El Ventolín dedica la so selmana a la llingua asturiana

Esti llunes inaugúrase la XXXV Selmana del Folclor Astur, qu'entama'l Grupu Folclóricu y d'Investigación El Ventolín. Los sierenses preparen una bona riestra d'actividaes a lo llargo de la selmana que van tar dedicaes nesta ocasión a la llingua asturiana. Asina, esta tarde, a les 20 hores, Ana María Cano, presidenta de l'Academia de la Llingua Asturiana (ALLA), va tar presente na sala de cámara del Auditoriu de Siero nun actu nel que'l coleutivu va dar la so insinia de plata a Roberto González-Quevedo, collaborador habitual d'El Ventolín y secretariu de l'ALLA. Amás, van abrise al públicu tres esposiciones, ente les que destaca una entitulada 'La llingua'.

Otres actividaes que van tener llugar a lo llargo de la selmana son un cuentacuentos d'asturianu con Milio'l del Nido (martes 12.30 hores, Plaza de la Casa Conceyu), la representación de 'El candidatu' pol Grupu de Teatru de Carbayín (miércoles 20 hores, Auditoriu), una amuesa audiovisual n'asturianu (xueves 20 hores, Auditoriu) y el festival folclóricu (sábadu 20 hores, Auditoriu).