Santoveña: “A principios del XIX los homes comiencen a usar el traxe asturianu como traxe identitariu”

|

La conferencia de Fe Santoveña sobre la modernidá y la masculinización na Asturies tradicional dexó pequeña la sala d’actos del Atenéu Obreru de Xixón. Esta conferencia taba integrada dientro de les charres mensuales qu’entama Ástura.

La investigadora de prestixu nel ámbitu de la cultura asturiana, les condiciones de vida, les rellaciones humanes y la evolución de los factores socioculturales na Asturies tradicional, ayudóse de semeyes interesantes pa falar de ‘Paisanos de pantalón largo. Modernidad y masculinización en la Asturies tradicional’. Nella esplicó qu’hebo un tiempu nel qu’había “una costume de retrasase vistíu d’asturianu, pero namái en muyeres y neños. Los homes nun se retraten vistíos d’asturianu porque hai una rellación ente lo tradicional, lo antiguo y lo rústico, que se considera atrasao, mentes que’l pantalón llargu considérase lo moderno, lo industrial y lo que progresa”, una idea que camuda “a principios del sieglu XIX, cuando empiecen a apaecer tarxetes postales con tipos asturianos y los homes yá comiencen a usar el traxe asturianu como traxe identitariu”.

Ésti caltúvose mui bien nel tiempu “dende’l momentu que s’asocia colos gaiteros”, personaxes “apreciaos social y culturalmente”. Por ello, “la vistimienta tradicional masculina nun se perdió, como tampoco nun lo fixo’l mundu de la gaita”, resalta esta llicenciada n’Historia pola Universidá d’Uviéu y n’Antropoloxía Social y Cultural pola UNED, títulos a los qu’hai que sumar dellos másteres. No que respeuta al traxe asturianu tradicional que s’utiliza anguaño, “el de calzón cortu, faxa y montera”, Santoveña apunta que “s’avera bastante a lo que debió de ser la indumentaria popular asturiana a principios del sieglu XIX”.

Na semeya, Santoveña y Amadéu Benavente, vicepresidente d’Ástura.

 

Contador Estadistiques