El Gobiernu asturianu acusa a Rajoy de falta de compromisu cola minería

|
El Gobiernu asturianu acusa al Executivu de Rajoy de llevar a la minería a una situación insostenible

El conseyeru d’Empléu, Industria y Turismu, Francisco Blanco, criticó güei la falta de compromisu dafechu del Gobiernu de Rajoy col carbón y los valles mineros,

Esta falta de compromisu, según  el conseyeru, vien desmostrao pol refugue del executivu español d'unviar a la Unión Europea la propuesta sobre’l mecanismu d’incentivu al consumu de carbón autóctono tres la emisión del informe negativu de la Comisión Nacional de los Mercaos y la Competencia (CNMC).

Blanco sorrayó que’l Gobiernu central vuelve incumplir los compromisos adquiríos nel documentu Marcu d’actuación pa la minería del carbón y les comarques mineres nel periodu 2013-2018. Nesti sentíu, sorrayó qu’estos incumplimientos llevaron al sector a una situación cuasimente insostenible, porque falten mecanismos que dean prioridá al consumu de carbón nacional poles centrales térmiques. 

El Ministeriu d’Industria, Enerxía y Turismu propunxo en mayu del 2015 una orde ministerial qu’habilitaba ayudes pa la implantación de sistemes de desnitrificación nes centrales térmiques asociaes a determinaos compromisos de compra de carbón nacional por estes centrales.

Esta propuesta informóse de forma negativa pola CNMC con dellos argumentos rellacionaos con que los incentivos propuestos podríen considerase como ayudes d’Estáu y non como fórmula de pagu por capacidá o como un sofitu destináu a aumentar el nivel de protección del mediu ambiente.

Nesti sentíu, el conseyeru refertó que la decisión del Ministeriu d’Industria de nun tramitar la propuesta ante la UE nun fora acompañada d’una alternativa nueva pa dar cumplimientu a los sos compromisos col carbón, volviendo dexar al sector nuna situación bien precaria.

Otra manera, Francisco Blanco recordó que, anque la propuesta nun aseguraba un buecu térmicu pal carbón nacional equivalente al 7,5% del mix de xeneración en términos anuales, como recueye’l documentu marcu 2013-2018, sí implicaba, polo menos, un sofitu a la implementación de midíes de corrección ambiental nes térmiques y, polo tanto, garantizaba la continuidá d’estes instalaciones.

El titular d’Industria incidió en que’l Gobiernu español nun articuló nengún mecanismu alternativu al de restricciones por garantía de suministru, vixente hasta’l 31 d’avientu del 2014, que dexaba dar prioridá al consumu de carbón estrayíu equí, y tampoco nun diseñó iniciativa dalguna que dexe habilitar un buecu térmicu pa esti carbón nel sistema eléctricu equivalente al 7,5 % del mix.

Imaxe d'archivu autor xabeldiz con llicencia Creative Commons Attribution 2.0 Generic.

Contador Estadistiques