González Riaño: “La UABRA ye nestos momentos la única manera de pensar sobre Asturies n’asturianu”

La tercer edición de la Universidá Asturiana de Branu (UABRA) yá llegó al so fin. El so direutor, Xosé Antón González Riaño (Viella, 1956), fai un balance d’esta cita que tien llugar en Cangas y qu’esti añu vivió’l so récor de participación.

¡Vaya ambiente más guapu que tien la UABRA!
 
Sí ye verdá que l’ambiente de la UABRA ye guapu, animosu… De xente fundamentalmete mozo y profesional que fala, interautua n’asturianu y deprende coses de la situación munches vegaes crítica pola que pasa Asturies, dende distintos puntos de vista. Un aprendizaxe que se fai n’asturianu. Nosotros creo que, efeutivamente, llogramos esi clima de cursos de branu, de cursos de calter universitariu de divulgación n’asturianu y, dende llueu, con un compromisu cola cultura asturiana inéquivocu. Dende esi sentíu, creo que tenemos que tar especialmente contentos.
 
Tres trés ediciones, ¿pue dicise que la UABRA ye un eventu consolidáu?
 
Pa nosotros ésti yera un añu clave xustamente pola crisis económica. El fechu de qu’hubiere más alumnos matriculaos, hasta llegar a los 120, y qu’alrodiu de tolos eventos de la UABRA participaren práuticamente 170 persones, pa nosotros implica un gran afitamientu. Podemos seguramente medrar más, lo que pasa ye qu’ési nun ye un gran oxetivu de nueso. Más allá de 200 persones nun ye’l nuesu oxetivu, que sería ufiertar nueves posibilidaes formatives, abrir más l’ámbitu de les actividaes, pero non llograr un númberu mayor d’alumnos porque mesmamente les instalaciones a les que nun vamos a arrenunciar, éstes de la Escuela Hogar –y el sofitu de Cangas del Narcea–, tienen les llendes que tienen y más nun sería intelixente facer. Sería masificar.
 
¿Cómo ye la rellación col Conceyu de Cangas?
 
Nun sólo tamos cómodos en Cangas, sinón que col Conceyu tenemos esi pautu pa la creación de la UABRA y podemos dicir que tán cumpliéndolu escrupulosamente y xenerosamente. La implicación del Conceyu de Cangas y de l’alcaldía ye total, y nun ye retórica; ye práutica. Y tenemos que dicir que la UABRA naz col puxu, cola condición, que pon l’Academia de la Llingua, pero nestos momentos ensin la collaboración plena de la Universidá d’Uviéu y el Conceyu de Cangas, nun sería factible.
 
¿Qué actividaes entamaron esti añu de manera paralela a la UABRA?
 
No que respeuta a les actuaciones musicales hubo dos conciertos que se pudieron facer gracies a la implicación personal y emotiva de los participantes. Marisa Valle Roso dio un conciertu pa nós memorable, pero porque ella y el so grupu teníen muncho interés en participar nesta actividá de la UABRA y porque facilitaron al máximo esa posibilidá. Lo mesmo podemos dicir d’Héctor Braga. Esti añu fiximos un cursu de música tradicional asturiana dirixíu por José Antonio Gómez que, pa min, ye un modelu de cursu d’estensión universitaria, con un rigor académicu y con un enfotu divulgativu plenu. Ye un modelu de lo que queremos facer. Héctor Braga participó nél como profesor y el conciertu que dio foi un complementu a esi cursu. Si tuviéramos que facer una actuación musical convencional d’un grupu con otres carauterístiques y con tolos condicionantes económicos, esti añu tuviéremos problemes.
 
Nosotros aspiramos a que’l próximu añu la UABRA funcione con un presupuestu regularizáu, ensin les torgues que tuvimos que superar esti añu, que foron munches, non tanto nel aspeutu organizativu, pero sí económiques.
 
Cuando’l Gobiernu d’Álvarez-Cascos dio a conocer el presupuestu que tendría l’Academia de la Llingua Asturiana, una de les primeres decisiones que tomó la institución foi mantener el de la UABRA.
 
Pa l’Academia de la Llingua la UABRA ye ún de los sos buques insinia. La UABRA ye nestos momentos la única manera de pensar sobre Asturies n’asturianu y, dende llueu ésta ye una idea que tenemos que perfeicionar. Ésti ye un proyeutu que consideramos trescendente p’Asturies y merez el máximu esfuerzu por parte de l’Academia de la Llingua Asturiana.
 
Tornando a les xeres complementaries, esti añu celebráronse tamién cuatro conferencies.
 
Esta estaya busca l’análisis y les alternatives a Asturies dende distintos puntos de vista. Una cuestión que nos preocupa muncho ye’l patrimoniu artísticu y nesta edición contamos con una de les persones más especialistes na cuestión del tratamientu políticu al rodiu d’esi tema. Preocúpanos tamién el tema de la ecoloxía y el mediu ambiente n’Asturies y la situación socio-económica n’Asturies; polo tanto, buscamos temes d’actualidá relevantes que se puedan analizar y sobre los que podamos proyeutar midíes y propuestes de meyora.
 
¿Ye tamién una forma d’amosar a la opinión pública que la llingua asturiana pue utilizase en cualisquier rexistru?
 
Sí. Tradicionalmente les nueses conferencies foron dures. Cuando falamos del xenoma y cáncer, yera un tema mui específicu, mui concretu, al rodiu d’aspeutos bioquímicos, y fíxose n’asturianu. Falar de socioloxía o de cultura n’asturianu ye más fácil que de temes científicos más duros. Queremos treslladar a la opinión pública’l fechu de qu’estes disciplines o temátiques dures pueden abordase tamién n’asturianu.
 
Sigue calteniéndose n’Asturies una mentalidá diaglósica, anque yá d’un mou más minoritariu. La rocea que tenemos que valtar ye la que considera que nun ye rentable invertir en llingua y cultura n’Asturies. Tamos mui enfotaos na idea de qu’un pueblu qu’invierte na so llingua y no so cultura tien más posibilidaes de futuru qu’un pueblu que s’autoodia o que desprecia la so cultura tradicional.
 
Nel actu de presentación de la UABRA, la conseyera Ana González comprometióse a la creación de la especialidá de llingua asturiana, una de les demandes principales de l’ALLA. ¿Confía en que sía una realidá nesta llexislatura?
 
La conseyera, dende’l puntu de vista personal, tien una vinculación y una sensibilidá hacia l’asturianu inequívoca. Ella, va munchos años, participó nel programa de branu de l’Academia de la Llingua Asturiana, polo que puedo dicir que nun ta improvisando. La so posición con respeuto a l’asturianu tien un calter personal históricu. Yo creo que dende la conseyería d’Educación sí se reconoz nesti momentu la utilidá práutica, pa la racionalización de la enseñanza d’asturianu, de la especialidá de Llingua Asturiana pal profesoráu de Primaria y Secundaria. Nun podemos escaecer una cuestión, que ye que quién tien que reconocer esa especialidá ye’l Gobiernu de Madrid al traviés del Ministeriu d’Educación; lo que pasa ye que nun ye lo mesmo plantegar esa posición d’un mou astrautu dende Asturies a que lo pida la propia Conseyería d’Educación del Gobiernu d’Asturies. Son de signu políticu distintu, pero hai posibilidaes porque, a parte, el Partido Popular llevaba esplícitamente nel so programa esa idea. Polo tanto, tamos en condiciones d’argumentar positivamente, per parte del Gobiernu d’Asturies, y nuna posición que dende’l Gobiernu de Madrid tien que vese como una racionalización, mesmamente de recursos, pa llevar alantre la escolarización del asturianu.