Sotrondio, Blimea y L’Entregu acueyen esta fin de selmana'l concursu ‘Samartín del Pinchu 2011’

Del vienres al domingu, 16 establecimientos hosteleros de Sotrondio, Blimea y L’Entregu van ufrir pinchos y tapes a un preciu de 1,5 euros. Trátase del concursu ‘Samartín del Pinchu 2011’, eventu que tien como llingua vehicular l’asturianu.
 
Esti concursu de tapes y pinchos ye una perbona escusa p’averase esta fin de selmana a Samartín del Rei Aurelio a improvisar una ruta pel conceyo o facer dalgún de los dos percorríos que propón la organización, Empresarios y Comerciantes de Samartín del Rei Aurelio (ECOSAM): una ente Sotrondio y Blimea, y otra per L’Entregu. Asina, partiendo de Sotrondio, pue aniciase la ruta nel Mesón La Cabaña (‘Secretu ibéricu con praliné de pimentón sobre glaseáu de cebolla al Pedro Ximénez’), continuando en Les Carboneres (‘Vasín de callos con patates’) y en Casa Josefina (‘Melocotón rellenu de marisco’).
 
Yá en Blimea pue facese una parada na Sidrería Crespo’s (‘Tosta de llacón con pistu’) y na Sidrería San Mamés (‘Fayuelos negros con marisco’), pa siguir nel Café Peña Mayor (‘Rollu de bonitu’) y finar nel Café El Secañu (‘Hamburguesina asturiana’). Mentes, la ruta qu’aconseya ECOSAM per L’Entregu entama nel Bar La Güestia (‘Bacaláu al pistu la casa’), pa depués pasar por El Ocho de Chapó (‘Doble de quesu y sollombu al Ocho’) y la Sidrería La Tená (‘Ternasco al sabor del cabrales’). Tres prebar estes delicies, el percorríu pue continuar pola Vinoteca Bakvs (‘Secretu mineru’) y la Sidrería Casa del Pueblo (‘Cruxentes Casa´l Pueblu’) pa, una vegada que se ta cerca del Parque La Llaguna, tirar pa la Vinoteca Domoe (‘Fueyes de Seronda’), la Sidrería El Zamorano (‘Cazuela del mar’), la Sidrería La Laguna del Rio III (‘Montadín mar y tierra’) y la Sidrería El Puente (‘Delicia del Cantábricu’).
 
‘Samartín del Pinchu 2011’, amás de por ufiertar dieciséis delicies a un preciu módicu de 1,5 euros, tamién destaca por ser l’únicu eventu gastronómicu d’esti tipu nel país n’utilizar l’asturianu como llingua vehicular. Los cartelos y los ‘gastromapes’ tán dafechu en llingua asturiana, al igual que’l nome de los pinchos y tapes, gracies al sofitu de la Oficina de Política Llingüística de Samartín del Rei Aurelio.