Nel estudiu de la evolución cultural d'Asturies, les práctiques de la caza, la pesca y la cueya apaecen na basa de toles sos formes d'organización económica y social dende la Prehestoria. Fasta va bien poco, estes actividaes foron una parte cuásique vital na economía familiar de subsistencia, dedicándose munches vegaes ún o más miembros de la familia a cazar animales nel monte o pescar nel ríu. Y ye que los recursos cinexéticos y fluviales foron tan abondosos n'otres dómines que, nel casu de delles especies como'l xabaril, el llobu,1'osu, la foína, los melandros, el llobu cerval, les Ilóndrigues, los raposos, etc., llegaron a ser consideraes alimañes (el Diccionariu-Xeográficu Estadísticu-Hestóricu de Pascual Madoz -mediaos del sieglu XIX- fala d'osos en ventiún conceyos, y de llobos en tou'1 territoriu, que llegaben hasta les playes de Llanes). Poro, la profesión d'alimañeru taba bien vista, hasta'1 puntu de que yeren recompensaos pol so llabor con garduños y llazos, siendo'1 arte más espectacular el de los caleyos, chorcos o pozobales pa cazar llobos, o el pezugo pa cazar osos que cita'l Diccionariu de Madoz n'Armenande (Allande). Pola so topografía, Asturies ye un País de ríos de tolos andares y traces, pue dicise que nun hai aldega que nun tenga ríu o regatu que-y seya propiu. D'ellos sacábense salmones, reos, truches, llamprees, con bayura d'artes: dende la caña de cañavera fasta les masives de la garrafa, el paradexu, el tresmallu, el refuelle, el ñasu o trullón, etc. o dir pela nueche "a la rellumera, con candiles. Los salmones, reis anguañu de los nuesos ríos, foron tan abondosos que se garraben coles fisgues toles temporaes, llegando a faese fuelgues nes obres del ferrocarril a Lleón, nos caberos años del XIX, por tar los obreros "fartos" de xintar y cenar salmón. La cueya d'ablanes y nueces, sobre tou, tuvo muncha importancia económica; la mayor parte de la producción yera mercada por mayoristes que percorríen los pueblos pa esportala depués pelos puertos, sobre tou a Inglaterra; les castañes yeren destinaes al consumu domésticu; y los montes comuñales ufiertaben la madera que facía falta pa les industries rústiques, lleñe pa la casa, y al traviés del drechu de poznera (los árboles -el vuelu- son propiedá del que los planta y la tierra -el suelu- sigue siendo comuñal), espaciu pa es- pardir castañeos y frutales.