Naquella biesca vivía un lleón permalu. Tolos demás animales qu'ellí vivíen taben apavoriaos. El tiranu diba comiéndolos, unos tres d'otros.

Yeran demasiaos problemes; asina nun podíen seguir.

Un día, aconceyáronse un grupu d'animales y entamaron a pensar nuna igua pal problema. Al final, decidieron que lo meyor yera que'l lleón comiera namás qu'unu dellos por día. Yera terrible, pero polo menos habría un pocu de tranquilidá.

A cambiu del tratu, propusiéron-y al lleón que la presa diaria presentaríase voluntariamente, asina nun tendría que cazar más.

Al lleón, que yera un pocu vagu, la idega paeció-y perbien. Lo unicu que tenía que facer, a partir d'agora, yera esperar a que la comida viniese al platu.

Y entós, llegó'l día que-y tocó a la llebre vieya ser la comida del lleón. Tenía munchos años y poques fuercies, pero yera perllista, asina que tramó un plan.

Cuando llegó delantre del lleón, fíxose qu'estaba mui cansada.

-¡Nun puedo más! -decía- ¡Cuasi me agarra!

-Pero, ¿quién te quier garrar? -entrugó'l lleón impaciente.

-Otru lleón. Ye pergrande y tien los dientes mui afilaos -retrucó la llebre.

El lleón oyó aquello y enfoscose abondo:

-¡Otru lleón na mio biesca! ¡Nun puede ser! ¿Ú ta?

-Ta al lláu del llagu. Ye mui grande y fuerte, ¡ten cuidáu! -dixo la llebre.

El lleón marchó enfoscáu buscando al so rival. Cuando llegó al llagu, asomóse a la oriella y miró pa l'agua. Ellí taba, yera otru lleón que lu miraba enfoscáu... pero nun se dio cuenta que taba viéndose a sí mesmu, reflexáu.

Nun aguantó más y tiróse... pero como nun sabía nalar, afogóse.

La llebre, vieya y débil, pero mui llista, salvó a la biesca del tiranu.

Fin.