Esta ye la hestoria de Saturnu, el bruxu más chambón de tola biesca.
Él intentaba facer conxuros, pócimes y beberaxos máxicos, pero too-y salía mal.
Tovía m'alcuerdo del día que-y quixo quitar un dolor de mueles a una muyer que vivía nun pueblu cercanu.
-Nun sufras muyer, qu'esto íguolo yo, con una pócima, nun tris -dixo Saturnu, mientres preparaba'l beberaxu nuna pota mui grande, que tenía.
La muyer bebió aquella pócima y... ¡Madiós! ¡Qué llaceria más grande! ¡La probe muyer convirtióse nun mostruo!
"Bono, polo menos esperamos que yá nun-y duelan les mueles", pensaba Saturnu, apavoriáu polo que fixera.
...
Un home tan llaceriosu nun podía acabar bien.
Benita yera una paisana que diba tolos díes a casa de Saturnu pa llimpiar y face-y la comida.
¡Y menos mal que taba ella pa facelo, porque si non...!
Pero ocurrió un día que Benita púnxose mala. Garró una mormiella pergrande y nun pudo dir a casa'l magu.
Asina que Saturnu tuvo que ponese a facer la so comida y, como yera tan llaceriosu, echó-y al cocido polvos máxicos, en vez de la pimienta.
El cocido tornóse nun beberaxu máxicu, y cuando Saturnu lu comió...
¡FLASH!
Convirtióse nuna xaronca, grande y verde.
Y, dende entós, nun hubo otra xaronca más llaceriosa en tola biesca.
Yá decíamos nosotros que Saturnu diba acabar mal.
FIN
El cuentu y los dibuxos son propiedá d'Enrique Carballeira.
Tolos drechos reservaos.