La tasa interañal de paru n’ochobre n’Asturies, la más alta del Estáu al medrar un 20,81 por cientu

El paru medró n’ochobre n’Asturies un 20,81 por cientu en comparanza col mesmu mes del añu pasáu, casi el doble de la media estatal: 10,84 por cientu. Ésta ye la tasa más alta del Estáu y dexa la cifra total de desemplegaos en 103.384.

Tres Asturies, el territoriu onde más medró el paru nos doce meses últimos foi Euskadi, con un 17,87 por cientu, y Ceuta, con un 17,75 por cientu. Mentes, les comunidaes que presenten meyores cifres son les Illes Balears, con un 0,26 por cientu al sumar 227 desemplegaos más; Catalunya, con un 5 por cientu; y la Comunitat Valenciana, con un 9 por cientu. Nesti tiempu, el númberu absolutu de paraos medró en 472.595 persones nel Estáu, 17.808 nel nuesu país.

Si comparamos les cifres d’ochobre col del mes anterior, el desemplegu creció n’Asturies un 4,29 por cientu, esto ye, en 4.249 persones pa sumar un total 103.384. Esti porcentaxe tamién casi dobla la media estatal, que se sitúa nel 2,73 por cientu al medrar en 128.242 desemplegaos y situar el total en 4.883.521. Les úniques comunidaes que presenten datos positivos son Canarias (-0,34 por cientu) y la Comunitat Valenciana (-0,15 por cientu). Por contra, los territorios onde más medró’l paru foron les Illes Balears (12,20 por cientu), Castilla-La Mancha (7,02 por cientu) y Cantabria (6,14 por cientu).