Conceyu Abiertu por Llangréu refuga l'entamu d'una 'Feria de abril' "supuestamente andaluza" en Sama

La celebración en Sama d'una 'Feria de abril' "supuestamente andaluza" ye considerada por Conceyu Abiertu por Llangréu como "un atentáu nuevu a la cultura ya identidá llangreana y polo tanto asturiana". El festexu va celebrase ente los díes 11 y 14 d'abril nel Parque Dorado y cunta cola collaboración activa del Ayuntamientu de Llangréu y del Ayuntamientu de Xixón, "lo que nun tien muncha lóxica".

"El programa d'esti eventu pa ser una festividá típica andaluza tien delles actividaes totalmente ayenes a esa realidá y ta mui marcáu por prexuicios y topicazos. Creemos que cualesquier andaluz consciente de la so identidá sintiría vergoña al ver tal espectáculo y tamién creemos qu'hai otres cultures sobre les que realizar feries sacantes l'andaluza. Nuevamente Sama ye escenariu d'un eventu d'esti tipu ensín esistir realmente una demanda d'ello ente la vecindá de Llangréu", afirmen dende la plataforma d'eleutores. "Dende la nuesa formación conceyil creemos qu'esti tipu d'eventos respuenden a un enfotu consciente dende les alministraciones remanaes polos partíos españolistes n'Asturies d'imponer una cultura ayena y esborriar les nueses señes d'identidá propies. Hai un interés n'Asturies en meter a calzador esti tipu de feries andaluces y al empar la nuesa identidá, llingua o cultura son reprimíos día tres día pol poder alministrativu y mediáticu, nun collaborando con ello en nengún casu sinon poniendo pilancos", añaden.

Por últimu, Conceyu Abiertu por Llangréu reclama más inversión y compromisu cola nuesa cultura propia que pasu ente pasu ta siendo desaniciada en pro de les formes culturales de les élites polítiques y económiques. Creemos tamién que instrumentalizar la cultura andaluza como instrumentu ideolóxicu pa ufrir en tol Estáu Español un modelu cultural 'únicu, grande y llibre' ye una vergoña y una idega mui franquista".