Gonzali: “Prestaríanos abrir un espaciu a otres cultures y convidar a autores ecuatoguineanos y sefardites"

Xunto col mes de setiembre llega L’Arribada al Antigüu Institutu, llugar onde tán celebrándose estos díes decenes d’actividaes cola cultura autóctono como protagonista. Humberto Gonzali (Figareo, 1961) ye’l coordinador d’esti festival lliterariu.

Yá ta en marcha una edición nueva de L’Arribada.
 
Sí, ye’l sestu añu qu’echa andar L’Arribada, un festival que tien trés estayes: la Vagamar, l’actividá setembrina; la Rolda, que se fai en Xixón a lo llargo tol añu; y Per Asturies, les actividaes que facemos n’otros conceyos. Agora tamos desarrollando la Vagamar y cuatro actos de la Rolda de setiembre, porque pensamos tener bastante actividá tamién nel trimestre próximu dientru la Rolda y tamién de Per Asturies, de la que tuvimos que retrasar un poco la programación pol procesu eleutoral que llevó a qu’hubiera equipos de gobiernu nuevos nos ayuntamientos. Tamos manteniendo contautos con trés conceyos del centru y ún que ta a la vega de la ría de Navia, anque nun quiero anunciar tovía nada hasta nun que tea too confirmao.
 
¿Qué novedaes tien el festival lliterariu esti añu?
 
Lo más importante d’esta edición, nesti marcu de setiembre, ye’l pesu específicu que-y damos a los alderiques; tenemos ocho meses de debate. Pensamos que ye un momentu que se sumen dos coses: un cambiu políticu que tien una trascendencia tamién nel desarrollu d’actividaes culturales, como nun pue ser d’otra forma, y un marcu de crisis económica y nun sé si tamién de crisis d’idees o crisis cultural xunto a ello. Entós vamos analizar dellos xéneros lliterarios: l’estáu actual, tener una visión perspeutiva de lo que se fixo enantes y ánde se pue dir. Tamién falamos d’un aspeutu importante, el de la normalización llingüística nos conceyos, que ye la base del esposigue o non de la llingua y, como nun pue ser d’otra forma, de la lliteratura asturiana.
 
Comentabes enantes sobre la esistencia d’una crisis d’idees. ¿Ye dalgo real?
 
Fálase muncho de qu’hai crisis d’idees. Pienso, y puedo tar equivocáu, que la crisis d’idees correspuende a una forma d’entender la cultura que yá ye vieyo, una cultura que pretende ser universal y prescinde de lo autóctono en demasía… Yo creo qu’esi modelu ta en crisis. Sobre lo otro, siempre dixi que, nel casu concretu d’Asturies, los asturianos y asturianes que se dediquen a la lliteratura y a la cultura amosaron una gran capacidá creativa, a veces a la contra de lo qu’ellos mesmos piensen. Tamos al mesmu nivel de creatividá qu’otros sitios; o muncho meyor si m’apures. Polo tanto, creo que la crisis ye más que nada d’un modelu que tuvo furrulando hasta va poco, un modelu que prescindía muncho de lo autóctono, de lo propiamente dicho asturiano, y ye posible que la igua a esa crisis sía que’l modelu autóctonu garre munchos más espacios que los que tenía enantes. Ésa ye la meyor universalidá.
 
¿En qué camudó L’Arribada de la primer edición a ésta?
 
La primer edición de L’Arribada fixóse mui rápido. Foi una testoniada de mio. Púnxeme en contautu con Xosé Nel Riesgo y dixe-y que teníemos que facer dalgo que nos saquese un poco del guetu nel que taba metida la cultura asturiana autóctono y, a partir d’ehí, facer un eventu onde podíemos tener una esposición amplia de tolo que se ta produciendo n’asturianu no llingüísticu y n’asturianu en tanto que’l conceutu autóctonu. Dende’l primer momentu marcamos mui claramente que nun habría nengún tipu de discriminación nin diferenciación por razón de pensamientu; esto ye, abiertu a too tipu de credu ideolóxicu personal y cualquier sensibilidá, rompiendo, per una parte, lo que ye la tendencia d’esa cultura oficial en crisis condicionada porque desprecia a l’asturianu, y, per otra, superar ciertes ‘capiellines’ que siempre hubo dientro del asturianismo cultural.
 
A partir d’esos conceptos ye como echamos a andar. Nel 2006 foi una cosa mui cenciellina que se fixo na sala de conferencies y, nel segundu añu, yá decidimos facer dalgo muncho más ambiciosu; foi l’añu nel que se constituyó l’asociación cultural. 
 
Echando la vuelta atrás, ¿algamó L’Arribada esos oxetivos que vos planteaveis nun principio?
 
Parte d’ellos, sí. Na parte qu’a mi me toca –non como miembru de l’asociación cultural, que nun lo soi, yá qu’ocupo’l cargu de coordinador del festival–, los collacios y collacies de mio siempre pensamos n’oxetivos mui ambiciosos. La realidá va marcándote, pero polo poco que fuimos consiguiendo no económico y nos espacios, creo que somos el formatu númberu ún n’Asturies. Evidentemente, hai coses que tenemos en mente y que nun se pudieron facer, pero esperamos qu’a partir del 2012 podamos avanzar hacia cotes más importantes.
 
¿Qué ye los que vos queda por avanzar?
 
Una de les cuestiones que siempre consideré positiva, precisamente porque nosotros nun refugamos l’universalidá dende la nuesa autoctonía, yera tocar dos aspectos mui concretos que se quedaron nel tinteru porque nun había más presupuestu: dar más cancha a la presencia d’invitaos internacionales o d’otres cultures, tanto del mesmu Estáu o que tengan venceyamientos cola cultura de nueso. Y tenemos dos aspectos mui interesantes en mente: ún ye’l de los autores de Guinea Ecuatorial que tien una producción importante, nun sólo n’español –ye l’únicu país hispanofalante de tol continente–, sinón tamién en bubi y en fang, que son les dos llingües grandes del país; y l’otru ye’l casu de los sefardites, porque hubo sefardites n’Asturies y, inclusive, nel cancioneru sefardín hai rasgos del astur-lleonés.
 
Otru aspectu que nun pudimos tocar muncho foi abrinos a los centros asturianos de tol mundu. Ye una cuestión que tenemos pendientes. El primer añu fiximos un actu pequeñu en Madrid y hai perspeutives pa facer esti añu un ciclu cinematográficu nel de Barcelona. Igual tenemos qu’abrir una cuarta estaya de L’Arribada con un nome como ‘Pel Mundu’ o daqué asemeyao. Y polo demás, ye reforciar tolo que tenemos, cooperar tolo lo que podamos coles alministraciones y con otros eventos de perfil asturianista, como la oportunidá que nos dan agora col Festival Atlánticu. Y tamién podemos tocar otra estaya que nun pudimos facer dende la modestia de nueso, que ye la d’abrinos a los escritores del Arcu Atlánticu, mui especialmente a los de los países célticos, con lliteratures d’estáu variable pero con coses mui interesantes.
 
¿Qué supón pa L’Arriba l’encargu del Conceyu de Xixón d’entamar l’eventu lliterariu del Festival Atlánticu que va celebrase per primer ocasión na segunda quincena de xunetu del añu qu’entra?
 
Ye una responsabilidá, lo primero, y como tolo que nosotros aceptamos y nos ponemos a ello, vamos a trabayar a fondu nello. Pensamos que ye mui importante porque’l ‘mare nostrum’ de los asturianos ye’l Cantábricu, l’Atlánticu, y a partir d’ehí ye simplemente recuperar unos caminos que vienen esistiendo dende hai más de 2.000 años. Hai una fonda base cultura, étnica y antropolóxica que nos une muncho con estos países; inclusive yo podría dar el saltu, anque nun ye’l casu d’esti marcu, al Bálticu, yá qu’hai referencies de los escandinavos que tenemos na cultura de nueso. El marcu cultural ye importante, l’intercambiu cultural, el qu’ellos vean qué lliteratura y qué cultura tenemos y que nosotros conozcamos la d’ellos y abrir, asina, una vía económica que ye mui importante porque la cultura ye un recurso económicu. 
 
¿Yá pensaron cómo van enfocar esta actividá?
 
Non, de momento tamos tovía dando los primeros paso. Lo que ta claro ye que tenemos qu’axuntar actividaes d’un montón de países. El nuesu oxetivu ye tener nidio lo preliminar cuando principie l’añu. Va ser un eventu que va tener actividaes de too tipu que va convertise nun referente importante.
 
Tornando a L’Arribada, ún de los momentos más esperaos del festival ye la entrega de los premios Timón.
 
El premiu, modestu en dotación pero importante porque consiste nuna obra de Jesús Castañón, ún de los ceramistes más valoraos, n’especial fuera d’España, reconoz la trayeutoria d’un escritor y, de manera especial, la so relevancia social, col requisitu únicu de que tenga 50 años cumplíos cuando se fai la convocatoria. Esti añu damos el quintu premiu Timón a autores n’asturianu, que ye pa Vicente García Oliva pola so llarga trayeutoria lliteraria, calidá y diversidá de xéneros, y la segunda del Timón p’escritores en castellanu, pa Juan Méjica, una persona que paez que vien tresplantáu del Renacimientu a l’actualidá porque amás de la d’escritor aconceya munches otres facetes, como la d’escultor.
 
¿Cómo ye’l públicu qu’acude a los actos de L’Arribada?
 
La mayor parte del públicu qu’asiste son xente normal, de cualquier edá, que nun son definibles como asturianistes militantes. Son ciudadanos que tienen apegu pola cultura del país, pero que nun lleguen al conceutu de militante o activista del asturianismu. Por embargu, quitando munches esceiciones, dase muncho l’efeutu ‘palomba’, que suena mui mal. Yo voi a lo de mio, echo ‘aquello’ y marcho esnalando. Y eso sí nos preocupa, yá qu’hai una parte qu’igual nun s’implica y nun se da cuenta de que los primeros beneficiarios de lo que se fai en L’Arribada son ellos. Vienen, van a lo suyo y nun se decaten de que lo qu’hai detrás ye mui interesante. Nun funciona’l principiu de solidaridá colos compañeros, vamos a llamalo asina.
 
Eso yo creo que ye una deficiencia qu’habría qu’iguar. Lo importante ye que’l productu llegue a la xeneralidá de la ciudadanía, pero ye triste que los ciudadanos que nun tan mui implicaos nel tema ye los que te vengan y que, sin embargu, los primeros interesaos y beneficiaos del eventu actúen con un ciertu egoísmu. Eso ye un restu d’esi infantilismu primariu qu’hai tovía en ciertu asturianismu cultural.
 
¿Tán contentos col apoyu de les alministraciones?
 
Sí, porque tenemos apoyu dende tolos años. El más importante ye’l de l’ayuntamientu, en torno a los 8.000 euros pa toles actividaes del añu, a lo qu’hai sumar los espacios que nos dexen y les facilidaes. Llueu ta’l del Principáu, que tovía nun conocemos pol retrasu del cambiu de Gobiernu. Otra manera, a parte d’estes ayudes tán les aportaciones personales de miembros de la organización, que pueden llegar a los miles d’euros y que nun se recuperen. Amás de tiempu y trabayu, esto cuéstate perres, y por eso máncate enforma qu’haya persones que vayan a lo suyo. Nun ye xeneral nin mayoritario, pero tovía hai dalgún casu.
 
¿Qué opina del nomamiento de Vallaure como conseyeru de Cultura y Deporte?
 
Marcos Vallaure ye una persona con un pedigrí asturianista innegable y del más alto nivel, lo que ye una bona señal. A partir d’ehí, pue detectase una mayor receptividá a tolo que tien que ver colo autóctono y eso siempre ye positivo. Too depende d’a ver cómo se desarrollen les coses y si depués lo que s’anuncia nun principio va correspondese cola realidá. Les primeres señales creo que son positives, tanto n’Asturies como en Xixón.