Programes N'Asturianu

N'esta fueya vamos dir espublizando programes informáticos y gabitos pal ordenador n'asturianu, sofitar la torna d'otros programes, y ufiertar ferramientes pa la torna. Pa dellos programes va sofitáse un soporte téunicu, y encamiéntase a la xente que les soxerencies les faiga nel tablón d'anuncies de llingua asturiana.

Netscape ye'l navegador más conocíu, xunto al Internet Explorer. La cabera versión de Netscape, 6.2, basada en Mozilla 0.9.4, ufiértate un navegador per rápidu y que cumple tolos estándares d'internet. La versión qu'ufiertamos ye la más completa, col Navegador, Corréu y Noticies, Llibreta de Señes, Iguador de fueyes web y el programa Instant Messenger pa charrar.

Mozilla ye’l navegador más modernu y rápidu d’anguañu, y l’únicu que cumple colos estándares d’internet especificaos pol www.w3.org . Mozilla ye un navegador de códigu abiertu nel qu’andechen permunchos voluntarios ya informáticos de delles empreses col enfotu d’algamar un navegador modernu, rápidu, y capaz d’adautase a les nueves necesidaes de los usuarios d’internet. Mozilla ye’l nome del proyeutu y del navegador, pero esti códigu ye afayadizu pa qu’otres empreses privaes desendolquen los sos navegadores cola so marca, como Netscape 6 o IBM, ente otres. L'alcuerdu ente AOL y Sony pa desendolcar xuntos les futures Playstations paez que fairá de Mozilla'l navegador de Playstation

WinRAR ye’l programa de compresión de ficheros más popular n’internet. Esta utilidá ufierta la posibilidá d’abrir y desempaquetar los archivos comprimidos (.rar, .zip., .tar.gz, ...) y de comprimir ficheros a formatu .rar (más potente que’l .zip), o a .zip (más popular). La mayor ventaxa de WinRAR ye la capacidá de comprimir ficheros pergrandes a ficheros más pequeñinos, faciendo más afayadiza la descarga por internet de películes de DVD en trozos más pequeños y fácilmente descargables. Tamién ye perútil pa esmenuzar ficheros grandes n’otros más pequeños que pueden grabase en discos de 1.44 Mb pa llevar d’un ordenador a otru. Otra de les novedades de WinRAR ye la opción d’amestar un módulu SFX a cualquier ficheru comprimidu, faciendo a esi ficheru auto-descomprimible pa xente que nun tenga’l programa.

Ye’l programa más famosu d’intercambiu de cancios nel formatu MP3. La idega ye percenciella: tu entrúgues-y al servidor de Napster por un canciu, cantante o grupu; el servidor gueta na so base de datos si alguna de les persones que tan coneutaes n’esi intre tien esi canciu; y al final el servidor date una llista de xente colos cancios que tabes guetando. Darréu descargues los cancios que más te presten. Les grandes multinacionales de la música tan poniendo delles trabes llegales al intercambiu de cancios emplegando Napster.

La xeneración de versiones n’asturianu de programes informáticos fai difícil atopar la meyor pallabra n’asturianu pa esi conceutu, bien pola novedá, bien pol númberu de posibilidaes qu’ufierta la nuesa llingua. Col finxu de facilitar la torna d’otros programes, ufiertamos esta collecha de vocabulariu informáticu n’inglés cola correspondiente torna n’asturianu.