Ruma Barbero: “La memoria histórica n'El Salvador, lo mesmo qu'equí, sigue esperando”

Una de les novedaes editoriales más destacaes d’estos meses últimos ye ‘La Chelita. El Salvador 1992’. Ruma Barbero (Xixón, 1971) avéranos nesta novela gráfica la historia del país americanu protagonista d’una guerra civil ente 1980 y 1992.

¿Por qué dedicar un llibru a la historia d’El Salvador al traviés de la esperiencia de Charo Borreguero?

Charo ye una collacia de mio de Salamanca que vieno a vivir a Xixón hai seis años y cola que quedo de xemes en cuando pa charrar y tomar daqué. Nuna d’eses charres, cola sidra pel mediu, cuntome la so esperiencia como cooperante nel país nel 1992, al pocu d’acabar la guerra. Dicíame que nun-y cuntara esto a casi naide, que volvió mui tocada d'aquella esperiencia. A mi paecióme mui interesante y pensé que podía dar pa un álbum de 50 páxines o asina. Ella dixo que nun s’alcordaba de muncho más. El tiempu, el trabayu y dir tirando del filu, acabó dando pa un llibru de 160 páxines.

¿Qué conocía enantes de ponese a trabayar nesta obra d’esti país centroamericanu?

Yo enxamás tuve n’El Salvador y sabía mui poco del país enantes de poneme a trabayar nesti proyectu. Conocía dalguna anécdota fubolera, como’l 10 a 1 que-y metió Hungría nel Mundial d’España de 1982 o Mágico González xugando nel Cádiz, y alcordábame de la presencia de la guerra nos informativos de los años 80, la matanza de los xesuites na Universidá de San Salvador y poco más. El llibru parte de la mio desconocencia d’esi país; esa ye la base de la primer parte del llibru: ¿Qué ye lo que sabemos d’El Salvador dende Europa?

¿Cómo se documentó?

Entamé a lleer tolos llibros que pude que falaran del conflictu, noveles, llibros d'artículos periodísticos y compilaciones de testimonios directos de les masacres. Vi toles películes qu'atopé ambientaes nesa guerra, documentales, reportaxes de TVE, audios de la época... Tamién foi perimportante la documentación gráfica. Nesta estaya ayudóme muncho Jose Rivera, un xixonés que lleva 20 años dirixendo una ONG de cooperación con El Salvador, que m’emprestó tol so archivu fotográficu, fundamental pa dibuxar los paisaxes, les cases y la xente salvadoreña. Lo bono d'entamar la historia dende la desconocencia total ye que pude dir documentándome al mesmu tiempu que diba trabayando, deprendiendo y cuntando a la mesma vez que'l llector.

¿Sorpendió-y dalgún aspeutu de la historia d’El Salvador?

Lo que más rescampla de la historia d'El Salvador ye la gran inxusticia social a lo llargo de los sieglos; un país en manes de 14 families qu'entá siguen dominando no económico y, en munchos casos, no político. Otra de les coses que me sorprendió foi, no que cinca al tiempu de la guerra de los años 80, la crueldá cola qu'actuó l'estáu salvadoreñu, col sofitu de los Estaos Xuníos, exerciendo un terror programáu dende estratexes militares dignes de los tiempos de la conquista d'América.

El filu conductor de la novela-gráfica ye Charo, ‘La Chelita’.

La parte central de la historia son les vivencies: Charo como una de tantes cooperantes europees de los años 80. El so viaxe dende la inocencia a la realidá más dura, col idealismu y la solidaridá por bandera.

Divide’l llibru en trés partes. ¿Qué cuenta caúna d’elles?

La primer parte, ‘El Salvador’, ye un resume históricu del país partiendo de la total desconocencia, como yá dixe enantes. La segunda parte, ‘La Chelita’, cunta la esperiencia de la protagonista como cooperante nel país tres la guerra; como Charo acaba trabayando pal Centru pa la Promoción de los Drechos Humanos Madeleine Lagadec na ellaboración del Informe para la Comisión de la Verdad en El Salvador. La cabera parte, ‘1992’, fala de les esperiencies de veteranos de la guerrilla del Frente Farabundo Martí para la Liberación Nacional (FMLN) col desarme a la fin del conflictu bélicu.

¿Qué supunxo pa la población del país centroamericanu la redaición del Informe para la Comisión de la Verdad para El Salvador de les Naciones Xuníes?

Sobre manera foron tiempos de muncha esperanza, d'acabar con una guerra de 12 años que-y costó la vida al 2 por cientu de la población del país. Más tarde vieno la decepción pola impunidá de munchos de los criminales de guerra y la reconocencia de les víctimes, que quedó pa prau. La memoria histórica n'El Salvador, lo mesmo qu'equí, sigue esperando.

¿Cómo ye la situación anguaño n’El Salvador?

De 5 años p'acá gobierna'l FMLN, l'antigua guerrilla tresformada en partíu políticu, coles sos lluces y les sos solombres, lo mesmo que cualquier otru partíu. Camiento que tolos salvadoreños coinciden en solliñar la violencia de ‘les mares’ como'l mayor retu al que s'enfrenta la so sociedá. Si na guerra había una media de 6.000 muertos al añu, anguaño, nel 2011, en tiempos de ‘paz’, hebo 4.300 muertes violentes.

Nes presentaciones que celebró per Asturies de la so obra destacó l’alta asistencia  y la cantidá de llibros que dedicó de ‘La Chelita. El Salvador 1992’. ¿Ta contentu col recibimientu que ta teniendo’l so trabayu?

Muncho. Yá'l mio anterior trabayu ‘Manzajú’ foi recibíu mui bien pola xente, asina qu'aprovechando esi públicu potencial, fice unes cuantes xornaes de dedicatoria d'exemplares col envís de vender de forma directa tolo posible. Hasta agora resultó una esperiencia mui prestosa.

¿Cómo ve la salú del cómic en llingua asturiana?

Acaba de falláse va poco'l cuartu Premiu Alfonso Iglesias de cómic, lo que garantiza la publicación, dende la conseyería, de polo menos una obra de pesu al añu. Faltaríanos recuperar dalguna publicación periódica n'asturianu como foron les revistes ‘El Llapiceru’ o ‘El Gomeru’, aú entamamos munchos de los qu'anguaño siguimos n'activo, que permitieren a autores nuevos y consagraos asoleyar xuntos los sos trabayos en llingua asturiana.

¿Cree que ye un xéneru que sigue venceyáu a xente más mozo o yá se superó esta cuestión?

El cómic nun ye un xéneru en sí; ye un mediu dientro del que pues atopar munchos xéneros diferentes. Si bien ye verdá qu'hai xéneros como son el de ‘superhéroes’ o ‘los zombis’ que siguin mui venceyaos a un públicu xuvenil, el gran españíu de la novela gráfica atopó un públicu diferente, qu'en munchos casos nun venía del mundu del cómic, sinón de la lliteratura convencional o del cine ‘alternativu’.

¿Tien dalgún proyeutu en mente nestos momentos?

Tolos que nos dedicamos a esto andamos siempre con delles coses na tiesta. Lo que más cuesta ye decidise por cuál va ser el próximu proyectu, pero idees siempre hai.

¿Y na so otra faceta, la musical?

Los felpeyos tamos enfotaos nos nuevos temes de cara a sacar un nuevu discu, qu'esperamos grabar esti añu. Siguimos ensayando toles selmanes y pasándolo bien, que tando los tiempos como tan pa la música ye dicir muncho.

Depués de tar dos años trabayando na novela gráfica sobre El Salvador, ¿quedó con ganes de viaxar a esti país centroamericanu?

Tengo munches ganes de dir ellí y sobre too saber que-yos paeció la mio visión del so país dende fuera.