El Secañu y Mejuto llevaron el Samartín del Pinchu

El 'Miko gochu', del Café El Secañu, y el 'Montadín de xampiñón rellenu', de la Sidería Mejuto, llevaron el V Samartín del Pinchu. Vendiéronse 11.355 pinchos, toos col nome n'asturianu.

Esti certame gastronómicu, hermanu de 'Samartín de les Tortielles' que tien llugar en marzu, tien el nuesu idioma como llingua vehicular, pa lo que cuenta col asesoramientu de la Oficina de Normalización Llingüística de Samartín del Rei Aurelio. Entamáu esta fin de selmana pasada por Empresarios y Comerciantes de San Martín del Rey Aurelio (ECOSAM), l'eventu tornó a ser un ésitu, como amuesen los 11.355 pinchos vendíos nos 25 establecimientos participantes nesta edición. El meyor pal xuráu foi'l 'Miko gochu' de la cafetería blimeína El Secañu, mentes que'l 'Montadín de xampiñón rellenu' de la sidrería entreguina Mejuto resultó'l favoritu del públicu. Otra manera, Raúl Rodríguez llevó los 100 euros que se sortiaron ente tolos veceros participantes.

Na semeya, Menalia Menéndez (El Secañu) y Manuel Morán (Mejuto) sostienen los diplomes que-yos certifiquen como vencedores en compañía de Ricardo G. Antuña, direutivo d'ECOSAM.