Ánxel Nava: “ABRA tuvo una mirada universal dende la identidá; delles élites culturales d'anguaño, non"

Una esposición nel Edificiu Históricu de la Universidá d'Uviéu torna a xunir la obra d’ABRA, grupu d’artistes asturianos de vanguardia que trabayaron de manera conxunta del 1980 al 1987. Ánxel Nava (Uviéu, 1953) ye un 'abraliense'.   

¿Cómo surde la oportunidá d’entamar la muestra ‘ABRA. El reencuentro’?

Ye una esposición que surde del ámbetu universitariu. Esther Rodríguez Ortíz facía una tesis doctoral sobre les artes asturianes de los 80, conocía’l grupu –ye familia d’Emiliano Alonso– faló cola Cátedra d’Estensión Universitaria y propúnxomos esta retrospeutiva na sala del Edificiu Hestóricu, un proyeutu enguedeyáu pola falta de medios de la Universidá, que rebaxó espeutatives. La organización foi abegosa, pero la idega del reencuentru (love story) yera ilusionante pa los miembros del grupu y salió alantre la cosa.

Pasaren 26 años de la última muestra conxunta d’esti grupu d’artistes.

De fechu pasaren 33 dende l’orixe del grupu ABRA nel 1980. Ésa ye la data memoriativa. Atopámonos más vieyos, pero nun tamos acabaos. Yo véome peleando cola mesma visión rebelguina del arte y la vida. Más que pola señaldá, ye xusto que se mos reconoza una trayeutoria.

¿Qué van poder ver los visitantes nella?

Obres d’unos artistes asturianos de los años 80. Paezme qu’aguanten bien el tiempu. Les nueves xeneraciones van poder conocer la hestoria d’un grupu del arte de vanguardia n’Asturies. ABRA recupérase del escaezu. Hai que dicir qu’entá nun hai una bona coleición d’arte contemporaneu nos museos asturianos.

ABRA provocó un enantes y un depués na historia del arte asturianu contemporaneu. ¿Cómo yera la situación nesi tiempu?

Esti asociacionismu surdía nuna Asturies que salía de la dictadura, estrenaba democracia y abríase a la modernidá. Son tiempos nos que los coleutivos artísticos teníen puxu y lluchaben por camudar la sociedá: enantes foi Astur71, l’Asociación de Pintores y Escultores, dempués Brutto o, yá nos 90, Paraíso Espacio Abierto. Si dalgún méritu tuviemos foi la mirada universal dende la identidá, cosa que nun tienen delles élites culturales d’anguaño cegates pol ‘efeutu Doppler’, defeutu visual que lo de lloñe velo grandono y lo de cerca, probe.

¿Cómo llegó esti grupín d’artistes a trabayar de manera conxunta?

L’influxu de la Escuela d’Artes Aplicaes d’Uviéu foi fundamental. Ellí biltaron los suaños d’ABRA. Bernardo Sanjurjo anovara la Escuela algamando un nivel de Facultá de Belles Artes, qu’entovía nun tenemos n’Asturies. Fernando Alba, cola so cercanía y amistá colos alumnos, afalaba la nuesa vocación. D’entamu, el grupu yéremos siete: Emiliano Alonso, Manolo Méndez, Hugo O’Donnell, Ástur Paredes, Vicente Pastor, María Jesús Rodríguez y yo.

Pero ABRA afítase nel barriu uviedín de Ciudá Naranco. Un barriu vivu, con un vecindariu activu y asociativu, onde fundíense los oficios tradicionales colos industriales. El Nido, un mesón gobernáu por Milio del Nido y la familia de María Jesús, yera como un centru social; convivíen paisanos de chigre, tertulies de café, comides de platu’l día y nueches de folixa cola mocedá. D’ellí salieron bandes de gaites, grupos folk, equipos de balonmano, radios llibres… María Jesús y Hugo teníen el taller vivienda nuna minúscula tenada d’autoconstrucción y nella facíemos les reuniones d’ABRA. Yo fui a vivir al barriu, trabayaba les obres matériques nuna cuadra que daba al patiu; Manolo compartía l’espaciu conmigo; Ástur tenía’l taller nuna guardilla n’Uviéu; Emiliano venía dende La Felguera; Vicente diba y venía de Ḷḷuarca… Al rodiu d’ABRA taben tamién los abralienses: les nueses muyeres, collacios, xente del barriu y hasta’l perru Guzuta. Una tropa.

¿Por qué’l nome ABRA?

ABRA surdió de les páxines d’un diccionariu. Foi de fechu un oxetu atopáu de la A a la Z. Diseñámosla como gráfica; nunca quiximos que toviera un significáu concretu, pero tien una resonancia simbólica secreta y otra xeográfica, con trés acepciones permáxiques: una sablera abierta a la mar, una vallina ente dos montes y una faza esclariada nuna viesca.

Nel 1981 tuvo llugar la primer esposición. ¿Cómo la recuerda?

Foi l’aniciu de la nuesa vida artística. Ficímosla na Escuela d’Artes Aplicaes pa contrastar les obres col güeyu los nuesos mayestros. Pero foron les esposiciones itinerantes per Asturies, reabriendo les antigües cases del pueblu y centros de cultura de L’Entregu, Mieres, Candás y Corvera, les que mos dieren sonadía ente la crítica y públicu.

Col pasu del tiempu hubo incorporaciones nueves.

El ritmu de trabayu –y folixa– yera fuerte. Manolo Méndez acabó dexando’l grupu y, pa caltener el míticu númberu 7 del aniciu, incorporóse Pedro Pablo Alonso, que yera periodista, pintaba y ficiéranos dalgunos testos críticos.

Dellos integrantes d’ABRA destacaron tamién pol so compromisu cola llingua.

Tamos arguyosos de caltener esta posición nes artes d’Asturies. Ástur Paredes, Hugo O’Donnell, María Jesús Rodríguez y yo mesmu enfotámonos nesta reivindicación que va más allá de la llingua; ye’l compromisu cola cultura del país. Hugo y María Jesús entamaren nel 1988 la esposición Artistes Asturianos pola Oficialidá de la Llingua, cuando’l movimientu pol autogobiernu, y yo fícelo otra vegada coles amueses d’Artistes pola Oficialidá, dientro les campañes del CAO, ente’l 2006 y el 2009. Agora, na inauguración d’esta esposición, el discursu d’agradecimientu d’ABRA fízose n’asturianu, sabiendo la fuercia simbólica de les nueses pallabres na institución universitaria.

¿Mirare enantes el coleutivu artísticu asturianu pal idioma del país?

Ástur Paredes foi pioneru dientro y fuera del grupu d’esta posición asturianista de defensa de la llingua. Naquellos años vivíense los ecos de Conceyu Bable, pero los artistes plásticos nun tábemos nos movimientos del Surdimientu; les preocupaciones diben peles tendencies artístiques internacionales. Sicasí, nos alderiques foron calando en nós estes idees. Esa evolución amuésase nos catálogos coles semeyes de portada d’elementos etnográficos identitarios. Ye de coseñar que’l de la cabera esposición d’ABRA nel Muséu de Belles Artes, nel 1987, fora’l primer catálogu billingüe de les artes asturianes.

Miembros del grupu tamién participaron nes Xornaes Pedagóxiques d’Asturies pa maestros y profesores.

Camentábemos la importancia de la educación artística pa la comprensión del arte contemporaneu. Teníemos contautu colos movimientos de renovación pedagóxica y defendíemos una pedagoxía basada na espresión plástica llibre. Nes Xornaes Pedagóxiques, Vicente, Ástur y yo dimos teoría y práutica d’un taller de Plástica na escuela. Les nueses propuestes espardiéronse ente los/es mayestros/es progresistes, y miembros d’ABRA, Hugo, Ástur y yo, impartimos talleres na Casa del Maestro de Xixón. Pensábemos que nunos años podíen camudar les enseñances artístiques, pero aquel taller de plástica desanicióse del CEP desplazáu poles nueves teunoloxíes; los colexos retrocedieron, tornaron a copiar lámines, y nun s’algamó la revolución plástica nes escueles d’Asturies.

¿Qué idees y proyeutos desendolcaba esti grupu de vanguardia?

Les actividaes que facíemos foron iguando un ideariu non escritu d’ABRA, que son el compromisu d’esti grupu plásticu cola sociedá asturiana. Queríemos llevar l’arte contemporaneu non sólo a museos o galeríes, sinón a otros espacios y centros sociales pa un disfrutar del arte pola sociedá. Yéremos conscientes del guetu de les vanguardies. L’artista tenía d’averase al pueblu, depreder a ver l’arte dende una actitú non elitista, una espresión plástica abierta a persones de toa edá, n’especial a los neños, col envís de que la distancia ente vanguardia y sociedá fore menguando hasta integrase l’arte na vida. Había que llevar l’arte asturianu dientro y fuera de les llendes d’Asturies, a villes y pueblos, a otres comunidaes y países. Esta idea faise realidá coles esposiciones itinerantes per Asturies y cola esperiencia de Nueva York.

¿Qué supunxo pal grupu la esposición fecha na ciudá estauxunidense nel 1984?

Cuando’l Coru Universitariu d’Uviéu cantó na catedral de San Patricio, Lisardo Lombardía, presidente del coru, y Pedro Pablo Alonso, que facía reportaxe pal periódicu, llevaron un dossier del grupu y foron a percorrer galeríes. Una del East Village, la West Broadway Gallery, interesóse pola obra y ufiertónos una esposición. Aquello foi un suañu. ¡Un grupu ‘de provincias’ na metrópoli cultural del mundiu!...

Sofitónos l’Ayuntamientu d’Uviéu col enfotu personal del alcalde, Antonio Masip. Foi toa una aventura. Nun había daquella esperiencia d’esposiciones internacionales n’Asturies, nin de llevar per avión obres de gran formatu. El viaxe nun vamos escaecelo enxamás. La ‘Gran Manzana’ seduxo al grupu ABRA, pero pa dalgunos supunxo tamién un afitamientu na identidá asturiana dende esta perspeutiva universal. Calletramos la sencia d’un arte contemporaneu nos raigaños d’Asturies. Na esposición de Bual, cola pieza arqueolóxica del puñalín d’antenes de Penácaros nes manes, Ástur afitó: “Prefiero esponer n’Ibias que facelo en Nueva York”.

¿Por qué decidieron dexar d’esponer de manera conxunta nel 1987?

Nueva York foi un puntu d’inflexón; un esfuerzu enorme que provocó tensiones. Siguimos xuntos, pero ralentizáronse los proyeutos coleutivos. La maduración artística dixebraba necesidaes espresives; pidíanos yá individuales; un camín personal. Amás, el techu les artes d’Asturies ye baxu; n’algamando un  nivel, acábense les oportunidaes, cosa que sigue pasando güei coles nueves xeneraciones. Nel 1987 decidimos facer la última esposición coleutiva nel Muséu de Belles Artes y acabar por dilir el grupu. Hebo conciencia de fin de ciclu: siete miembros, siete años. Medraron los monstruos d’ABRA y queríen volar solos.

Pese a too, ¿siguieron manteniendo contautu?

Dexamos Ciudá Naranco. El barriu camudó, peslló El Nido y acabóse la maxa d’aquellos años de mocedá… La vida marcó otros rumbos. Emiliano y Ástur dedicáronse al diseñu; Manolo Méndez, a la enseñanza; Pedro Pablo, direutor de periódicu, coló d’Asturies... Magar que caltuvimos l’amistá, unos siguimos collacios y otros escaecimos de venos. Prestónos pola vida tornar a xuntanos nesta (mini)esposición antolóxica.

Tres la muestra que se pue visitar hasta esti xueves nel Edificiu Históricu de la Universidá, ¿hai dalgún plan conxuntu?

Al calor del alcuentru surdíen idees. Si nun tábemos borrachos, quedamos dafechu en facer una tertulia pa falar de la situación de les artes y la cultura n’Asturies.

¿Cómo ve vusté la situación de la escena artística asturiana anguaño?

La nomada institución arte quebró. El panorama artísticu oficial ta arrasao. Los grandes contenedores museísticos –Llaboral o Niemeyer– son inútiles y vese a les clares la megalomanía y corrupción de los xestores políticos d’estes burbuyes culturales. Los qu’escluyeron tantes artes asturianes caen embaxo; tornen a la realidá. Les estructures culturales tán caduques, pero los artistes tamos activos y vivos. Ta camudando’l paradigma social, y del artista solitariu tornamos otra vegada a proyeutos de coworking; de trabayu en comuña. Personalmente, toi ilusionáu en Paraíso Local Creativo, soi el miembru más vieyu d’esti nuevu coleutivu. Acasu la esperiencia d’ABRA tenga xacíu y puea tender una ponte xeneracional.

¿En qué ta trabayando anguaño?

AVRVM ye un proyeutu coleutivu del espaciu Paraíso, que toi coordinando con Adolfo Manzano y Cármen González, na defensa’l patrimoniu natural, hestóricu y humanu que menacia la especulación de la multinacional Astur Gold. Fice una intervención land art, pintando d’oru un tueru d’árbol secu de 7 metros nel camín a la mina romana de Salave. El 26 de mayu fletamos un tren, percorrimos el llugar colos vecinos y armé aición d’El Bardu Errante. Tenemos agora una esposición reivindicativa na galería Lola Orato (cai Oscura 12, Uviéu). El proyeutu ta abiertu: invitamos a los/es artistes compañeros/es a llevar obra a esa galería pa l’amuesa que vamos facer en Tapia, pel branu, cola Plataforma Oro no. Creo yo qu’esta llinia d’arte social dalgo tien que ver colos tiempos d’ABRA.

Na semeya, Pedro Pablo Alonso, Ánxel Nava, Manolo Méndez, María Jesús Rodríguez, Emiliano Alonso, Hugo O'Donnell y Ástur Paredes na inauguración de la muestra. Nella falta Vicente Pastor, que nun pudo desplazase a Uviéu dende Viena.

La esposición va tar abierta al públicu hasta'l xueves na sala d’esposición del Centru Cultural LAUDEO (Edificiu Históricu de la Universidá d'Uviéu) n’horariu de 11 a 14 hores y de 17 a 20.30 hores.