Compromisu considera que'l costu de cumplir l'oxetivu del déficit ta siendo catastrófico p’Asturies

|

Daniel Fernández, voceru nacional de Compromisu por Asturies, sollerta de la necesidá de que'l Gobiernu plantege una política económica propia frente a la obsesión pol déficit del gobiernu de Rajoy, porque les resultancies tán siendo catastróficos p’Asturies. Compromisu destaca que “el cumplimientu del déficit impuestu pol gobiernu de Rajoy, y que'l gobiernu del PSOE asturianu cumplió a raxatabla, con una ausencia d'una política económica propia p’Asturies, más allá del meru siguidismu de la política económica del gobiernu central, ta teniendo unes consecuencies catastrófiques pa la nuesa economía real”.

Asina, pa la federación de partío “los datos de qu’Asturies ye la comunidá autónoma na que más se fundió'l PIB nel 2013, con un 2,1por cientu, casi'l doble de la media estatal que ye del 1,2 por cientu, o que l'índiz de producción industrial baxara un 8,6 por cientu esti febreru al respective de va un añu, mientres a nivel estatal xube un 3,1por cientu, dexen bien a les clares los efectos del austericidio que'l gobiernu socialista ta provocando, amosándose como l'alumnu más aventayáu del gobiernu central”. "Ye hora de falar del costu que tán suponiendo les polítiques de retayos y d'axuste del déficit, cuando hasta los organismos económicos internacionales qu'abanderaron estes midíes, reconocen que nun supieron prever l'impactu negativu d'esta política económica”.

Fernández pide al Gobiernu una política económica propia p’Asturies, onde prime la creación d'empléu pa dir absorbiendo los más de 100.000 paraes y paraos que sufrimos, y apostando pola protección social de los que más soporten "esta estafa que llamen crisis”, pa lo que  “ye necesario abandonar les polítiques económiques que la Troika impón a Madrid, y que dende Madrid imponen a Asturies”.

 

Contador Estadistiques