MARCHO COL COMETA

Paez mentira lo fácil que ye viaxar cola imaxinación. Nun falo sólo de viaxes nel espaciu, sino tamién de los que se pueden facer nel tiempu. Basta con querelo y...¡Yá! Tamos nel sieglu XXII. Ciudaes con edificios altos como montes llevántense delantre de los nuesos güeyos. ¡Cuidáu, agachaivos! ¡Ziuuuu! Ehí va una pequeña nave-cohete. Tenemos que dir con tientu porque tamos nuna época que malpenes conocemos.
Borsalino ye un neñu de nueve años. Ye perintelixente, pero nun acaba de tar mui agustu col modelu de sociedá qu-y tocó vivir. Borsalino llee munchos llibros, anque son llibros mui vieyos, de los que tovía s'emprentaben en papel. Presten-y permuncho les aventures y socesos que cunten nes sos páxines. Lo malu ye qu'estos llibros cásique yá nun esisten. Agora fise too colos ordenadores y los videoxuegos. Puedes comprar una novela de pirates del espaciu, de quinientes páxines, dientro d'un perpequeñu discu d'ordenador, que malpenes ye mayor qu'una galleta.
Hai dellos momentos nos que la so manera de ser provoca-y dalgún qu'otru problema. Nesta perestraña sociedá del sieglu XXII, cuando un neñu nun respuende al modelu normal que los sos pas y la mesma sociedá esperen d'él, camúdenlu. Sí, yá sé que munchos de vosotros taréis entrugando qué quier decir estos. Mui fácil: nesta época hai unes máquines que pueden tresformar la manera de ser y de pensar de la xente, sobre too de los neños. Asina que Borsalino, que tien una mascota nomada Orlando -un mur pequeñín-, siempre ta temiendo que daquién venga a buscalu pa metelu na máquina de camudar. Y él, por supuestu, nun quier. Ye mui feliz siendo como ye; coles sos llectures de papel y cola so mascota viva. Tolos sos collacios del colexu tienen mascotes, pero son artificiales, tan feches de microchips, procesadores, aluminiu y pelo sintético. Nun comen más que piles, lletricidá, mientres qu'Orlando come pipes y llechuga.
Borsalino siempre ta diciendo: "Marcho col cometa". Esta ye la so frase preferida; tolos sos collacios de clas la conocen, oyéron-yla cientos de vegaes. Cuando'l maestru s'enfosca con él, proque fixo los deberes en fueyes de papel en vez de facelos na pantalla del so ordenador, Borsalino míralu y namás que diz: "Marcho col cometa". Los sos pas yá tan avezaos a oyir esta frase, asina que nun-y dan muncha importancia. "Coses de neños", dicen. Sin embargu yá pidieron hora pa dir a la máquina de camudar: quieren tresformar la manera de ser del so fíu.
-Borsalino -diz so ma, que se noma Berta y que tien tres antenes na tiesta-, mañana vamos llevate a un sitiu perguapu, onde una máquina mui prestosa va facete mui feliz.
-Marcho col cometa -retruca él.
Al día siguiente toos na familia tan mui nerviosos, menos Borsalino, qu'almuerza perbien; güei tien muncha fame. Depués tamién-y da la so ración de pipes y llechuga a Orlando. Sin embargo, los sos pas nun prueben bocáu. Nun saben por qué, pero tan atristayaos. Tresformar a Borsalino ye lo meyor que pueden facer pero... Hai daqué que-yos reconcome la concencia.

-Borsalino -diz so pá, que se llama Tornelo y que tien dos ordenadores personales de mano y ún de collar-, pela tarde voi recoyete, cuando salgas del colexu, pa dir al centru de camudación. Depués vas sentite meyor, dexarás de lleer esos llibros tontos de papel y van prestate los ordenadores y los videoxuegos.
-Marcho col cometa -ye lo único que retruca él.
Esa mesma mañana, Borsalino garra'l so maletu y sal de casa. Sin embargu, en vez de esperar la nave-bus que lu lleva tolos díes al colexu, marcha na dirección contraria. Pol camín atópase con dellos conocíos que estrañaos entrúguen-y: "Borsalino, ¿güei nun vas a escuela?". "Marcho col cometa", retruca él.
Sigue caminando una hora. Sal de la ciudá y sigue pol campu. Depués d'andar dellos cientos de metros, llega hasta les puertes d'un gran centru d'investigación. Na entrada hai un cartelu pergrande que pon: "Centru Espacial. Proyectu Estrelles". Borsalino abre'l so maletu y saca un recorte d'un periódicu. Los periódicos del sieglu XXII salen toos pela pantalla del ordenador, pero él fixo una copia cola impresora. L'anuncia pon: "El cometa Hyakutake llega a la tierra. El so másimu averamientu va ser d'unes decenes de millones de kilómetros".
"Esi averamientu va ser bastante", marmulla, mientres guarda'l recorte nel maletu y acaricia a Orlando, que durme nun requexu, ente los llibros.
Nun lo piensa más y empecipia a esguilar la alta muria que ta alrededor del centru d'investigación. Con un blincu áxil cae al otru llau.
Dafurtu empecipia a rexistrar y buscar pelos edificios. Menutos depués atopa l'hangar principal. nel centru, rodeada de munches máquines y computadores, ta la nave espacial. Agáchase, pa que nun lu vean los munchos técnicos qu'hai perellí, entra na nave y siéntase nel sillón del pilotu. Les sos pequeñes manes malpenes pueden suxetar les grandes palanques y mandos de control. Media hora depués, ante'l plasmu de los técnicos y científicos, la nave despegó, saliendo a toa mecha hacia'l cielu.
Esgarrapa l'atmósfera y adiéntrase nel prietu espaciu. En malpenes dos hores, Borsalino alcanza'l cometa. Con munchu curiáu, allégase a él y pósase na so superficie. Dende agora viaxará nel so llombu; conocerá miles de millones de kilómetros de la galaxia. L'aventura namás qu'acaba entamar. Borsalino marchó col cometa.
Muncho más abaxo, na Tierra, toos falen del socesu. Durante delles selmanes tovía siguen viendo la lluz nel cielu, el rastru del cometa. Poco a poco va alloñándose, faciéndose cada vez más pequeñu. Y saben que, enriba d'él, col so collaciu Orlando, viaxa Borsalino, el neñu que nun quixo ser tresformáu. Y viaxa a una velocidá mui superior a la de cualaquier nave de la Tierra.