|
Asturies.com Radio
Emite les 24 hores del día una esbilla de la meyor música que se fai n'Asturies y programes divulgativos sobre la nuestra historia y cultura.
Canal Independiente
Emisión 24 hores dedicada a la música independiente pop y rock fecha n'Asturies.
|
|
|
Entama
Asturies.com Radio Canal Independiente
23/11/05 La emisión d'Asturies.com Radio entama güei una
nueva esperiencia al amestar a la canal
principal de la emisora una
nueva canal
temática centrada na música independiente asturiana.
Asturies.com Radio Canal Independiente ye'l nome d'esta nueva
emisión específica que va funcionar dende güei paralelamente
a la emisión principal. Dedicada a la musica independiente asturiana de
pop y rock, Asturies.com
Radio Canal Independiente ufierta la obra de grupos d'últimos de los
80 nos qu'entamaben los precursores de lo que depues se conocio como
Xixón Sound hasta los grupos que yá nos años 90
desenrollaron una escena de música independiente n'Asturies, de los que
munchos siguen güei na actualidá independiente de la música
estatal.
Nomes de grupos yá ensin actividá como Eliminator Jr o
Yellowfinn y música d'otros que siguen na escena como Manta Ray, Pauline
en la Playa o Nosoträsh igüen la programación d'esta canal na
que van poder sentise temes y cantares poco difundíos nel so día
o incluso escosaos dafechu en mercáu y que son dificiles d'atopar hasta
nes redes P2P d'intercambiu de ficheros.
La esperiencia d'Asturies.com
Radio Canal Independiente ye la primera d'una serie de canales
temátiques que van amestase d'agora en p'alantre y de manera progresiva
a la ufierta d'Asturies.com Radio,
siempre col oxetivu de dar a conocer a un públicu lo más ampliu
posible al traviés d'internet la ufierta cultural asturiana en tolos
estilos en que se desarrolla y siempre cola collaboración
tecnolóxica indispensable de la Universidá d'Uviéu y
Telecable.
Fala, n'Asturies.com Radio
05/05/05 La programación d'Asturies.com Radio amiesta dende
güei el cantar "fala" tema qu'asoleyen en comuña
músicos pola oficialidá, Xunta Pola Defensa de la Llingua
Asturiana y la casa de discos L'Aguañaz
El cantar "fala" va distribuyise esti vienres na
manifestación pola oficialidá dientro d'un CD-single abondo
especial col que la Xunta pola Defensa de la Llingua quier facer un nuevu himnu
pa la reivindicación de la oficialidá del asturianu.
Xune Elipe, Fernando Rubio, Javi Rodríguez o Primi Abella, de
"Dixebra" amás de músicos del grupu
"Tarañu" o'l cantautor Toli Morilla participen na
grabación d'esti tema producíu por Sergio Rodríguez,
responsable de los últimos trabayos de Dixebra o La Bandina.
Soníu funky, estribillos rockeros y lletra pegañosa que tresmitee
mensaxes positivos sobre l'asturianu, llamando l'atención sobre la
necesidá d'emplegar la llingua en tolos contestos comunicativos pa
qu'esta nun desapaeza. La intención declarada de los componentes de
"músicos pola oficialidá" ye la de facer un cantar
comercial col enfotu de que se convierta "nel cantar del branu".
Hestories d'indianos
30/04/05 Asturies.com Radio presenta esta selmana una
actualización más na so programación, na que s'enxerten
cuatro programes nuevos. Per una parte, la emigracíon asturiana ye otra
vuelta oxetu de tratamientu na emisión d'Asturies.com Radio, con
programes sobre la figura del emigrante de Cabranes Luis Corripio y la so
aventura en Santo Domingo y sobre la historia del Centru asturianu de Tampa, un
casu curiosu dientro de les colectividaes asturianes n'América que
protagonizó un episodiu "independentista" al esgayase del
yá esistente Centru Español del llugar.
La biografía de los hermanos Ibañez Posada, los famosos
indianos de Colombres, asómase tamién a la nuestra
emisión, na que lo más señalao de la selmana ye'l
paséu que-yos convidamos a dar a los nuestros llectores pel Castru de
Cellagú, del que facemos un recorríu pela so historia antigua, y
tamién pela moderna, al ser el de Cellagú ún de los casos
más sangrantes de destrucción del patrimoniu asturianu.
Entrar a Asturies.com Radio
Del Rei Alfonso II a la
tonada d'Anabel Santiago
23/04/05 Asturies.com Radio presenta güei una nueva
actualización con programes informativos sobre la historia d'Asturies.
Una biografía del Rei Alfonso II, el que tuvo'l reináu más
llargu na historia de la monarquía asturiana y dos especiales que traten
la historia de dos monumentos asturianos que tuvieron suerte distinta son los
puntos fuertes de la programación de la selmana. D'una parte la Catedral
d'Uviéu, el monumentu más famososu d'Asturies, y d'otru la Ilesia
de Corao en Cangues d'Onís, primer tumba del Rei Pelayo y ún de
los casos d'abandonu más llaceriosos del nuestru patrimoniu. Na estaya
musical convidamos a los nuestros llectores a conocer meyor la trayectoria
d'Anabel Santiago, la voz del conceyu de Casu qu'a los sos ventipocos
años ye una de les autoridaes de la tonada asturiana y que
remocicó'l xéneru col so discu "Al son de la lluna".
Entrar a la emisión
d'Asturies.com Radio
El Xeneral Riego allégase a la
emisión
18/03/05 Asturies.com Radio sigue cola so actualización de
coneníos amestando programes divulgativos a la so programación
musical. Esta selmana, dedíquense espacios a trés personaxes
asturianos d'estremada condición social y trescendencia
histórica. La biografía del Xeneral Riego va llevar al oyente
hasta l'aniciu del sieglu XIX y la lucha ente lliberales y absolutistes, onde
l'héroe de Tuña tuvo un papel destacáu enforma, mientres
que la particular hestoria del Rei de la Patagonia, ún de los indianos
asturianos que ficieron mayor fortuna nel conu sur contrapónse dafechu a
la del "Señor de Terrero" ún de los últimos
terratenientes y de los que meyor representaron la mentalidá del antiguu
réxime nuna Asturies que taba metiéndose pela
industrialización.
Pa sentir estos y otros programes de la emisión de
Radio d'Asturies.com, lo mesmo que
la so programación musical, namás ye preciso tener
instaláu el programa Real Player
Audio.
Programación
nueva n'Asturies.com Radio
11/03/05 La emisión de radio d'Asturies.com presenta dende esta
selmana conteníos nuevos que van amestándose a la
programación musical, base pel momentu d'esta estaya del proyectu
comunicativu d'Asturies.com
Amás de la emisión musical y los programes sobre
música que veníen emitiéndose,
Asturies.com Radio
entama una etapa una etapa nueva col enxertamientu na parriya de
programación de los primeros espacios de calter divulgativu, pensaos
sobremanera p'allega-yos una emisión en llingua asturiana a los
asturianos y asturianes na diáspora pero que tamién puen
aporta-yos un meyor conocimientu del país a los oyentes que vivan
n'Asturies. Baxo la etiqueta "conoz Asturies" estes secciones
culturales, d'aprosimadamente trés minutos de duración y que van
renovase selmanalmente, van da-yos a conocer a los nuestros oyentes aspectos
distintos sobre la historia, naturaleza, cultura, monumentos y tradiciones
asturianes.
Los primeros espacios que puen sentise yá n'Asturies.com Radio
fáennos un resume de la historia del Parque Natural de los Picos
d'Europa y avérennos tamién a la biografía del indianu
Iñigo Noriega, que se convertió nun de los empresarios y caciques
más poderosos nel México d'enantes de la revolución. Nun
viaxe a la dómina de la monarquía asturiana, Asturies.com Radio
presenta tamién lo más importante de los monumentos d'El Naranco
y aporta datos pa conocer meyor a Mauregato, el rei más malditu de tola
dinastía asturiana y sobre'l que circulen les lleendes más
estrañes como la del "tributu de les cien moces".
Entama Asturies.com Radio
Día a
día traémoste una selección de música fecha
n’Asturies. Amás vamos dar anuncia de l’actividá
cultural y musical que se desarrolla nel nuestru país.
Esti ye l’aniciu d’un ambiciosu proyectu informativu y
divulgativu nel que lo nuestro va ser protagonista. Tai sollertes a los
conteníos que vamos amestar bien llueu.
Si nun nos pues sentir igual que que nun ties descargáu'l plug-in
del RealOne Player. Dende equí pues
facelo
Finalmente queremos convidate a que seyas protagonista d’esti
proyectu de comunicación, aportando les tos suxerencies a esti email:
radio@asturies.com
|
|
 |
¡ ATENCION !
Nun escaezas que pa poder oyir la radio ties que tener instaláu nel to
equipu'l RealOne Player, |
| descargalu equí de
baldre |
|
|