La quinta formación más votada n’Asturies nes xenerales pasaes con 1.727 votos, Los Verdes-Grupo Verde (LV-GV), nun va poder presentase a les eleiciones del 20-P. El partíu denunció a ún de los sos afiliaos por boicotiar la candidatura.
La Conseyería d’Agroganadería y Recursos Autóctonos fixo públicu’l borrador de la normativa de pesca del 2012, que tien el refugu de los ecoloxistes. La propuesta amplía’l periodu de pesca con muerte del salmón y los cupos por pescador.
El Conseyu de Gobiernu autorizó esti miércoles la financiación de la convocatoria de concesión de subvenciones a los conceyos d'Asturies pa la execución del programa Salariu Mozu. L’importe total previstu asciende a once millones d’euros.
El conseyeru d’Economía y Emplegu, José Manuel Rivero, llamó esti martes a la reflexón sobre los motivos que lleven al aumentu nel país de les víctimes mortales n’accidentes llaborales. No que va d’añu morrieron 25 persones.
Arturu Xosé Bermeyu encabeza la llista d’Andecha Astur al Congresu, mentes que María Dolores Suárez Vallina ye la candidata de la formación al Senáu. Los nacionalistes algamaron 1.300 firmes pa poder presentase a les eleiciones.
Emilio Marcos Vallaure señaló na Comisión de Cultura y Deporte de la Xunta que “nun pasa nada por que’l Niemeyer zarre si val pa que salga reforzáu”. El conseyeru compadeció a pidimientu del PP pa esplicar la situación del centru cultural.
La falta de lluvies n’ochobre y en gran parte de setiembre llevó a la Confederación Hidrográfica del Cantábricu (CHC) a activar, en fase de prealerta, el Plan Especial de Sequía n’Asturies. Lugo y Cantabria tán na mesma situación.
L’arrenuncia del Bloque, UNA y Unión URAS-PAS de participar nes eleiciones del 20-P dexen a Andecha Astur como la única formación asturianista que va dar el pasu de presentase a les xenerales. El llunes tien qu’entregar 989 avales pa ello.
Coincidiendo cola llegada de les marches indignaes a Bruseles, esti sábadu va celebrase una xornada global de protesta en más de 600 ciudaes de 60 estaos. Mieres va acoyer la manifestación asturiana y delles actividaes alredor d’ella.
Del vienres al domingu, 16 establecimientos hosteleros de Sotrondio, Blimea y L’Entregu van ufrir pinchos y tapes a un preciu de 1,5 euros. Trátase del concursu ‘Samartín del Pinchu 2011’, eventu que tien como llingua vehicular l’asturianu.
Un 58 por cientu de los usuarios d’Asturies.com señala que’l discursu de Vallaure sobre l’asturianu, nel qu’anunció un Plan de Normalización, tresmite-y optimismu. Un 27 por cientu diz que les pallabres del conseyeru nun-y convencen.
Francisco Álvarez-Cascos aseguró que los recortes na RTPA "nun son pa suprimir emplegu, sinón pa dexar al sector audiovisual que recupere la senda del emplegu". UXT impugnó la decisión del Gobiernu ante'l TSXA.
La catedrática de Derechu Internacional Públicu, Paz Andrés, anunció esti martes la so decisión de presentase otra vuelta a les eleiciones al Rectoráu de la Universidá d'Uviéu. D'esta forma va volver a competir por esti cargu con Vicente Gotor.
Llangréu va ser sede del DMR 2011 los díes 21 y 22 d'esti mes col propósitu de facer alcordanza de la Revolución d'ochobre del 34. El sábadu, en Sama, va celebrase'l tradicional conciertu, pal que yá tán confirmaos Escuela de Odio y IRA.
Unidá Nacionalista Asturiana (UNA) asoleyó'l sábadu un comunicáu pa esplicar les razones que lleven a la formación a nun presentase a les xenerales. Los nacionalistes quieren "priorizar la construcción d'un espaciu políticu asturianu".
La xunta nacional del Bloque por Asturies celebrada’l xueves n’Uviéu decidió, amás de nun acudir a les eleiciones del 20-P, una restructuración de la so direición. Manuel Benayas y Nuria Rodríguez garren agora la portavocía de la formación.
La militancia d’Unidá Nacionalista Asturiana (UNA) decidió nun conceyu abiertu nun acudir a les xenerales del 20-P pa siguir trabayando nel proyeutu de xuntanza entamáu xunto col Bloque. El sociu d’UNA va decidir esti xueves la so postura.
El IV Concursu-Esposición de Gochu Asturcelta que tuvo llugar el sábadu en Santolaya foi un ésitu de públicu. Cientos de persones averáronse al recintu ferial pa ver a los meyores exemplares d’esta raza autóctona en procesu de recuperación.
Nel aconceyamientu de la Rede Ibérica de la Mázcara, celebrada’l sábadu en Zamora, confirmóse que’l Muséu del Pueblu d’Asturies va acoyer una Esposición de la Mázcara Ibérica. Ésta va ser d’envergadura y va tener llugar en branu.
Miguel Ángel San Miguel y Rafael Palacios, integrantes de la II Flota de la Llibertá, van protagonizar esti martes el primer alderique d’esti cursu de la Tertulia Cultural Pachín de Melás. Los dos activistes van falar de la situación de Palestina.
