Ramírez: "Prestaríanos tocar n’Asturies música mexicana como'l 'Cielito lindo'"

L’asturianía na distancia vívese con muncha fuercia. Un exemplu ye la Casa de Asturias, nacida n’Acapulco y con sede anguaño en México DF, qu’acueye una banda de gaites de mesmu nome. César Ramírez López (Acapulco, 1971) ye’l direutor axuntu de la formación y secretariu del centru asturianu.

¿Cuándo naz la Banda de Gaitas de la Casa de Asturias?

Nel añu 2004 baxo’l nome de Banda de Gaitas La Tayuela de Mecer (México), como filial de la Banda de Gaitas de Madrid que dirixía’l mio maestru Xuan Oliver, pero al desapaecer ésta n’España y al surdir la Casa de Asturias en México a primeros del 2008, decidimos camudar el nome de la banda al d’esta asociación.

¿Por qué apostaron por aniciar un proyeutu como esi en México?

Pa caltener y difundir les tradiciones trayíes a México polos nuesos padres y güelos, amás de sentir una vocación verdadera de gaiteros, convirtiendo a los nuesos miembros n’embaxadores de la música asturiana na República mexicana.

¿Cuánta xente forma parte de la banda?

Anguaño somos doce miembros: seis gaites, trés acordiones y trés percusiones.

¿Tolos componentes se formaron en la escuela de la Casa de Asturias?

La mayoría sí, recibieron la so formación en la Casa de Asturias.

¿Son toos asturianos o descendientes d’asturianos, o tamién hai mexicanos interesaos pola cultura asturiana?

Hai tanto d’unos como d’otros. Contamos na banda con mexicanos ensin ascendencia asturiana que sienten verdadera pasión pola música y defenden l’asturianía como si nacieren ellí.

¿Qué repertoriu interpreten?

Dientro del repertorio de la Banda de Gaitas Casa de Asturias atopamos pieces tradicionales españoles y asturianes arreglaes pa trés voces y percusión, amás de temes d’otres rexones de calter celta como Galicia y la Bretaña francesa, ensin escaecenos de la música tradicional mexicana, prueba viviente de la nuesa mecedura y la nuesa riqueza cultural.

En xunetu fixeron per primer vegada una actuación na plaza de la fonte de Cibeles nel DF, réplica de la de Madrid, que se repite tolos primeros domingos de mes.

Nesa ocasión, al tocar ‘Asturias Patria Querída’ toos taben cantando. Llevo munchos años nesto, pero foi inevitable derramar una llárima nel vistíu de la mio gaita.

¿Qué mires tienen cola banda?

Tocar nos meyores festivales culturales del país y inclusive ver la posibilidá de, nunos años, poder tocar n’Asturies música mexicana como’l ‘Cielito lindo’ o’l ‘Agua del Pozo’ que fixera famosa n’España el famosu cantante Jorge Negrete.

¿Qué se conoz en México d’Asturies y de la so cultura?

Trés coses son mui conocíes: la sidra, la gaita y la Virxe de Cuadonga. No qu’agora llamen ellí Día d’Asturies, equí ye la de ‘Covadonga’. Esi día nun ye namái festivo pa tolos asturianos residentes en México, sinón también pa tolos españoles por igual.

Fáleme agora de la Casa de Asturias, de la que vusté tamién ye secretariu. ¿Cuándo y ónde se funda?

Nel 2008 nel puertu d’Acapulco, d’onde nos treslladamos a la Ciudá de México nel 2013 por mor de la inseguridá que se vive nesta plaza. Foron munchos los paisanos que tuvieron que dexar el nuesu puertu bellu, viéndose disminuyíu de manera considerabe’l númberu de los nuesos afiliaos.

¿Cuántos socios tien?

Anguaño somos poco más de 100 socios, pero cada día van apuntándose más.

¿Qué actividaes desendolquen?

Amás de les clases de gaita, acordión y percusión, tamién tamos formando un cuadru artísticu que lleva por nome Manuel de la Puente, n’honor al más grande folclorista asturianu de tolos tiempos. Tamién tenemos un club gastronómicu que se llama ‘El chigre bajo el hórreo’ porque ta xusto embaxo del nuesu horru. Pronto plantegamos comenzar con un Centru de Día p’adultos mayores.

¿Qué presencia tien la llingua asturiana na Casa de Asturias?

Intentamos per tolos medios continuar falando n’asturianu lo más posible. Desafortunadamente, nun tenemos un mayestru que nos pueda dar clases presenciales, pero gracies al Conseyu de Comunidaes Asturianes y a l’Academia de la Llingua disfrutamos d’un curso on-line pa too aquel interesáu en caltener los vezos y costumes al traviés de la nuesa llingua.

¿Cómo ye la rellación col restu de centros asturianos del país?

Col Centro Asturiano Español de Monterrey esistió de siempre una colaboración estrecha y d’hermanamientu. Dende’l momentu en que nació la Casa de Asturias el so presidente José Lamas sofitónos en too, y nós al él. Ye una pena que nun pueda opinar lo mesmo del Centro Asturiano de México, que non sólo inóranos, sinón que paez que-yos molesta la nuesa esistencia.

¿Cuenten con sofitu del Gobiernu d’Asturies?

Si, inclusive nos visitó Javier Fernández, Guillermo Martínez, Paz Fernández y Begoña Serrano, a los que se-yos dio un tratu de familia. El día que vieno’l presidente taba tan a gustu que nun quería colar. A tolos nuesos visitantes recibímoslos cola típica hospitalidá costeña, pan de Chilapa y café d’olla coles sos pingarates de mezcal, cosa que fascina y inclusive nos piden cada vegada que nos visiten.

¿Cómo ven la situación d’Asturies dende la distancia?

Siendo descendiente de les cuenques, duelme munchísimo’l problema mineru, pero tengo la confianza nel nuesu Gobiernu pa que dean colos mecanismos afayadizos pa que los mineros y les sos families puedan salir alantre esplorando actividaes llaborales nueves como’l campu y l’ecoturismu.

Cada vegada son más los mozos que se ven obligaos a colar en busca de trabayu. ¿Noten la llegada d’emigrantes asturianos nuevos a México?

En realidá son pocos, quiciabes poles restricciones del Gobiernu mexicanu, siendo más vidable emigrar a países como Suiza o Alemaña. Y a esos pocos nun se-yos ve muncho interés por integrase nes cases rexonales. La mio percepción ye qu’estos mozos yá son productu de la globalización y que’l so interés nun ye venir a tocar la gaita o participar nos nuesos festexos, sinón colocase nuna empresa grande y ganar lo suficiente pa dir de compres a San Antonio una vegada al añu. Yá nun ye’l paisanu que vien del pueblu y que buscaba la querencia y proteición de los sos paisanos, pero los pocos que tocaron nes nueses puertes apoyámoslos dientro de les nueses posibilidaes unviando los sos currículum vitae a tolos nuesos socios pa ver si ye posible consigui-yos trabayu y colocalos.

Ramírez, a la derecha na semeya.