La VII Carrera L'Asturcón repite esti domingu ruta pel Naranco

Esti domingu va tener llugar la VII Carrera L'Asturcón, segunda prueba puntuable de la Copa d’Asturies de Carreres per Montaña. Les inscripciones tán escosaes, polo que s’espera un ambiente perbonu nesta cita nel Naranco.

L’aniciu de la prueba ta previstu pa les 9.30 hores nel Centru Ecuestre L’Asturcón pa percorrer 28 quilómetros, con un desnivel acumuláu de 2.400 metros, nesta zona d’Uviéu. La ruta va ser la mesma que l’añu anterior, con pasos por pistes de tierra (65 por cientu del total), caleyes (30 por cientu) y asfaltu y formigón (5 por cientu). Según esplica la organización, el grupu de montaña Oxígeno, trátase d’un circuitu poco complicáu téunicamente, ideal pa disfrutar del paisaxe mientres se prautica deporte.

La Carrera L'Asturcón ye la segunda de les cinco que conformen la Copa d’Asturies. Na primera, la Carrera per Montaña Puerta de Munieḷḷos, resultaron ganadores Víctor Fernández Díez y Marta Escudero, dambos del Grupo de Montaña Peña Santa. Na edición del 2013, el vencedor nel Naranco foi José Luis Capitán (Piloña Deporte), mentes qu’Escudero foi la meyor muyer.