Nació n’Uviéu en 1943. Pasó la infancia y la mocedá nun ambiente rural, nel conceyu d’Aller, al que va dedicar bona parte de la so obra de divulgación etnográfica y recreación lliteraria. Llicenciáu en Medicina pola Universidá de Granada, doctoróse na d’Uviéu con una tesis sobre la medicina popular asturiana. Ye autor de diveros trabayos sobre etnografía y folklor.

   Como narrador en llingua asturiana tien publicaos los siguientes llibros: Coses d’osos (ocho cuentos alleranos) (1993), Fito nel país de los gorretinos (1994), Les vaques tamién piensen y sienten (1996), Maldaes de llobos (1996) y , Lau, la mia perra fiel (1998) y Gene : la xana que quiso ser madre (1998). En toos ellos, Joaquín Fernández, parte d’un trabayu previu de recopilación de narraciones orales pa recreales darréu lliterariamente. Los sos llibros tienen un gran interés p’averar a los llectores asturianos actuales, sobremanera a los más nuevos, a una realidá cultural ya perdía na so alcordanza na mayoría de los casos.