Una bona mañana Mur pegó un saltu de la cama, garró'l so pantalón y la camiseta y salió de casa. Vivía, xunto colos sos hermanos y so ma, nuna casuca, metá casa, metá zapatu, nel pueblu de Pozafonda.

{short description of image}

-------------------

Mur, el Guarda.

Yera branu, asina que nun había escuela. Mur taba un pocu atristayáu. El día enantes punxérase a xugar a los pirates y, como nun tenía gorru, garró una de les potes de so ma. {short description of image}Yera un cascu perguapu pero, ¡madiós! cuando taba xugando a los abordaxes nel ríu, el cazu cayó al agua y escapó pela torrentera p'abaxo.

La riña de so ma foi pergorda: "tol día tas faciendo trastaes. Pémeque nun puedes tar tol branu ensín facer nada..." Y asina foi como la ma lu apuntó al campamentu de branu del topu Antón. Güei entamaba. El campamentu yera un práu que taba al llau de la biesca, onde dellos neños xugaben y, sobre too, deprendíen a trabayar en delles coses, pa ayudar a que la biesca tuviera lli mpia.

"Bono -dixo topu Antón, que yera'l xefe'l campamentu-, Mur, tu vas ser l'encargáu de la zona de comer".

"Val..."- dixo Mur, que nun taba mui convencíu.

La zona de comer yera un requexu del campamentu que tenía delles meses de madera, a la solombra de los árboles. Yera un sitiu onde muncha xente del pueblu diba a xintar y merendar, sobre too nos díes chornosos del branu. Mur tuvo que llimpiar bien dalgunes fueyes qu'había en suelu y tirar la basoria de les papeleres. Esa primera tarde vinieron munches families a merendar. Facía un día perguapu, col sol brillando y con un airín que refrescaba'l llugar.

  • Topu Antón púnxose percontentu col trabayu que taba faciendo Mur y despidiólu esa tarde con una sorrisa. Pela nueche, Mur durmió bien, porque taba un pocu cansáu. Suañó que yera'l guarda de la zona de xintar y que-y daben una gorra azul y mariella, pa que toos lu conocieran.
 {short description of image}

Al otru día, Mur marchó pal campamentu mui gayoleru, pensando en seguir cuidando de la zona de comer. Quería qu'aquel requexu estuviera siempre llimpiu y guapu. Pero entós, ocurrió que, a la hora de xintar, empecipió l'estropiciu. Apaeció perellí la familia Goínez, los gochos. Lo normal yera que la xente fuera al campamentu en bicicleta o caminando. Pero non, los Goínez llegaron nel so coche, un coche vieyu y feu que metía munchu ruíu y soltaba fumu prietu per tolos llaos.

  • Dende'l primer momentu, Mur supo que diba tener problemes colos Goínez. Poco a poco los gochos fueron sacando los trastos. Sacaron bolses y más bolses enllenes de comida, que diben tirando en suelu, cuando quedaben vacíes.
 {short description of image}
  • Dempués, el señor Goínez entamó a fumar puros. Fumaba ún tras d'otru, enllenando tol aire de fumu fediondu. Les colielles de los sos puros diben toes al suelu. Mentanto, Mur siguía mirando sele, dende un requexu, cola escoba na mano. Depués de finar cásique tola comida y dexar parte d'ella tirada en suelu, los Goínez fueron pal coche, pa marchar.

La zona de comer quedó como un basoreru. Mur nun pudo aguantase más y foi pa ellos. "¡Un momentu! -glayó-. Perdonen que los moleste, pero creo que teníen que llimpiar y recoyer un poco tola basoria que tiraron pel suelu. Pa eso tenemos papeleres".

"¿Pero qué dices enanu? -retrucó el señor Goínez, enfoscáu-. Tu nun sabes con quién tas falando. Yo tiro lo que me da la gana y onde me peta. Soi un gochu perimportante nesta comarca".

{short description of image}
  • Mur siguió falando ensín enfoscase. "Nun me importa un res quién ye usté, señor. El campu ye de toos y nun tien drechu a emporcalu. Otra cosa ye lo que faiga usté nel sol cubil... digo... en so casa". La cara del gochu yera un poema. Taba cambiando de color cada pocu. Lo único que llegó a pronunciar foi un gruñíu de rabia.

Entonces, la señora Goínez, que yera un pocu más educada que'l so maríu y tenía muncha más vergoña, dixo: "Nun t'enfosques goín. Creo qu'esti neñu tien razón, nun nos portamos bien. Ye meyor que recoyamos la nuesa basoria y la echemos nes papeleres.

  • Mur cásique nun lo creía, cuando el señor Goínez agachó les oreyes y empecipió a recoyer tola basoria que tiraran al suelu. Mur entonces respiró tranquilu.
 {short description of image}

Al día siguiente, cuando toos supieron el bon trabayu que fixera Mur, el topu Antón decidió nombralu el guarda de la zona de comer. Dio-y un uniforme perguapu y, por supuestu, una gorra azul y mariella. Esi día Mur garró la escoba con más orgullu que nunca.

{short description of image}