Entrugues y Rempuestes más Comunes

Estes son les entrugues más comunes que faen al proyeutu de Mozilla n'asturianu. Si tas más interesáu y quies lleer tola información al rodiu de Mozilla, pues echar un vistazu a la versión inglesa.

¿Por qué se llama Mozilla?

El nome de Mozilla vien del proyeutu qu’entamaren un grupu de programadores pa iguar, a mediaos de los 90, un navegador más modernu y que furrulase coles fueyes web más modernes, que d’aquella entamaben a poner semeyes y gráficos, lo que facía una cosa mui complicada. Esti proyeutu dio llugar al Netscape Communicator, qu’acabó col únicu navegador qu’esistía entós, el Mosaicu, nel que se basa l’actual Internet Explorer.

¿Por qué sal esi llargatu?

El motor que tá detrás de Mozilla y permite interpretar les señales de ceros y unos que lleguen d’internet, y convertilos en fueyes per guapes, nómase Gecko (dragón), y convirtióse na mascota del proyeutu. Esi motor ye'l que furrula detrás de los navegadores de los proveedores d'accesu a internet más grandes del mundu: AOL y Compuserve. Otres compañíes tan trabayando pa qu'esta teunoloxía tea afayadiza n'otres plataformes, como teléfonos móviles, consoles de videoxuegos,...

¿Por qué hai tantes versiones de Mozilla?

El navegador Mozilla ta siempre evolucionando pa ufiertar la meyor calidá de navegación, y dar rempuesta a les nueves necesidaes de conteníu web. Pa Mayu o Xunu del añu 2002 va sacáse un navegador con unos estándares de calidá predeterminaos, y esa versión va llamase Mozilla 1.0. Nel camín, programadores, tornadores, revisores y supervisores faen cambios día a día, 24 hores al día (hai grupos trabayando en tolos continentes). Tolos cambios nuevos mándase a una base de datos centralizada, y tolos díes pela mañana, un grupu de supervisores mira que con tolos cambios que la xente apurrió, el programa siga furrulando meyor o igual que’l día anterior. Esa versión ye la que se llama "la de nueche" (nightly), y tol mundu entama a trabayar cola nueva versión pa meyorar el códigu. De xemes en cuandu, daquién mete la pata y fai un cambiu que fraya’l programa, y delles utilidaes dexen de furrular. Entós mírase cual ye’l problema, cuéyese la versión del día anterior, y métense tolos cambios menos el qu’orixinó l’error. Cada cincu selmanes sácase una versión que furrula bien, ye mui estable, y ye lo que se llama un hitu (milestone). Estes versiones per estables son les que son afayadices n’asturianu, y fáinse públiques pa que la xente les use y comente problemes, soxerencies, y tolos equipos puedan trabayar p’arreglear esos problemes. En sacando la versión 1.0, el proyeutu nun va dexar d'esposigar. Mientres el motor que mueve les grandes multinacionales pa meyorar el so productu ye pa vendelu y sacar más perres, el de los proyeutos de códigu abiertu ye l'enfotu de meyorar una ferramienta o adautala a les nueves necesidaes. Aunque estos proyeutos suelen ser más llentos que los desendolcaos poles grandes compañíes, tienen la ventaya de que siempre hai xente dispuesta a meyorar el productu, y más tarde o más temprano apaez un productu que supera a cualquiera fechu por una compañía.


¿Por qué facer una versión n’asturianu?

Pa suplir la demanda xorreciente de programes n’asturianu pol mayor númberu d’usuarios d’ordenador que falen esta llingua. Esta demanda vien atopándose cola falta d’interés y responsabilidá de les autoridaes competentes. Ente los llogros d’esti proyeutu nun ta sólo l’asoleyamientu del primer navegador n’asturianu dafechu, si non que fizo granible l’aceutación pol comité de la ISO 639-2 del asturianu (ast) como llingua propia d’usu n’internet. L’aceutación del asturianu nun tuvo mayores problemes, al atopase más de 100 llibros n’asturianu na Biblioteca del Congresu d’Estaos Xuníos, que ye la sede de la autoridá ISO 639-2. La demanda del navegador n'asturianu en pruebes ye de más de 500 descargues al mes según datos oficiales del proyeutu mozilla (www.mozilla.org). Sosprendentemente, esta demanda ye muncho mayor que pa otres llingües con mayor númberu de falantes, como'l griegu, escocés o gallegu.


¿Hai más proyeutos de códigu abiertu que permitan tornar programes n’asturianu?

Sí. Hai muncha xente trabayando n’otros programes de códigu abiertu. La Xunión Europea recomienda l’usu de programes de códigu abiertu por seguridá, y pa defender la privacidá y evitar l’espionaxe. Ente los proyeutos más conocíos tal sistema operativu Linux. Un sistema operativo per estable cada día más emplegáu, y el motorín que ta detrás de munchos servidores d’internet y que permite que tean furrulando 24 hores al día, siete díes a la selmana. Linux pue tornáse a cualquier llingua, y yá hai un grupu trabayando nel asturianu. Otru proyeutu interesante ye OpenOffice.org, que trata de facer un paquete similar al Office de Microsoft, pero de códigu abiertu y de baldre. Esti proyeutu tamién permite la torna a otres llingües. OpenPGP ye un proyeutu de códigu abiertu del famosu programa d’encriptación PGP, que permite la encriptación de ficheros, o del corréu lletrónicu pa que nun lu llean terceres persones, gobiernos o empreses. Hai otros programes que nun son de códigu abiertu, pero que tan abiertos tornes a otres llingües, como WinRAR, que yá ta afayadizu n’asturianu.