que tocar pa los nuesos familiares y amigos nel Festival Astur-romanu de Carabanzo y güei, gracies a Spanta la Xente, la nuesa familia y los nuesos amigos medraron de manera considerable. Nun sabemos cómo agradecer a toda esa xente que nos sigue y nos demuestra’l so ciñu en cada concierto; quiciabes la única manera sía tocando y faciendo-yos disfrutar, y eso nun tien preciu.

¿Cómo foron los anicios de la banda?

Entamamos en plan de chancia, ensayando nuna pequeña cochera mui fría y húmeda. La idea surdió nuna cena, un poco cargaos yá: “yo toco la guitarra, tu toques la gaita… Tenemos que montar un grupu”. Lo que naide s’esperaba esa nueche ye qu’a la mañana siguiente, y de resaca, la idea siguiera viva. Poco a poco sumáronse más músicos al proyeutu y asina comenzó la cosa; una tontería qu’acabó siendo dalgo mui serio.

Nun podemos dicir que los anicios foran duros, yá que tábemos mui motivaos, El primer conciertu foi nel Festival Astur-romanu de Carabanzo; llueu otro en Zurea; llegaron les Feries en La Pola Ḷḷena con mui bona acoyida por parte de la xente… Empezamos a rodar y a rodar, grabémos una maqueta en Musical Miller en Mieres, de la que nuna selmana vendiemos 500 copies, llegando una a manos de Chus Pedro. Ési foi’l puntu d’inflexón. Equí yá naz el nuestru primer discu, ‘Fíos d’esta tierra’.

¿Cuála ye la formación actual?

Natalia González Prieto (violín), Julio Fernández Coro (teclaos), Alberto Cano (guitarra acústica), Gerardo Fernández Hevia (voz), Juan García Villamil (batería), Héctor Torre (baxu), Rubén Fernández del Corro (guitarra llétrica) y Saúl Quiñones Tuñón (gaita y xiblates) conformen anguaño Spanta la Xente.

¿Cómo ye’l procesu compositivu?

Caún compón dalguna canción en casa y llueu la lleva al llocal, onde se perfeicionen y onde toos aporten col so instrumentu dalgo más a esa canción, moldeándola pa que quede redonda y con un soníu ‘made in Spanta’.

Pa dalgunos avérense más al rock; pa otros, al folk. ¿Cómo se definiríen?

El nuesu estilo nació d’una manera un poco esbarriada, ensin nenguna llinia predefinida que siguir. Somos un grupu con muchos componentes, instrumentos y músicos de procedencies y gustos musicales distintos… Enmarcáronnos nel folk-rock pol pequeñu fechu de tener gaita, violín y xiblates xunto a una guitarra llétrica y una batería. Col pasu del tiempu  y cola esperiencia adquirida, vas dándote cuenta de que se trata más d’un grupo rock-folk, yá qu’en verdá la base del grupu son les guitarres, la batería, el baxu y los teclaos xunto a la voz, mientres que’l violín, la gaita y les xiblates son acompañantes melódicos a esa base que conforma’l soníu del grupu. Lo cierto ye que nunca nos prestó falar d’estilos, yá que siempre nos gustó la variedá y non cayer na monotonía de sonar siempre igual, tema a tema. Somos quien a tocar tolos estilos cola fin de nun aburrir al públicu y nun aburrinos nós mesmos, yá que cola variedá grande d’instrumentación que poseyemos tenemos un abanicu de posibilidaes estensísimu, dende canciones más potentes y rockeres a otres seles estilu balaes, o temes con chisgos al ska, al folk o a la música tradicional.

Una de les señes del grupu ye l’emplegu de la llingua asturiana. ¿Supón esto una torga pa dase a conocer fuera d’Asturies?

Nun podemos dicir que para nós sía una torga. Tocamos muncho fuera d’Asturies y acoyéronnos colos brazos abiertos; mándennos mensaxes de sofitu dende llugares de tol mundu; tenemos descargues n’Alemaña, Austria y Escocia, por citar dalgunos sitios; n’España unviamos discos a casi toles comunidades… Al final lo qu’importa ye’l mensaxe, que-y llegue a la xente y que disfrute cola to música, sía n’asturianu, castellanu, inglés o chinu.

Tamién hai que dicir que somos una música minoritaria, que tien como mercáu les cuenques mineres y Asturies, y la verdá, ye onde nos sentimos como pexe nel agua; na nuesa casa y dando la cara por ella.

En mayu celebrénse eleiciones a la Xunta Xeneral y los conceyos. ¿Va ser tiempu de cambiu?

Debería ser tiempu de cambiu, pero hacia ónde y por qué nun se lo podríemos dicir. Tamos tan asquiaos pola política que yá nun sabemos a quién creyer, quién te diz la verdad, quién ye namái propaganda en busca d’un sillón o quién ye limpiu y quién lladrón… Lo único que nos prestaría ye que los políticos tornen a facer polítiques pal pueblu y non contra él; que nun haya mayoríes absolutes y que la política se rexenarara poco a poco. Y creo que tamién nós tenemos que cambiar la nuesa forma de voto. La xente vota por herencia, a la derecha o a la izquierda, faigan lo que faigan; o si la armen mui gorda la solución ye nun votar. Tenemos que daprender a castigar o a premiar a lo hora d’exercer el nuesu votu. Si dalguien gobierna bien habrá que premialu, y si lo fai mal, habrá que votar una alternativa; y nel casu de que nos saliera torcío, habrá que volver a valorar. Pero lo dicho, equí o somos roxos o azules pase lo que pase, y al final esi bipartidismu ta llevándonos a onde ta llevándonos.

¿Y no que respeuta a la llingua asturiana habrá dalgún avance?

Sinceramente nun sabríamos contestate. Cuando entamamos a cantar fixímoslo como falábemos: cola ‘u’ al final,  pallabres de la nuesa zona non reconocíes pero que sí s’usen… En resume, como falamos na cai o nel llar cola nuesa xente, esi dialeutu que nun llega a ser asturianu y que ye un castellanu modificáu pola influencia fonolóxica d’esti entornu tan particular nel que nos movemos. Los puristes diéronnos munchos palos porque dicíen que nun cantábemos nin asturianu nin castellanu, y entós dicidímosnos pol asturianu, pero por un asturianu abiertu, ensin errores d’ortografía; lo más correutu posible, pero entendible. ¿Y por qué digo entendible? Cuando comenzamos a escribir y a traducir los nuesos cantares consultemos fuentes distintes y caúna nos llevaba a un resultáu distintu, lo que nos llevó a simplificar lo máximo posible.

Pa llegar al nivel de vascos y catalanes no llingüístico, lo primero que debemos tener ye una llingua oficial y, pa ello, fixar un asturianu estándar que se pudiera estudiar nos colexos y que la xente usase na so vida cotidiana; entós sí llegaríamos al billingüismu qu’hai en Cataluña o nel País Vascu. Equí tenemos el problema de que la mayoría nun somos nin siquier monollingües, porque nin falamos castellanu de manera correuta nin asturianu, sinón más bien un híbridu emprobecíu de dambes.

Ye un tema bastante delicáu, pero con munchu trabayu, estandarizando, espandiéndolo na vida cotidiana, enseñándolo nos colexos, oficializándolo…, dalgún día podrémos tar al altor d’otres comunidaes billingües. Pero ye bien conocío cómo somos n’Asturies: el públicu reivindica muncho puño enrriba ‘llibertá’, ‘oficialidá’ y ‘non a esto, sí a lo otro’ nos conciertos cuando ta de folixa, cargadín, pero llueu a la hora de la verdá nin nos va nin nos vien nada. N’Asturies somo un poco pasotes y ‘veletes” nesi sen.

Tres la salida al mercáu de ‘Revolucionando’ tán preparando agora’l conciertu de presentación en La Pola Ḷḷena que va celebrase’l día 25. ¿Qué podríen adelantar d’esta cita?

Lo primero, y que ye la mayor diferencia coles presentaciones anteriores, ye que va ser n’abiertu. Dexamos el Teatro Vital Aza y vamos al patiu del colexu Sagrada Familia-El Pilar por delles razones: capacidá, espaciu y comodidá, pa que la xente disfrute más tando de pie, baillando y cantando. Tamién tendremos chigre (rises).

Queremos agradecer a tola xente que nos sigue facilitando una presentación como Dios manda: escenario grande, un gran equipo de soníu, espectáculu de lluces, pantalles, collaboraciones y, sobre manera, música en direuto. Les puertas van abrise a les 21 hores y habrá un conciertu pa caldiar a les 22 hores de Chus Pedro y Gabino Antuña. A les 23 hores actuarémos nosotros.

Pa esi día saldrá n’esclusiva a la venta la camiseta nueva del grupu y  la entrada ye de baldre y abierta a too tipu de públicos. Esperemos que’l día sía perfeutu, yá qu’hai una inversión económica grande y de trabayu tres d’ello, pero que too sía pa que la xente lo disfrute.

¿Qué planes tienen pa lo que resta del añu?

Poder siguir disfrutando sobre los escenarios, mover ‘Revolucionando’ y que la xente lo conoza y lo disfrute. Tamién siguir alendando, que nun ye poco.

Pa finar, ¿ónde se pue mercar ‘Revolucionando’?

Ta disponible na Fnac, Eroski (Mieres), El Corte Inglés d’Uviéu y en mil llugares distintos que se pueden consultar nel nuesu Facebook, yá que cada día se sumen nuevos establecimientos. Vamos espandiendo’l discu poco a poco; son coses que tien l’autoproducción. D’igual forma, si dalguien lo desea pue encargánoslu al traviés de les redes sociales y nós unviámoslu a ónde sía.

Na semeya, González Prieto, Fernández Coro, Cano, Fernández Hevia, García Villamil, Torre, Fernández del Corro y Quiñones.

Contador Estadistiques