Foi va tres años, el 27 de febrero de 1998, cuando la Xunta Xeneral del Principáu votó la redacción final de lo que depués diba ser la Llei Orgánica 1/1999 de reforma del Estatutu d'Autonomía d'Asturies. Nos meses de meses de negociaciones que precedieron la votación l'únicu puntu de desalcuentru ente los partíos parllamentarios foi'l tratamientu que se-y había de dar a la llingua asturiana na redacción definitiva del artículu cuartu. Paralelamente la demanda social a favor de la oficialidá del asturiano foi ganando puxu. Viéronse daquella les mayores amueses d'esmolecimientu popular pol futuru del idioma n'Asturies: Manifestaciones multitudinaries, acampaes, concentraciones, apaición de plataformes cíviques por Asturies y pola oficialidá, posicionamientu de partíos y sindicatos, espublizamientu de manifiestos, ...
"Equí va cometese un atentáu contra la llingua asturiana". La Xunta pola Defensa de la Llingua Asturiana denunciaba con estes palabres les intenciones del PSOE y del PP de zarrar la reforma del estatutu d'espaldes al pueblu asturianu.
Nun valió de nada, la debilidá parllamentaria del PP y l'arrogancia del PSOE lleváronlos a presentar y aprobar un estatutu que nun avanzaba nel reconocimientu del derechu de los asturianos a usar llibremente la so llingua y nun ser descriminaos por mor d'ello. Escondíos tres de mázcares de demócrates, apelando cínicamente a la voluntariedá, al respetu, a la protección ... malpenes 38 individuos circunstancialmente asitiaos na Xunta Xeneral, marcaos pol odiu que-y teníen a tolo asturiano y pola vergüenza de ser ellos mesmos asturianos, decíen representar, desoyendo les reclamaciones de consensu y despreciando'l votu en contra del restu de los partíos parllamentarios. D'aquel tiempu ye tamién la Lei d'Usu y Promoción del Asturiano, frutu de la necesidá d'un PP en minoría na Xunta Xeneral y del oportunismu d'un PAS inoportunu xugando al posibilismu, que nos quixeron dar por empara y que yá demostró ser papel moyao en más d'una ocasión.
"¡Ensin oficialidá, l'estatutu ye puxarra!", dicíemos nuna de tantes manifestaciones pa pidir un estatutu dignu. La condición de non-oficial que padez el nuesu idioma nun ye'l so estáu natural, nun ye l'estáu natural de nenguna llingua. Ye una condición inxusta que se-y impunxo al asturiano nel primer estatutu d'autonomía y que la reforma de 1998 nun foi a iguar. La situación del asturiano güei ye frutu d'esa falta d'oficialidá. Asina, el Conseyu d'Universidaes sigue negándo-y a la Universidá Asturiana la creación de la Llicenciatura en Filoloxía Asturiana por nun reconoce-y entidá llingüística al asturiano. Por eso los curricula del enseñu primariu y secundariu d'Asturies nun incluyen la materia de Llingua Asturiana y nun se formen los escolinos d'Asturies na so llingua materna. Por eso nun hai entá un ente públicu asturianu de radio y televisión, que tenga ente los sos obxectivos la protección y la promoción de la llingua propia d'Asturies. Por eso la toponimia tradicional de los nuesos llugares sigue sufriendo un procesu de corrompimientu ... Por eso en definitiva, ta desapaeciendo esa ayalga cultural milenaria, l'idioma asturianu.
"L'estatutu del PSOE y del PP marxina y reprime la llingua asturiana", foi la nuesa conclusión al saber que diba caltenese'l mesmu artículu cuartu que llevaba quince años amosándose insuficiente. Ta desllexitimáu el conteníu porque nun reconoz la igualdá de tolos asturianos, ta desllexitimáu'l mou en que foi aprobáu'l testu reformáu, tan desllexitimaos incluso dellos axentes de la reforma, aquellos diputaos qu'afirmaben votar en contra de la oficialidá por fidelidá a un partíu, a un programa y a unos electores y que nun duldaron en traicionalos poco depués. Na Xunta pola Defensa de la Llingua Asturiana nun queremos dexar pasar esti tercer aniversariu d'aquella impostura ensin denunciar otra vegada que'l conflictu llingüísticu sigue abiertu n'Asturies. Volvemos afirmar que la oficialidá ye l'únicu marcu llegal posible pa la dignificación y la recuperación de la nuesa llingua, l'únicu que va valir pa garantizar la igualdá de derechos pa los asturfalantes. L'Estatutu d'Autonomía d'Asturies nun tien venti años y yá pasó tres reformes. La so forma actual nun puede ser definitiva: la qu'aspira a ser la llei cimera de los asturianos nun va tar completa mentres nun reconoza la oficialidá del asturiano.

Xunta pola Defensa de la Llingua Asturiana, 27 de febrero de 2001