León: “L’horizonte a llargu plazu pa la defensa de los derechos llingüísticos tien que pasar por una reforma del Estatutu qu'incluya la cooficialidá”

Les primeres pallabres que salen de la so boca son en castellanu, pero un par d’entrugues sirve pa que se suelte y entame a falar nun asturianu correutu’l restu de la entrevista. Emilio León Suárez (Xixón, 1977), candidatu de Podemos Asturies a la presidencia del país, recíbenos na sede de la formación n'Uviéu, onde'l so equipu trabaya a estayu de cara a les eleiciones de mayu.

¿Quién ye Emilio León?

Emilio León, como tol mundu, tien distintos perfiles. Ta l’Emilio al que-y presta xugar al fútbol colos amigos del institutu dende que nos conocemos hai venti años. Últimamente tengo poco tiempu pa dir, pero tolos sábados díbemos a xugar a la playa de Xixón a disfrutar un poco del deporte anquen nun yeremos mui bonos futbolistes. Como nes películes Ken Loach, xente que se xunta pa pasar un ratu divertíu, facer un poco de deporte y siguir manteniéndose informaú y nun perder el contautu mientres munchu tiempu.

Llueu ta l’Emilio León que tuvo años d’estudios na facultá. Yo llicenciéme en Físiques, anque nun momentu determináu, una vez finada la carrera, interésome más pol mio compromisu social y les mios predileiciones personales pasen por continuar faciendo trabayu d’investigación n’Historia y Análisis Social. Cambié de departamento, fixi’l doctoráu –d’aquella nun yera máster–, y a partir d’aquel momentu pudi trabayar nes histories que m’interesaben más. Nel campu de la educación fíxelo con xente adulto de la Universidá Popular de Xixón que nun tuvieron en munchos casos la oportunidá d’estudiar y que, n’otros, siguíen con inquitúes a pesar de tar xubilaos. Yera un espaciu d’intercambiu sobre l’actualidá, historia y socioloxía, cuestiones que m’interesaben pero que nun pudi abordar polos años d’estudiu. Física tien poco que ver con esi ámbitu.

Naz en Xixón pero reside n’Uviéu.

Nos últimos diez años, anque sigo a caballu ente les dos ciudaes, comparto pisu n’Uviéu; dende qu’acabé’l trabayu d’investigación.

¿Cuándo principia a militar en movimientos sociales?

El primer espaciu de participación foi l’añu caberu d’institutu. Tócanos vivir les primeres midíes de calter neolliberal nel ámbitu educativu; yera cuando s’introducía’l Plan Pertierra. Tovía m’alcuerdo d’aquelles primeres concentraciones denunciando la situación de la enseñanza secundaria. Yera un momentu tamién de refluxu de los movimientos estudiantiles y, a partir d’ehí, póngome en contautu con persones que militaben nel ámbitu de los derechos llaborales y que participaben nes movilizaciones d’aquel Xixón que vivía la crisis industrial. Yeremos tamién de cuestionamientu del serviciu militar obligatoriu y participo na Coordinadora Asturiana pola Insumisión; nun llego a declarame insumisu porque nel añu que me tocaba ye cuando se profesionaliza l’Exércitu. Y tamién entro en contauto con xente que venía de la solidaridá internacional, que siguía mui de cercar los movimientos sociales en Llatinoamérica; momentos de muncha ilusión cuando nel Estáu español yera pura crisis y debacle nos movimientos de contestación.

Hai un momentu d’inflexón que ye l’aniciu del movimientu del 15-M y el nacimientu de La Madreña.

Mientres munchos años participé, con distintos niveles d’intensidá, en movimientos de defensa de los derechos de los trabayadores y contra la precariedá, porque yo la padecía y porque la xente mozo d’Asturies víamosnos destinaos a un futuru de precariedá y de miseria. Yéremos conscientes dafechu de que nun díbemos poder disfrutar de los mesmos derechos que los nuesos padres y que los derechos de los nuesos padres diben tar puestos en cuestión si nun facíemos daqué. Nun momentu determináu, l’españíu del 15-M abre l’horizonte de posibilidá de contestación social; entramos en contautu con muncha xente que vivía cola mesma inquietú pero que nun s’espresaren tovía política y socialmente. Tamién pon de relevancia les llimitaciones de los movimientos nos que nós participáramos. Tábemos solos y, como los cristianos nes catacumbes, dímonos cuenta de que se pue salir a la cai y que muncha xente coneuta con eses reivindicaciones que quiciabes nun siempre supimos espresar de la forma más afayadiza, pero qu’en too casu interesaba a una mayoría social.

A partir d’ehí, vívense momentos d’espansión y consolidación. El 15-M supón una abertura; ye como una aguamala que s’abre, cueye agua y darréu garra impulsu. El siguiente pasu son les movilizaciones en redol la marea ciudadana. N’Uviéu ye fundamental la recuperación del espaciu de la Conseyería d’Educación, Centru Social La Madreña, que sirve como catalizador y puntu d’alcuentru pa siguir xenerando movimientos de contestación, axenda movimientista, pero non sólo. Tomamos nota de la importancia que tenía la esperimentación; utilizar también los espacios recuperados como llaboratorios d’iniciatives sociales. Ehí onde ún nun ye quien a impulsar iniciatives rápidamente, éstes se pierden, y nos dimos cuenta de la relevancia que tenía la conexón col barriu, pero tamién la parte d’ellaborar un discursu alternativu y ensayalu. Fuimos quien en La Madreña a utilizar un espaciu destináu a la especulación urbanística y, ensin presupuestu, namás cola bona voluntá de la ciudadanía, dar vida a esi espaciu que cuando entramos pensamos que nos desbordaba pol so tamañu. Rápidamente enllenóse de vida y d’iniciatives sociales.

Un espaciu qu’agora ye un solar.

Desgraciadamente quienes nos gobiernen prefieren, y ésta ye la política que nos espera, que xueguen los aguarones nun solar que non los neños nun centru social recuperáu.

Nesti contestu tamién naz Podemos. ¿Por qué decide sofitar el proyeutu?

Pa min lo más importante d’esi momentu históricu ye que nos damos cuenta de que tenemos conquistáu lo que ye l’espaciu, lo que nós pudimos llamar el ‘ministeriu de la cai’. Teníemos un repertoriu de movilización social mui importante. Paecíanos que taben consolidaes delles reivindicaciones que yeren sentíes pola población, pero que nos faltaba dar un pasín más allá: abrir un espaciu nuevu de conquista d’esos derechos y consolidación. Paecíanos importante que non solamente tuviesen los derechos na cai; teníen que tar tamién nel BOPA. Había que poner en negro sobre blancu esos derechos.

La mayor parte de nosotros somos xente que nun participamos enantes en partíos. Yo siempre dicía a los mios compañeros de fútbol que l’únicu partíu al que yo yera fiel yera’l partíu de los sábados. Dábamonos cuenta de que los instrumentos de participación que teníamos al algame taben lloñe de lo que necesitábemos. Nun nos apetecía la travesía nel desiertu de les instituciones, teníemos que golpiar nesi espaciu, desbordalu, pero a partir de la enerxía acumulada del espaciu social –nun pue haber cambiu social nes instituciones si nun hai presión que se caltenga nel tiempu– y paecíanos que yera ahora o nunca. Arriesgábenos a dar esi pasu. Sabemos que va ser un pasu con un costu personal importante. Somos inxenuos, pero nos dábamos cuenta de que tábemos ante un retu. Asturies nunca refugó dar esi saltu últimu, como diz el cantar, pero yera un saltu importante qu’había de dar: el pasar de la protesta a la propuesta y amosar que quienes xestionaron de manera ineficiente y ineficaz les nueses vides teníen que ser apartaos por xente bono que vive los problemes y que se siente interpelaos polo que se fai nes instituciones.

¿L’apoyu que recibieron n’Europees y que se reflexen nes encuestes supón una gran responsabilidá pa la formación?

Pa nosotros ye importante que nun haya esa separación nidia ente quienes impulsamos el proyeutu, o somos les cabeces más visibles, y la xente que ta más necesitao de que salga bien. Nós dicimos “nun vos vamos defraudar” nin nun vamos a defraudanos a nós mesmos porque la necesidá ta ehí. Muncho más fuerte que les encuentes ye la necesidá,  y sabemos que les encuestes nun momentu nun nos daben nengún tipu de representación. Vivímoslo coles Europees, y obtuvimos cinco representantes institucionales. Agora, n’Andalucía, dábennos un 20 por cientu y al final foi un 15 y eso utilizóse de manera malintencionada pa dicir que nun tábemos al altor. Eso nun ye verdá. Demostróse qu’a pesar del adelantu d’unes eleiciones, y ensin infraestructura, Podemos ye quien a sacar un bon resultáu, y eso nun ye simplemente’l reflexu del bon trabayu que se fixo dende Podemos, sinón la intensidá, la necesidá y ilusión que tamos despertando. Y eso, evidentemente, supón una responsabilidá, pero pa tola ciudadanía; pal que participa en Podemos y pal que non, porque nos espacios de participación política nun terminen en Podemos. El que caltenga otres apuestes polítiques y de movilización tien qu’impulsales porque van facer falta tolos esfuercios pa emburriar y camudar les coses n’Asturies enantes de que muerra.

¿Cómo se xesta’l so liderazgu de la candidatura de Podemos Asturies a la Xunta Xeneral?

En toles entrevistes respuendo que namás qu’un egocéntricu o un llocu pue autopostulase pa liderar la candidatura. Esto fadríalo igual Álvarez-Cascos o Javier Fernández. Nel mio casu, nunca me desperté  diciéndome “güei tengo ganes de ser presidente de nada”. Lo que sí ye verdá ye que nun momentu determináu teníemos l’instrumentru construyíu, llevábamos un añu percorriendo Asturies esplicando-y a la xente lo importante que ye garrar la vida nes sos manes, y depués de pidir la implicación a la xente daquién tenía que facelo. Como cabeza de llista namái pue ser ún, escoyimos, falamos ente nós, llegó l’apoyu de muncha xente, y la broma de que foi Isidro Fernández Rozada’l que m’invitó (rises). Foi una tormenta perfeuta p’acabar poniéndome de cabeza de llista de Podemos, pero la cabeza de llista de Podemos ye la xente.

Sal escoyíu nunes primaries con una altísima participación, más si lo comparamos con otros territorios. ¿Ye Podemos Asturies un referente pa la organización?

Dende l’entamu Asturies ta siendo un referente non sólo en términos cuantitativos, sinón en términos cualitativos. Muncha xente que nun vive en Madrid mira pa lo que tamos faciendo porque sabe que la situación nun ye la mesma en Madrid, nel corazón de la bestia podíemos dicir, que vivir na periferia d’esti Estáu construyíu d’una manera tan desigual. Nós demostramos que la meyor manera de contribuyir a un cambiu xeneral, y el cambiu más favorable p’Asturies, yera qu’Asturies impulsase’l proyeutu xeneral y que tomase la iniciativa dende les posibilidaes que tenemos. Hai que reconocer que n’Asturies la situación ye la que ye. Llevamos trenta años d’una cosa que nun ye crisis, porque dalgo que dura trenta años ye un sistema, y dende ehí ye onde formulamos les propuestes porque nos paez que, como n’otres ocasiones de la historia, Asturies tien una responsabilidá. Tán munchos güeyos pendientes de lo que pase equí. Ye dalgo qu’asumimos y que nos arguyez.

El secretariu xeneral estatal Pablo Iglesias dixo recién que lu veía como presidente d’Asturies. ¿Vese vusté nesi cargu?

Yo veo a la xente en condiciones de tener un presidente que respuenda a les necesidaes sociales. Creo que demostramos, y cada vez me reafirmo más na idea, que la xente nun sólo necesita, sinón que tien soluciones. Hai muncha xente preparao n’Asturies; hai un capital humanu que diríen los lliberales, preparao de verdá pa cambiar les coses, y lo único que necesiten ye quitase d’enriba la llosa de polítiques clientelares y d’intereses que gobiernen n’Asturies ensin presentase a les eleiciones. Non sólo ye que me vea yo preparáu pa ser presidente d’Asturies, sinón que veo al pueblu asturianu presidiendo la so propia vida.

Prevese una Xunta Xeneral mui fragmentada, ensin nengua mayoría. ¿Qué papel va xugar Podemos a la hora d’establecer un posible Gobiernu?

Nós pensamos que la mayoría esiste y ye la mayoría social. Ésa ye la que tien qu’encontrar ecu nes instituciones que son de toos y de toes. Será responsabilidá de toles formaciones polítiques que se presenten a la Xunta Xeneral el dar cuenta y responder énte esa mayoría social que demanda que nun se rescate a los bancos pa dexar na cai a les persones. A partir d’ehí, nós tamién pensamos que l’astención, la cantidá de xente que nun participó y nun taba ilusionada cola política, agora va averase nestes eleiciones. Esto ye como si un grupu d’amigos garra un billete de llotería y tu quedes ensin compralu; esa sensación de “nun me quiero ver el día 25 ensin garrar el billete de llotería del cambiu social”.

Creyemos que va haber una sorpresa. Les encuentes, lóxicamente munches veces nun recueyen la opinión de la xente. Nós pensamos que nun tán respondiendo a la corriente de fondu que se ta viendo de cambiu. Va haber una más d’una sorpresa na composición del Parllamentu. Nun escenariu de fragmentación parllamentaria, nós vamos tratar de gobernar y esixir responsabilidaes, porque llevamos un programa –que ta en trámite de ser aprobáu– que ye’l programa de la xente, non el d’un grupu d’amigos que se reúnen nun despachu pa decidir cómo tien que ser Asturies. Ésti ye un cambiu de cultura política fundamental pa nós. Cuando dicen “non, ye que depués vamos ver; tenemos qu’entendenos ente les formaciones polítiques…”, nun ye verdá. Nós vamos tener qu’entendenos con esa mayoría social que ta fuera del Parllamentu y qu’hasta agora nun alcontró ecu nes iniciatives parllamentaries.

¿Qué midíes a curtiu plazu pondríen en marcha nel casu de poder formar Gobiernu?

Nós esplicamos siempre trés exes básicos de trabayu. El primeru ye una auditoría de la democracia: fai falta, d’un llau, ver ónde tán les perres que se marafundiaron n’Asturies, y del otru, alcontrar a los responsables políticos y, llegáu’l casu, penales d’esa situación. Ési ye’l puntu de partida pa, darréu, desplegar un plan de rescate ciudadanu qu’aborde les cuestiones básiques como la vivienda, los recursos básicos, la probeza enerxética…, pero tamién midíes qu’han de tener que ver cola dignidá de les persones. Pa nós ye perimportante’l poner sobre la mesa midíes que nun tienen por qué tener un coste económicu pero que nos devuelven la dignidá frente a aquellos que nos dicen que somos unos subvencionaos; que’l pueblu asturianu tien poca iniciativa; que somos poco trabayadores… Too esi tipu de xente que nel fondu son los verdaderos subvencionaos y a los que-yos tamos pagando’l tren de vida que tienen.

Y por último, desplegar lo que seríen los pegoyos, los cimientos, pa polítiques de llargu alcance. Ehí ye onde tamos falando d’Asturies 2030. Pa nós nun ye namái falar de cambiu; ye falar d’un cambiu de la xente, un cambiu real, coles vistes puestes a soluciones que vayan muncho más allá del ciclu eleutoral.

¿Van terminar coles redes clientelares n’Asturies?

Dende llueu, cuando falamos d’auditoría de la democracia ta nidio qu’hai que terminar coles redes clientelares que tán espulsando a la xente mozo d’Asturies y que tán impidiendo que les soluciones que yá tán ehí puedan ser implementaes. Amás contribúin a un clima social de desánimu y desincentivu, porque ver que la xente que trabaya nun ye premiao; que les bones idees nun son teníes en cuenta; que la xente más válido nun ta nos puestos de responsabilidá…, fai que la xente nun quiera facer bien les coses. Sicasí, lo que nos atopamos ye que mui poques persones quieren facer mal les coses a posta. La xente quier sentise arguyosa del so trabayu, de les sos iniciatives, y cuando falo del trabayu nun me refiero sólo al emplegu, sinón a cualquier tipu d’activida social en xeneral. Paeznos que, depués del rellatu depresivu de “les coses van mal”, “los chiringuitos del PSOE”…, alcuentres la otra cara, que ye la cara de la ilusión y de la xente. Y esto tamos alcontrándolo en tolos espacios. Recién tuviemos una reunión con trabayadores d’una fundación y lo primeru que te dicíen yera “esto ye  un chiringuitu del PSOE”, pero esplicaben al mesmu tiempu les posibilidaes de tresformar eses estructures y esos recursos en dalgo útil pa la sociedá asturiana. Agora mesmo tenemos una visión muncho más positiva y muncho más esperanzadora de lo que nos espera n’Asturies a partir del 24 de mayu.

¿Ye posible finar cola sangría de la emigración de la mocedá?

Ye posible’l reformular les polítiques migratories tanto de la xente mozo que tien que marchar; de la xente que nun ye tan mozo pero que tien otru perfil sociollaboral, porque non sólo marchen universitarios; y tamién que nun se persiga a la xente que vien d’otros países y otres cultures. Paeznos que forma parte too del mesmu problema y tamién de la mesma solución. Asturies tien que convertise en referencia del campu económicu y cultural. Tenemos que dexar de copiar les males idees d’otros y buscar que n’otros llaos falen de lo que se ta faciendo n’Asturies. Eso ye lo más importante pa nosotros.

¿Qué planteguen pal AVE? ¿Va llegar a Xixón o va quedar en La Pola Ḷḷena?

Hai que revisar les infraestructures que nun momentu determináu foron calificaes en plena burbuya especulativa y que nun respondíen en munches ocasiones a les necesidaes reales, nesti casu de movilidá de la población. Paeznos que les infraestructures que tán yá feches hai que terminales y hai que da-y el meyor usu al AVE, pero tamién al metrotrén o a la estación intermodal. Hai que dir casu por casu viendo lo que se pue facer con dalgunes d’eses obres, dalgunes veces escesivamente costoses como ye’l casu del AVE, onde vimos con toda claridá que’l sobrecostu yera tremendu y se sabía dende l’entamu. Nun s’adaptaron les cuestiones téuniques más afayadices, sinón que respondíen a los intereses d’esos que, como dicíemos enantes, gobiernen Asturies ensin presentase a les eleiciones.

Lo conveniente sería llegar a La Pola Ḷḷena, anque hai un tramu de La Robla a Lleón que ta ensin facer. Si nun llega l’AVE a Asturies nun ye por culpa de Podemos, sinón d’otra xente, pero lo que nosotros plantegamos ye que l’alta velocidá nun ye lo mesmo que la velocidá alta. Pa nós ye fundamental que los recursos s’utilicen pa qu’haya una rede que vertebre territorialmente Asturies. Nun pue ser que d’Uviéu a Ferrol haya un viaxe al día; eso ye una vergoña. Nun podemos fala-y a la xente pa dir a Madrid y que llueu pa dir de Xixón a La Pola Siero tengas que facer un tresbordu n’El Berrón. Paeznos qu’hai cuestiones que son prioritaries, pensando nel día a día de la xente que trabaya n’Asturies y fai desplazamientos de percorríu curtiu, y que la so demanda nun pasa por dir a Madrid aforrando diez o venti minutos de La Pola Ḷḷena a Xixón, con tolos efeutos que tienen esi tipu d’infraestructures.

Ún de los grandes retos que deberá afrontar l’Executivu nuevu ye’l futuru de les cuenques y zones mineres.

Javier Fernández ye un inxenieru de mines, que ta mui bien cuando quies cavar un pozu, pero la nuesa idea ye salir del pozu y pa salir del pozu tien que ponese enriba la mesa delles cuestiones. Per un llau una visión integral del plan sobre les necesidaes, incluyíes les necesidaes enerxétiques. Hai que satisfacer les necesidaes non sólo de les grandes empreses, sinón tamién de la población que nun llega a final de mes pa pagar la lluz y tien qu’escoyer ente comer o calecese en casa. D’otru llau, hai que pensar nes prioridaes de la población. Pa nós nun tien sentíu caltener puestos de trabayu si nun ye pa dar vida a eses zones mineres, y a partir d’ehí tenemos que ver, colo qu’hai agora mesmo, qué facemos coles mines. En cuanto en tanto s’utilice’l carbón n’Asturies tien que ser carbón asturianu. Esto ye la prioridá. Y tenemos que deprender de cómo se fixo tan mal colos fondos mineros, colos fondos estructurales, qu’en llugar de crear un texíu económicu alternativu lo que se fixo foi enllenar los bolsos de trés o cuatro. Tamos a tiempu de recuperar esta oportunidá y de qu’haya alternatives.

Y mientres haya necesidá, por supuesto, utilizar la minería, caltener los puestos de trabayu, utilizar y fomentar el carbón asturianu pa que nun haya carbón d’importanción nunes condiciones de semiesclavitú de los que lo producen, porque pa nós tamién ye importante esta visión internacional. Nun ye namái una cuestión de garantizar los puestos de trabayu n’Asturies; ye tamién en qué condiciones tán trabayando n’otros llaos. Debemos tener una visión más integral que ye de lo que carez la casta política y económica asturiana, que nun contempla realmente alternatives económiques muncho más sostenibles nel tiempu.

Oficialidá, ¿sí o non?

Nós tamos agora mesmo nel puntu clave pa recoyer les propuestes que se van treslladar al programa. Dende l’entamu diximos que nun se diben a poner en cuestión la defensa de derechos básicos. Hai xente que dicía, de manera un poco demagóxica, “ye que van discutir los derechos de les muyeres y de los negros”, y non, nun se van discutir los derechos llingüísticos. L’alderique yera cómo garantizalos de la meyor manera, a curtiu plazu y a llargu plazu. Cualquiera que tea pola defensa de los derechos llingüísticos de los falantes d’asturianu, y gallego-asturiano na so dómina, va quedar contenta, toi convencíu, col resultáu. Daniel Ripa y yo vamos defender la propuesta que fai Lluismi Orviz na que se formula de forma nidia que l’horizonte a llargu plazu pa la defensa de los derechos llingüísticos tien que pasar por una reforma del Estatu na que s’incluya la cooficialidá del asturianu nel campu llingüísticu.

Siempre insistimos muncho que queremos qu’haya oficialidá en munchos derechos: derechu a la vivienda, a un trabayu dignu y derechu a que se nos respete como ciudadanos, y eso inclúi a la xente que fala n’asturianu, que nun tien por qué tar discriminao. Pagamos toos los mesmos impuestos y nun pue haber ciudadanos de primera y de segunda según la llingua que fales, pero forma parte too d’una visión de conxuntu, y entós ésta ye la propuesta que personalmente vamos defender pa que s’incluya nel programa, que se tien que refrendar. Ha de ser un programa de la xente del pueblu asturianu onde nun se van aprobar o proponer coses que vayan en contra de lo que consideramos derechos fundamentales como ye’l respetu a les llingües.

L’apuesta entós ye llevala a una futura reforma del Estatutu.

A curtiu plazu, llevaríemos al máximo les posibilidaes de la llexislación vixente. Paeznos que la Llei d’Usu y Promoción del Asturianu nun ta aprovechada y tamos a tiempu de salvar la llingua asturiana d’esa muerte sele que nos pon en bandexa esta xente a la que xamás-yos interesó pa nada la cultura asturiana y muncho menos el tema llingüísticu. Nel procesu constituyente del que falamos, dicimos que ye necesario repensar los alcuerdos de la Transición y la Constitución del 78 –supón avances en determinaos terrenos pero tamién tien les sos llimitaciones; 30 años depués, hai que revisalu–. Nel casu asturianu, na parte que nos correspuende d’esi procesu constituyente, l’Estatutu d’Autonomía, y na so reforma vamos impulsar que s’incluyan derechos, ente ellos el de la oficialidá. Esto nun depende namás de Podemos. Vamos trabayar pa garantizar que’l consensu social que pa nós esiste en torno a derechos básicos sía treslladáu tamién a esa reforma pola parte que-y correspuenden a les distintes formaciones. Pa nós ye importante tolo que sía prudencia y xenerosidá  pa que sía realmente incorporáu pol conxuntu de les formaciones parllamentaries y qu’esi consensu garantice una solución a llargu plazu tamién pal asturianu.

¿Tán trabayando nun Plan de Normalización Llingüística?

Agora mesmu les propuestes que nos llegaron van en sentíos distintos. Per un llau, la parte de la dignificación de los derechos llingüísticos y, per otru, coordinar les iniciatives de promoción. Paez que, pola escasa voluntá política, nun se desplegaron polítiques coordinaes nel ámbitu llocal y autonómicu, y hai una propuesta de combinación de coordinación de servicios de normalización llingüística, por exemplu. Hai otru ámbitu nel qu’hai propuestes qu’hai que refrendar, que ye’l de la educación, que tien que ver col impulsu de la especialidá d’asturianu; que te presenten y sía posible, de manera voluntaria, el recibir, como n’otros idiomas, dende la Educación Infantil al Bachilleratu, l’aprendizaxe de la llingua asturiana… Hai delles propuestes nesi sen.

Reciben crítiques dende un sector del asturianismu de sucursalistes. ¿Van respetase toles decisiones de Podemos Asturies dende Madrid?

Les decisiones que se tomen n’Asturies tómense n’Asturies, pero nós tenemos una visión de conxuntu. Paeznos que tamos nuna situación d’emerxencia social y histórica na, que una vez más, Asturies da muestres de xenerosidá. Que los pasos que se dean nun llau sían teniendo en cuenta lo que ta pasando n’otros escenarios; eso ye lo mesmo que-y pidimos a compañeros y compañeres d’otros llaos, como la xente d’Andalucía. Eso nun pasa por Madrid, pasa por exemplu por Andalucía tamién y por tolos territorios del Estáu español.

Dende fuera pue dar la sensación de que Podemos ye Pablo Iglesias.

Pablo Iglesias tien una presencia y una esposición mediática perimportante y esto fai que lo que diga o dexe de dicir tien un pesu na sociedá y se tien en cuenta, pero dende llueu toles polítiques tán coordinaes. El sucursalismu ye’l que viven otres formaciones polítiques nes que dependen d’una persona namás que pon sigles al so partíu o vivir na voluntá de nun cambiar les coses. Ye mui cómodo tar nel sucursalismu del nuesu portal de casa y eso ye tamién una forma de sucursalismu y derrota que nun nos paez tampoco la más afayadiza.

Compromisu por Asturies sofitó’l procesu de Podemos nel país dende’l primer momentu y hai destacaos asturianistes dientro de la formación. ¿Qué pesu tien l’asturianismu en Podemos Asturies?

L’asturianismu nun tien más nin menos pesu dientru de Podemos qu’otres realidaes de la sociedá asturiana. Les persones que participen en Podemos venimos de facelo de manera individual; caún tien la so mochila. Yo vengo de los movimientos de reivindicación y de compromisu social, pero tamos equí non pa interpretanos a nós mesmos, como los malos actores. Ves una película de Robert de Niro y llega un momentu nel que nun sabes si tas viendo a un personaxe qu’interpreta Robert de Niro o a Robert de Niro n’otra actuación más na que s’interpreta a él mesmu. Tamos faciendo daqué distinto y tamos aprendiendo a facer. Esto ye mui importante. Esto nun ye un xuegu de corrientes ideolóxiques; ye una cuestión de cómo abordar d’una manera distinta problemes pa los que nun tuviemos solución hasta agora y esperimentar con coses. Pa facer lo que yá se venía faciendo nun necesitaben Podemos, y esto tien que ver tamién col tema llingüísticu.

A nivel municipal Podemos impulsó delles candidatures de xunidá popular. ¿Qué espeutatives tienen?

Tamos contentos de cumplir coles propuestes que s’aprobaron cuando salió escoyíu esti conseyu ciudadanu, que yera impulsar eses candidatures de xunidá popular ciudadana tal y como se decidió a nivel estatal, porque pa nós yera mui importante que’l cambiu tamién se diera a nivel municipal. Nun pensábamos que fuese suficiente cola tresformación a nivel autónomicu. Paeznos que la política tien que tar a nivel de cai y que tien qu’haber un procesu d’aprendizaxe políticu na sociedá asturiana. Nunca se viviera un movimientu de repolitización tan importante. Ye histórico qu’haya agrupaciones d’eleutores nes ciudaes principales. Esto ye construcción pela base; el pueblu que garra la soberanía y que da pasos. Nesi sen, paeznos que va haber candidatures nes ciudaes más importantes y la recoyida d’avales ye’l meyor aval de que tienen posibilidaes de tener bonos resultaos.

En Somos Uviéu, Equo y dalgunes persones abandonaron la candidatura.

N’Uviéu tenemos una candidatura encabezada por dos persones que tienen un prestixu y una validez reconocida. Una ye Ana Taboada, que contó col 90 por cientu de los votos y salió como cabeza de llista. Los procesos de configuración de candidatures de xunidá popular tienen tola dificultá del mundu porque, amás de les trabes alministratives, tamos falando de superar una sociedá despolitizada construyida sobre la insolidaridá y la falta de participación. Y tamién tamos nun momentu nel qu’hai xente que ta naguando por ufiertar una alternativa real a la hexemonía del gabinismu con rostru nuevu, que ye Caunedo, y d’otra xente que quiciabes nun tien nidio que nun son les sigles lo más importante, sinón la xente. Cuando apostamos poles agrupaciones d’eleutores como formatu sabíemos que yera muncho más fácil presentanos como un partidín y, ensin necesidá d’aval, facíemos unes primaries ente cuatro y yá lo teníemos fecho, pero paecíanos que yera otra cosa.

¿Entiende la so marcha?

Eso podría esplicalo meyor la xente que ta participando en Somos Uviéu, porque como Podemos nun intervenimos. Nós llanzamos la candidatura y ehí hai xente de Podemos Uviéu que ta participando, xente independiente y xente que vien d’otros llaos. Pa nós ye llexítimo’l que cualquiera entre o salga en función de cómo valore’l procesu, y de xuru que vamos alcontranos colos compañeros y compañeros d’Equo y d’otres sensibilidaes que nun momentu determináu pueden valorar que ye meyor quitase nesta fase del proyeutu, pero ensin más. Nun tien mayor trescendencia.

¿Por qué nun hebo alcuerdu con Equo, como pasó n’Andalucía?

N’Andalucía Equo participa nel mesmu sistema de primaries que se fixo n’Uviéu, nes candidatures de Somos Asturies. Equí nun-yos paecía’l sistema más afayadizu. A nivel autonómicu teníemos nidio que la nuesa apuesta ye que la xente reivindique un cambiu, non una suma de sigles; un cambiu más fonderu nes formes de participar. Propúnxose-yos participar nes primaries abiertes de Podemos, porque nun son primaries de partíu –n’Equo fai falta tar inscritu y hai unes condiciones más restrictives–, pero quiciabes polos ritmos que teníen les organizaciones, nun hebo tiempu pa facelo cómo nos prestaba, porque ta nidio qu’hai munches sintoníes en munches de les propuestes y de xuru que con más tiempu fora posible.

En Ḷḷena, Compromisu, que tien un edil, va presentase a les municipales. Nesti conceyu nun salió candidatura de xunidá popular. ¿Va avalar Podemos Asturies a Compromisu por Ḷḷena?

Podemos namás que pue apoyar candidatures d’agrupaciones d’eleutores. Eso nun significa que nun se pueda ver con simpatía, casu por casu, otru tipu de candidatures de xente bono que, nos conceyos onde nun hebo la posibilidá de desplegar toda esta propuesta, vean la necesidá d’esi cambiu. Pero vamos dir casu por casu. De momento bastante tenemos colo que ye la campaña a nivel autonómicu; ufiertar l’apoyu que sía posibles a les candidatures que s’impulsaron dende Podemos y, llueu, yá veremos si hai posibilidá de facer chisgos o alcontrase con otra xente que ta trabayando nos conceyos. Pero esto ye una cuestión que debería responder la xente que conoz la iniciativa, los vecinos y vecines, que son los que nel fondu deberíen apoyar, non sólo la xente de Podemos. Ye como nel casu d’Uviéu: la llexitimidá o non danlo 3.000 persones que firmaron los avales. A partir d’ehí, cuando ye la xente la que demanda una candidatura, poco tienen que dicir munches veces les organizaciones.

Semeya obra d'Iván G. Fernández.