| Convocaos los premios lliterarios de la
Conseyería 28/6/2001 La Conseyería de Cultura convoca los
premios de creación lliteraria pal añu 20001. Son el "Xosefa
Xovellanos" de novela (XXII edición), "Máximo Fuertes
Acevedo" d'ensayu (XI edición) y "Xuan Mª Acebal" de
poesía (VII edición. Pa caún d'ellos establezse un
premiu de 700.000 pesetes. Podéis consultar la convocatoria completa nel
BOPA nº 146.
Opina
sobre esta noticia nel Tableru d'Anuncies
Bimenes celebra la V
Fiesta de la Oficialidá 28/6/2001.
Dende'l pasáu día 22 vienen
desendolcándose dellos actos culturales nel que foi'l primer conceyu
asturianu en declarar la oficialidá allá pel añu 97.
Anque'l resultáu d'esta declaración ye polo menos
discutible, tolos años sigue celebrándose una "fiesta de
la oficialidá". El vienres pasáu los actos tuvieron a
cargu de la Asociación de Muyeres "Eva Canel" de
Contrueces, que llevó una muestra de teatru y una representación
del so coru.
El llunes quedó
abierta al públicu una esposición sobre mitoloxía
asturiana na Casa la Cultura, onde ayeri miércoles, el grupu de teatru
del Cursu de llingua asturiana de Bimenes representó una obra de Rufino
Mtnez. Vázquez. Siguío y en mesmu sitiu, presentóse
tamién la banda de música tradicional y el grupu de pandereteres
de Bimenes.
Pa güei xueves día 28 hai programao una charla-coloquiu col
títulu de "El procesu d'oficialidá de la llingua
mirandesa" al cargu de representantes del Conceyu de Miranda del Douro
(Portugal). Esta charla va tener llugar nel centru social de Rozaes a les 18.30
hores. A partir de les 8 de la tarde na Casa la Cultura, el Grupu de
Teatru Casona va facer una representación de la obra "Les
Llinguateres".
Pal vienres 29 va haber una muestra de curtiometraxes n'asturianu,
tamién na Casa la Cultura (17.30 h.) y dos hores después va
facese la entrega de premios del IV Concursu de Cuentos pola Oficialidá.
De les 20.30 p'alantre va celebrase un debate sobre "Asturies na
sociedá de la información" y a les 22.30 en Xenra el DJ
J-15 abre una nueche de música que va dar pasu a Dixebra y
Folkgando.
El sábadu a les 11.00 de la mañana ábrese un
mercáu de productos artesanos y a la mesma hora la banda de gaites
La Raitana de
Nava-Piloña entama un pasacáis per tola rodiada. A les 12.00, la
presidenta de l'Academia de Llingua va ller el pregón oficial y a les
12.30 ofíciase una misa n'asturianu na capiya de Xenra. A la salida
(13.00 h) fadráse la puya'l ramu y media hora depués los grupos
folklóricos de Bimenes y Miranda van ofrecer una actuación hasta
la hora de xintar en prau de la fiesta, que ta programada pa les 14.30. Dende
les 16.00 van desarrollase dellos xuegos tradicionales asturianos y a les 19.00
fadráse'l "2º Concursu de gaiteros Mozos".
Tola xornada va tar animada pol Disc-Jockey J-15 y pela nueche los
grupos Texu, Felpeyu y Llangres van
pesllar los actos con un conciertu de música tradicional,
Opina
sobre esta noticia nel Tableru d'Anuncies
L'asturianu en
ya.com 28/6/2001 Fai unos díes , un internauta asturianu
miembru de la Xunta pola Defensa de la
Llingua taba intentando rexistrar la web d'esta organización en
dellos buscadores, ente ellos en buscador de
ya.com que, como ye
de suponer, nun daba la opcion d'escoyer como idioma l'asturianu.
Sólo castellano, gallego, portugues, catalan, euskera, frances,
inglés y aleman. Al facer el rexistru de la URL de la Xunta, detectaba
(probablemente con un corrector) fallos na llingua escoyida, polo
qu'ésti empobinóse a la encargada del buscador, que-y
contestó lo siguiente: Estimado usuario: Hemos recibido tu mensaje,
gracias por avisarnos puesto que no habíamos detectado el error de alta
en la descripción. Nosotros mismos daremos de alta tu página web
e incluiremos el Asturiano como una lengua más
Opina
sobre esta noticia nel Tableru d'Anuncies
Actividaes de la Xunta en
Siero 21/6/2001 El Colectivu de Siero pola Oficialidá,
asociación integrada na Xunta pola
Defensa de la Llingua Asturiana, organiza güei, 21 de xunu, una serie
d'actividaes na Casa de Cultura de La Pola (Siero) a partir de les 20
hores:
- Presentación del DALA, Diccionariu de la Llingua Asturiana, por
D. Ramón d'Andrés Profesor de la Facultá de
Filoloxía na Universidá d'Asturies, y miembru de l'
Academia de la Llingua Asturiana.
- La zanfoña n'Asturies, por D. Alfonso Fernández,
director del Muséu de la gaita de Xixón.
- Conciertu: Música tradicional asturiana (Tonada, Gaita y
tambor, Monologuistes). A cargu de l'Asociación d'Interpretes de la
Canción asturiana, AICA.
Opina
sobre esta noticia nel Tableru d'Anuncies
Inaugúrase una cai
dedicada a Mánfer de la Llera 21/6/2001. El
próximu sábadu día 23 de xunu inaugúrase en
Sama de Llangréu una cai dedicada a Xosé Manuel d'Andrés
Fernández "Mánfer de la Llera", escritor popular
n'asturianu y en castellanu, nacíu en 1918 en Les Cuestes (Ciañu,
Llangreo), ex-presidente de "Conceyu Bable" nos primeros
años 80 y miembru correspondiente de l'Academia de la Llingua dende la
so fundación.
La propuesta de nueva cai ficiéranla en mayu del 2000 dos
colectivos ciudadanos y culturales del conceyu, y aprobárase por
unanimidá.
La inauguración, a la que tán convidaes toles persones que
quieran asistir, ye a la 1 de la tarde na mesma cai. Falará'l teniente
d'alcalde, l'homenaxáu, y interpretará dos pieces el Coru d'El
Llano de Xixón. La Cai de la Llera, en Sama, va pasar a llamase Cai de
Mánfer de la Llera.
Opina
sobre esta noticia nel Tableru d'Anuncies
Nueva xunta de gobiernu
de l'Academia 21/6/2001 En plenu celebráu'l pasáu
día 8 de xunu, escoyéronse los nuevos cargos de l'Academia de la Llingua, que completen la
xunta de gobiernu qu'acompaña a la nueva presidenta, Ana Cano
González.
Los cargos son estos: vicepresidente, Miguel Ramos Corrada; secretariu,
Roberto González-Quevedo González; vicesecretariu, Urbano
Rodríguez Vázquez; y ayalgueru, Carlos Lastra
Martínez.
Opina
sobre esta noticia nel Tableru d'Anuncies
¿ Protección
pa la llingua al sur d'El Cordal ? 14/6/2001.
Redacción/Nicanor García
La futura "Llei de Patrimoniu
Cultural de Castiella y Llión", que se va aprobar na última
sesión del "Consejo de Gobierno" d'esti mes de xunu, va
contemplar midíes de de protección de los "bienes y
actividaes etnolóxicos y llingüísticos" a los que
califica de "una de les mayores riqueces culturales de la Comunidád
Autónoma", según dixo'l vicepresidente y
"consejero" d'Educación y Cultura, Tomás Villanueva al
salir d'una reunión esti día.
El vicepresidente dixo tamién que la nueva normativa va tener un
calter descentralizador pa coles corporaciones locales, fomentando'l patrimonio
y ampliando l'ámbitu d'actuaciones del mesmo cola creación de
nuevos espacios culturales, nos qu'incluyó la protección de los
bienes etnolóxicos y llinguísticos. Esta iniciativa afecta
mui especialmente a Llión y Zamora, onde tovía queden munchos
falantes de la vieya llingua astur-llionesa. Ye la primer vez que se contempla
a nivel autonómicu la "protección" d'otres fales
distintes del castellán na comunidá vecina.
Ye interesante ver el tratamientu na prensa autonómica, que
califica ensin prexuicios de "fales vives provenientes del
llatín" a lo qu'entá se fala nes estremaes comarques
llioneses y zamoranes que conserven la llingua. Nesti sen, califica al
astur-llionés de "llingua falada dende la Edá Media
d'Asturies a Estremadura" y cita espresamente dellos dialectos como'l
de Sayambre, La Cepeda, L.laciana o Senabria. Nel casu del Bierzu Altu comenten
la esistencia d'una estraordinaria vitalidá de la llingua hasta hai
pocos años, asina como de la esistencia aceptada y conocida d'una
variante del gallegu na zona más occidental de Llión y Zamora, al
tiempu que califica la llei como primicia pa protexer un "patrimoniu
intanxible y preciáu".
Ensin embargu, del día de la noticia p'acá vienen
sucediéndose opiniones pa tolos gustos, véi sinón la
sección de cultura del
Diario de
León.
Opina
sobre esta noticia nel Tableru d'Anuncies
Nava aprueba unes
"ordenances municipales pal usu del asturianu"
14/6/2001 La
selmana pasada , el plenu del Ayuntamientu de Nava aprobó unes
ordenances pa regular l'usu de la llingua asturiana nel ámbitu del
conceyu. La propuesta aprobóse colos votos favorables del PSOE y
de l'Agrupación Asturianista de Nava a la que pertenez l'alcalde
Xulián Fernández Montes. La formación nacionalista
Andecha Astur, propunxera hai un tiempu
un testu al consistoriu, que sirvió de base pa les mesmes. Esta
formación política lleva tiempu con una
campaña per
dellos conceyos d'Asturies pa pidir que se faigan normatives municipales
"sobro la oficialidá" del asturianu.
D'esta manera Nava súmase a otros conceyos como
Llangreo o L.lena onde yá
tienen regulao l'usu del idioma asturianu con dalguna clase de normativa
municipal.
Convién recordar que, hai unos años, dellos conceyos
asturianos declararon "formalmente" la oficialidá de la
llingua asturiana nel so ámbitu, anque la concrección de la mesma
quedó pa prau na mayoría de los casos, por falta precisamente de
desarrollu llegal. Asina, tenemos güei conceyos onde se disfruta d'una
"teórica" oficialidá" pero la presencia del
asturianu nun se ve per nengún llau y otros como L.lena o
Corvera onde nun se dieron
declaraciones d'oficialidá pero sí fomenten y tienen regulao
l'usu de la llingua. Nava nun ta ente los conceyos onde l'asturianu se
declaró oficial, pero eso nun quita pa qu'estes ordenances pudieren
fomentar un usu real del idioma nos ámbitos municipales.
Opina
sobre esta noticia nel Tableru d'Anuncies
L'Institutu de Lluanco
pola oficialidá 14/6/2001 El claustru de profesores del IES "Cristo
del Socorro de Lluanco aprobó fai unos díes la siguiente
resolución:
"Al firmase apocayá pol Estáu Español la carta
Europea de les Llingües y depués de ver el lentu desenvolvimientu
de la "llei d'usu del asturianu" constatamos con preocupación
que la llingua propia d'Asturies va tener poques probabilidaes de sobrevivir a
esti sieglu si non se ponen los medios amañosos pa ello. Ye
responsabilidá de los poderes públicos, especialmente de la Xunta
y del Gobiernu del Principáu. facilitar les midíes necesaries pa
desendolcar el procesu de normalización social de la llingua asturiana.
Por ello, insistimos en reclamar a les instancies oportunes:
1) El respetu a los derechos llingüísticos de los falantes
d'asturianu.
2) La implantación de la llingua asturiana nel curriculum de la
enseñanza obligatoria, tanto primaria como secundaria y tamién na
postobligatoria (bachilleratu y FP)
3) La corrección de la toponimima, apañando y respetando
los nomes tradicionales de los llugares.
4) La oficialidá de la llingua asturiana na Comunidá
Autónoma del P. d'Asturies".
Opina
sobre esta noticia nel Tableru d'Anuncies
La Xunta n'otru conceyu
más 6/6/2001 El próximu miércoles 13 de xunu,
va tener llugar la presentación d'una nueva agrupación de la
Xunta pola Defensa de la Llingua. Nesta ocasión trátase del
conceyu de Samartín del Rei Aurelio, que se suma a los que tienen
presencia estable d'esta organización ciudadana: Llangreo, Xixón,
Avilés, Uviéu, Mieres, Siero y Suroccidente (Cangas).
La presentación va facese nel mercáu de L'Entregu a les 12 del
meudía. Ente los actos a desenvolver ta la realización d'una
clase d'asturianu na cai, una aición reivindicativa que quier llamar
l'atención sobre la situación del idioma na ensiñanza.
Opina
sobre esta noticia nel Tableru d'Anuncies
Morrió Aquilino
Fernández "Quilo" 6/6/2001
El pasáu 28 de mayu
morrió a los 75 años d'edá Aquilino Fernández
Abúlez "Quilo", un home d'orixe popular que tuvo muncha
influencia nos comienzos del asturianismu modernu.
Llegáu a Asturies nel 1976 dende la emigración en
Venezuela, Quilo incorpórose a l'andecha que taben empezando un grupu
d'asturianistes nel "Conceyu Bable" de Xixón, xunto con
Sánchez Vicente, Vicente García Oliva, Carlos Rubiera, Urbano
Rodríguez, Xesús Cañedo, Mánfer de la Llera y un
garrapiellu más de xente.
Siempre preparáu pal trabayu colectivu, Quilo yera un referente
pa munchos mozos que daquella s'averaben a "Conceyu Bable".
Caltúvose siempre fiel a les sos idees comunistes ortodoxes sin
arrenunciar a una arrecha defensa de la llingua y la cultura d'Asturies. La
so presencia d'home bonaz completábase cola so manera d'espresase,
siempre y en tou momentu nel so asturianu de la zona de L.lena, conceyu onde
yera nacíu y onde, nos años 80, foi conceyal.
Opina
sobre esta noticia nel Tableru d'Anuncies
X Concursu de Cuentos
Curtios "El Garrapiellu" 6/6/2001
La Tertulia Cultural "El
Garrapiellu" convoca'l X Concursu de Cuentos Curtios baxo estes bases:
1. Los cuentos han tar redactaos dafechu en llingua asturiana,
respetando les normes ortográfiques de la mesma. 2. El concursu
va empobináu a escritores mayores de 16 años. 3. El
llargor de los trabayos (unu por persona) nun será enxamás
superior a los 12 folios mecanografiaos a doble espaciu, escritos per una sola
cara. 4. La temática ye llibre. 5. El plazu d'entrega de
los trabayos tará abiertu hasta'l 31 d'agostu del 2001. Tienen d'unviase
a: Tertulia Cultural "El Garrapiellu", Apartáu de
Correos 8133-33280 Xixón, nun sobre onde s'escribirá "X
Concursu de Cuentos Curtios El Garrapiellu". Dientro d'él
dirá l'orixinal del cuentu col títulu y trés copies, baxo
plica, amás d'otru sobre cola plica del autor y el títulu del
cuentu escritu per fuera, que contendrá los sos datos y un
teléfonu de contactu. 6. "El Garrapiellu" nomará
un xuráu debidamente cualificáu pa fallar estos premios; les sos
decisiones nun serán retrucaes. 7. La entrega de los premios
comunicaráse personalmente a los ganadores y fadráse
público nos medios de comunicación. 8. A xuiciu de la
Tertulia Cultural "El Garrapiellu", el ganador de la presente
edición formará parte del xuráu del próximu
concursu. 9. Los trabayos premiaos son propiedá d'"El
Garrapiellu". En nengún casu se tornarán los orixinales a
los autores de les obres non premiaes, pero éstos podrán, pela so
parte, facer usu de les copies nun presentaes. 10.Los cuentos ganadores
espublizaránse na revista Lliteratura, editada pola Academia de la
Llingua. 11. Establécense los premios siguientes: 1 Premiu de
150.000 pts. y diploma 1 Accésit de 50.000 pts y diploma 12. A
xuiciu del xuráu, estos premios podrán declarase desiertos. Nesti
casu, la cuantía de los mesmos fadráse acumulable a los premios
de concursos posteriores. 13. Con esta convocatoria piésllase'l
ciclu entamáu fai diez años, col envís d'espublizar el
segundu llibru de Cuentos Curtios colos ganadores de los últimos cinco
años.
Esti concursu cuenta cola collaboración de la Conseyería
de Cultura del Principáu d'Asturies. Pa más información,
dirixise a Tertulia Cultural "El Garrapiellu", teléfonos
985-14 39 39 y 985-16 02 06.
Opina
sobre esta noticia nel Tableru d'Anuncies
|
