6/6/2001 El pasáu 28 de mayu morrió a los 75 años d'edá Aquilino Fernández Abúlez "Quilo", un home d'orixe popular que tuvo muncha influencia nos comienzos del asturianismu modernu.
Llegáu a Asturies nel 1976 dende la emigración en Venezuela, Quilo incorpórose a l'andecha que taben empezando un grupu d'asturianistes nel "Conceyu Bable" de Xixón, xunto con Sánchez Vicente, Vicente García Oliva, Carlos Rubiera, Urbano Rodríguez, Xesús Cañedo, Mánfer de la Llera y un garrapiellu más de xente.
Siempre preparáu pal trabayu colectivu, Quilo yera un referente pa munchos mozos que daquella s'averaben a "Conceyu Bable". Caltúvose siempre fiel a les sos idees comunistes ortodoxes sin arrenunciar a una arrecha defensa de la llingua y la cultura d'Asturies. La so presencia d'home bonaz completábase cola so manera d'espresase, siempre y en tou momentu nel so asturianu de la zona de L.lena, conceyu onde yera nacíu y onde, nos años 80, foi conceyal.

Opina sobre esta noticia nel Tableru d'Anuncies

6/6/2001 La Tertulia Cultural "El Garrapiellu" convoca'l X Concursu de Cuentos Curtios baxo estes bases:
1. Los cuentos han tar redactaos dafechu en llingua asturiana, respetando les normes ortográfiques de la mesma. 2. El concursu va empobináu a escritores mayores de 16 años. 3. El llargor de los trabayos (unu por persona) nun será enxamás superior a los 12 folios mecanografiaos a doble espaciu, escritos per una sola cara. 4. La temática ye llibre. 5. El plazu d'entrega de los trabayos tará abiertu hasta'l 31 d'agostu del 2001. Tienen d'unviase a: Tertulia Cultural "El Garrapiellu", Apartáu de Correos 8133-33280 Xixón, nun sobre onde s'escribirá "X Concursu de Cuentos Curtios El Garrapiellu". Dientro d'él dirá l'orixinal del cuentu col títulu y trés copies, baxo plica, amás d'otru sobre cola plica del autor y el títulu del cuentu escritu per fuera, que contendrá los sos datos y un teléfonu de contactu. 6. "El Garrapiellu" nomará un xuráu debidamente cualificáu pa fallar estos premios; les sos decisiones nun serán retrucaes. 7. La entrega de los premios comunicaráse personalmente a los ganadores y fadráse público nos medios de comunicación. 8. A xuiciu de la Tertulia Cultural "El Garrapiellu", el ganador de la presente edición formará parte del xuráu del próximu concursu. 9. Los trabayos premiaos son propiedá d'"El Garrapiellu". En nengún casu se tornarán los orixinales a los autores de les obres non premiaes, pero éstos podrán, pela so parte, facer usu de les copies nun presentaes. 10. Los cuentos ganadores espublizaránse na revista Lliteratura, editada pola Academia de la Llingua. 11. Establécense los premios siguientes: 1 Premiu de 150.000 pts. y diploma 1 Accésit de 50.000 pts y diploma 12. A xuiciu del xuráu, estos premios podrán declarase desiertos. Nesti casu, la cuantía de los mesmos fadráse acumulable a los premios de concursos posteriores. 13. Con esta convocatoria piésllase'l ciclu entamáu fai diez años, col envís d'espublizar el segundu llibru de Cuentos Curtios colos ganadores de los últimos cinco años.
Esti concursu cuenta cola collaboración de la Conseyería de Cultura del Principáu d'Asturies. Pa más información, dirixise a Tertulia Cultural "El Garrapiellu", teléfonos 985-14 39 39 y 985-16 02 06.

Opina sobre esta noticia nel Tableru d'Anuncies

31/5/2001 El pasáu día 8 publicáronse les llamaes "instrucciones d'escolarización pa llingua asturiana" de la Viceconseyería d'Educación, no referío tanto a Educación Primaria como a Secundaria.La gran novedá ye que la ufierta va facese obligatoria en tolos centros, lo que supón un pasucu p'alantre respecto a la situación actual. De toles maneres, a pesar de que por declaraciones del Conseyeru a lo llargo del añu en reuniones con sindicatos y Academia de la Llingua, s'esperaba un cambéu de la "voluntariedá pasiva" a una "discriminación positiva" pa qu'un alumnu pudiere recibir clases d'asturianu, la única diferencia nesti sen ye que, pal cursu qu'entra, el padre o madre del alumnu van tener que marcar nun recuadru si quieren o non que reciba clases de llingua asturiana. Hai qu'alcordase qu'hasta agora si nun se pidía espresamente, l'alumnu nun recibía clase.
El restu de restriciones, como la necesidá de personal habilitáu yá en plantilla, el númberu mínimu d'alumnos, etc. sigue igual. En Secundaria, pelo contrario la situación va siguir siendo más restrictiva.

Opina sobre esta noticia nel Tableru d'Anuncies

31/5/2001 Redacción/ Héctor Xil
Va unos díes asoleyóse na prensa de Llión (Diario de León, xueves 10 de mayo) la noticia de que'l concechu de L.laciana va estudiar la posibilidá d'implantar el pal.luezu (variedá del asturiano occidental de la zona) como idioma optativu ente los escolinos del conceyu. La iniciativa parte del alcalde Guillermo Murias (d'IU con mayoría absoluta) y diz ente otro: " tenemos que ser toos ciudadanos del mundu, pero al empar hai que se sentir arguyosu de lo nueso"; "fenómenu culutural ya despolitizáu", etc. Y too esto ye en respuesta a la propuesta de R.G-Quevedo na prensa al otru día depués de facer el cursín anunciáu por Asturies.com.

Opina sobre esta noticia nel Tableru d'Anuncies

28/5/2001 Como s'esperaba, la catedrática y actual decana de la Facultá de Filoloxía Ana Cano González salió escoyida como nueva presidenta de l'Academia de la Lingua Asturiana, pa los próximos cuatro años.
De los 16 asistentes al plenu pa escoyer presidente, 14 votaron a favor de la candidatura d'Ana Cano (la única que se presentaba). Hubo un votu en blanco y ún nulu. Cuatro académicos con derechu a votu nun acudieron a la cita.
En declaraciones inmediates a la so elección, la nueva presidenta, depués de tener palabres d'agradecimientu pal anterior presidente, manifestó la so intención de da-yos continuidá a tolos trabayos entamaos na etapa anterior. Nesti sen dixo que depués d'unos años mui centraos, por necesidá, na cuestión normativa, pue venir una etapa na que'l trabayu nomrmalizador va ser importante pa conectar con toles capes de la sociedá. Asina, recordó la necesidá urxente d'algamar la oficialidá y la titulación de filoloxía asturiana pa lo que "habría qu'abrir calces nuevos de diálogu con tolos sectores y instituciones que sía preciso". Per otru llau, Ana cano fexo una valoración negativa de la actitú del PSOE asturianu vetando la constitución d'una comisión de siguimientu de la Llei d'Usu", calificándola de "decepcionante.

Opina sobre esta noticia nel Tableru d'Anuncies

28/5/2001 Esti xueves, el grupu parlamentariu socialista reculó de les posiciones que manifestara la selmana pasada, na que se punxeron a favor de crear una comisión pa facer siguimientu de la "llei d'usu", como informó Asturies.com (ver más abaxo). 6 díes enantes, tolos grupos dixeron que yeren favorables a crear esta comisión, ideada a propuesta d'Izquierda Xunida, . El PP, que tamién se declarara a favor de la comisión fai una selmana, cambió tamién d'opinión pola falta de consensu y abstúvose, polo que sólo votaron a favor URAS y la mesma IX.
Les esplicaciones del grupu parlamentariu del PSOE dióles, ente otros, J.Luis Montes, que dixo que lo que se dixera la selmana pasada yera que taben por "atopar un camín" pa que l'usu de la llingua fuera normal, por ser un "derechu básicu" de los asturianos, pero que nunca nun se dixo nada d'apoyar esa comisión. Amás, el propiu Montes y el Conseyeru de cultura indicaron que "nun ye'l momentu" de crear comisiones qu'entorpezan el trabayu del Gobiernu asturianu nesta materia. La trescripción de les palabres de Montes nel plenu de la selmana pasada paez que contradicen esta esplicación, que Francisco Javier Valledor calificó de "vetu" a la comisión. Una comisión que, per otru llau, nun proponía nin siquiera estayes de trabayu concretes, lo qu'alimenta'l tonu de representación de tou esti asuntu.
Sí paez más verosímil la escadiella adicional de Montes, que dexóse dicir que "nun se puede abrir otru frente que sumar al tema de la educación" na problemática del asturianu. La pregunta que queda nel aire ye entós la de ¿quién ta convirtiendo l'asturianu nun problema?

Opina sobre esta noticia nel Tableru d'Anuncies

24/5/2001 El vienres pasáu, salió una propuesta del grupu d'Izquierda Xunida pa crear una comisión especial pa desenvolver la "Llei d'Usu y Promoción" del asturianu. Esta llei, que ta aprobada de magar 1998, ye completamente inoperante y nun se cumple n'absolutu, ente otres coses pola falta de desarrollu llegal.
El portavoz d'Izquierda Xunida, Francisco javier Valledor señaló que "avanzóse poco o nada na promoción del usu del asturianu, a pesar de les campañes institucionales y dalguna actuación nel campu de la educación". El grupu de URAS pidió-y al Conseyeru de Cultura que'l Gobiernu autonómicu desendolque la llei y que, si nun-y gusta, que la cambie pero que nun l'afuegue.
De mano, tolos grupos parllamentarios tan al favor de que salga alantre la comisión, anque la rempuesta de Javier Fernández Vallina ye pa pañar nota y sonó más a amenaza qu'a otra cosa: avisó de que'l Gobiernu diba collaborar con esta comisión, pero que toles actuaciones van respetar escrupulosamente l'Estatutu d'autonomía y que nun se va tolerar "nengún atayu pa la oficialidá". ¿Cumpliráse agora l'artículu 4 depués de cuasi 20 años d'Estatutu?

Opina sobre esta noticia nel Tableru d'Anuncies

24/5/2001 Esti día Andecha Astur volvió recurrir l'autu del xuez del Xulgáu d'Instrucción nº1 de Villaviciosa, nel qu'ésti desestimó la denuncia a una escuela de la villa maliaya na que supuestamente-yos echaben multes a los rapacinos por falar n'asturianu. De primeres, esti xuez yá refugare la denuncia alegando que los fechos denunciaos nel colexu San Rafael "nun son constitutivos d'un delitu de discriminación nin d'infracción penal dalguna". La organización nacionalista volvió a recurrir y agora'l xuez anecia diciendo que "Los fechos denunciaos nun son constitutivos del delitu señaláu (discriminación), nin de nenguna otra infracción penalmente tipificada como delitu o falta nel Códigu Penal nin nuna llei especial". Andecha Astur fai una llectura política d'esti autu na que afirma que se persigue a los asturianos por razón de la so identidá y califica l'autu d'ofiensa pa tolos asturianos

Opina sobre esta noticia nel Tableru d'Anuncies

24/5/2001 Fai unos díes el secretariu y el presidente en funciones de l'Academia de la Lingua Asturiana, en representación d'esta institución, tuvieron una entrevista col presidente de l'Audiencia, José Luis Seijas Quintana, pa falar de la normalización llingüística nel ámbitu de la xusticia. L'Academia vien aconceyándose con sectores profesionales en virtú del so mandáu estatutariu de mirar polos derechos llingüísticos de los asturianos y facer pola normalización social del idioma.
Anque la situación llegal de la llingua asturiana na actualidá nun permite munchos avances nesti terrén, los representantes de l'Academia salieron contentos por que ye la primer vez nos 20 años d'existencia de la mesma en que se tienen contactos cola Alministración de Xusticia. Falóse de les nueves situaciones creaes pol hipotéticu desenvolvimientu de la "llei d'usu" y de l'axilización de los trámites pa poner los nomes n'asturianu. Los académicos entregáron-y a Seijas Quintana un exemplar del diccionariu y de la gramática .

Opina sobre esta noticia nel Tableru d'Anuncies

17/5/2001 Antiyeri pesllóse'l plazu pa presentar candidatos a presidir l'Academia de la Llingua. La elección, cola única candidatura de l'actual decana de la Facultá de Filoloxía, la filóloga Ana Cano González va producise'l día 25 d'esti mes de mayu y tien que aprobase por mayoría absoluta de los asistentes. Los miembros de l'Academia con derechu a votu son los 20 académicos de númberu, anque l'asistencia real puede ser muncho menor, desque munchos d'ellos lleven alloñaos de los trabayos de la institución bien de tiempu. La candidatura d'Ana Cano representa una llinia continuista coles postures de García Arias, presidente durante 20 años y dimitíu'l pasáu mes de xineru por motivos personales

Opina sobre esta noticia nel Tableru d'Anuncies

17/5/2001 Güei celébrase, como cada 17 de mayu el "día das letras" nel país vecín, qu'esti añu ta dedicáu oficialmente a la figura d'Eladio Rodríguez. A dos selmanes del últimu "Día de les Lletres" contrasta l'actitú de les autoridaes d'ún sitiu y d'otru pa col idioma respectivu. Hai convocada tamién una manifestación pola mayor presencia del gallegu na educación, encabezada pola Mesa pola Normalización y los sindicatos de la ensiñanza. El portal Vieiros tien un especial onde informen de toles actividaes pa esti día, al que tamién-y dan otru conteníu más desenfadáu: la sección Necesariamente X. Paga la pena la visita. -

Opina sobre esta noticia nel Tableru d'Anuncies

17/5/2001 L'Academia de la Llingua convoca pa'l día 26 d'esti mes de mayu la "prueba de conocencia de la llingua asturiana". El plazu de matrícula ta abiertu dende'l 14 al 24 en local de la propia Academia na cai Santa Cruz nº 6, segundu pisu d'Uviéu. Ta acabante de salir tamién el programa de los "XIX cursos de Branu", qu'esti añu vuelven a facese en Cangas del Narcea. Pa más información consultái la páxina de l'Academia o poneivos en contactu: teléfonos.: 98 521 18 37 - Fax 98 522 68 16 - Apartáu 574 - Uviéu. E-mail: alla@asturnet.es

Opina sobre esta noticia nel Tableru d'Anuncies

17/5/2001 El pasáu día 22 d'abril, y dientro del "I Encuentro de Escritores de la Mina" organizáu por GRUCOMI (Grupu Coleccionista Mineru), celebróse un homenaxe a los veteranos escritores y ex-mineros Manuel d'Andrés Fernández "Mánfer de la Llera" (presentáu pol académicu Vicente García Oliva) y César Rubín (presentáu pol escritor Víctor Botas). Con ello quixo reconocése-yos el so llabor como cultivadores d'una lliteratura popular averada a los temes mineros y espresada en gran parte en llingua asturiana. Mánfer de la Llera, nacíu en 1918 en Llangréu, ye miembru correspondiente de l'Academia de la Llingua, ex-presidente de Conceyu Bable y autor de dellos llibros de poesía, narrativa y un vocabulariu mineru. César Rubín, mierense nacíu en 1921, ye autor de La molinera de La Llosaya, novela escrita nos años 30 y publicada apocayá por Ediciones Trabe, amás de tener publicáu un conocíu vocabulariu mineru. L'actu d'homenaxe celebróse nel Muséu de la Minería de L'Entregu.

Opina sobre esta noticia nel Tableru d'Anuncies

17/5/2001 l'oxetivu d'estes beques, convocaes pola Diputación de Zaragoza, ye contribuir a la promoción de los escritores aragoneses a cola traducción a otres llinngües y de la cultura aragonesa en xeneral, cola traducción d'obres lliteraries (narrativa, poesía, teatru, ensayu) centraes en dalgún aspectu cultural d'esta comunidad o nun personaxe relevante de la cultura aragonesa. Les beques van ser de 300.000 pesetes pa gastos de viaxe y estancia na "Casa del Traductor" de Tarazona, onde'l traductor va trabayar un mes o dos. Les traducciones al y del aragonés puen ser dende y a "cualquiera de les llingües del mundo" según diz la convocatoria, polo que -en principiu- podía mui guapamente ser l'asturianu una d'elles

10/5/2001 Esti añu la manifestación convocada pola Xunta pola Defensa de la Llingua cuntó cola participación de los sindicatos de la ensiñanza FETE-UGT, CC.OO. y SUATEA y celebróse col lema "por una escuela n'asturianu". A pesar d'esti apoyu la manifestación, que se desenvolvió nun ambiente festivu, tuvo una participación un poco más floxa qu'otros años y acabó como siempre a les puertes del Teatru Campoamor d'Uviéu, onde se lleó un comunicáu conxuntu de tonu mui duru y reivindicativu, denunciando la curtiedá y el carácter "cosméticu de les polítiques oficiales en defensa del idioma. Dientro del teatru tuvo llugar l'actu institucional de l'Academia de la Llingua, onde por primer vez en 20 años, García Arias nun foi l'encargáu del discursu, sinón Miguel Ramos Corrada, presidente en funciones, que fixo un repasu a los acontecimientos del últimu añu nel terrén llingüísticu, glosando la figura del ex-presidente, al que agradeció en nome de toos los presentes l'inmensu llabor fechu a lo llargo de tolos años anteriores. El públicu asistente -menos tamién qu'otros años- interrumpió con aplausos delles de veces el discursu, especialmente nes referencies a García Arias y a los nuevos académicos. Nesti sen, destaca'l nomamientu de Lourdes Álvarez como académica de númberu, convirtiéndose na primer escritora qu'ocupa'l cargu. Nun discursu d'agradecimientu daqué intimista, Lourdes agradeció'l nomamientu y mostróse confiada nos tiempos que vienen. L'otru homenaxiáu foi Michael Metzeltin, una de les máximes autoridaes en llinguística románica, que recibió'l nomamientu como académicu d'honor recordando los sos priemros trabayos, onde yá reconocía la importancia del asturianu dientro del contestu de les llingües romances, a pesar de la opinión contraria daquella a incluílu por parte de munchos. Dixo qu'igual qu'esto yá nun se discute nel campu académicu, ye difícil entender la falta de reconocencia de la llingua asturiana na so propia tierra

Opina sobre esta noticia nel Tableru d'Anuncies

10/5/2001 En Bisuyu, conceyu de Cangas celebróse esti domingu una misa n'asturianu. Tolos años per estes feches la xente del pueblu lleva en procesión la Virxen de las Veigas de la capiya hasta la ilesia parroquial de Samartín, onde va tar hasta'l día 15 d'agostu, cuando la vuelven llevar a la capiya n'otra procesión. El cura párrocu, que recibió a la Virxen oficiando una misa n'asturianu, refirióse tamién na homilía a la necesidá de defender el patrimoniu cultural y especialmente la llingua. La idea salió del popular José Rodríguez conocíu como "Pepe Bisuyu", maestru pioneru na escolarización del asturianu y defensor históricu del idioma asturianu, que dixo que "la normalización va algamase cuando dicir una misa n'asturianu nun seya noticia, como güei, sinón dalgo normal en tolos pueblos asturianos"

Opina sobre esta noticia nel Tableru d'Anuncies

10/5/2001 Esti martes El Vaticano asoleyó'l documentu Liturgia authenticam, que supón la quinta entrega de les llamaes "precisiones sobre la forma de dicir misa", conocíes tamién como "instrucciones" qu'entamaron en 1964, depués de les reformes del Conciliu Vaticano II. El primer asuntu tratáu nes páxines del documentu ye'l de les llingües escoyíes polos sacerdotes pa celebrar les ceremonies, onde diz qu'aquellos dielectos que nun tengan un desarrollu completu de la so estructura llingüística y cultural nun se pueden aceptar. Más alantre precisa que na lliturxa namás que tienen que s'usar les llingües "más comunmente falaes", precisando que la introdución de dialectos o de llingües minoritaries supón un "axente de división que ruempe al pueblu en grupos pequeños y crea conflictos. ¿Enteraríense de lo de Bisuyu?

Opina sobre esta noticia nel Tableru d'Anuncies

10/5/2001 L'Ayuntamientu de Mieres firmó un conveniu de colaboración cola Academia de la Llingua pa puxar pola normalización social nel conceyu, lo que supón la rotulación n'asturianu de tolos topónimos (nes carreteres y documentos dependientes del conceyu), asina como nes dependencies municipales. El conveniu aprobóse por unanimidá nel plenu y firmóse coincidiendo cola celebración de la Selmana de les Lletres. Mieres recupera asina un protagonismu perdíu na reivindicación de la llingua, dempués de ser sitiu pioneru nos años 70 y 80. Esti nuevu impulsu a la defensa del idioma vien afaláu por Beatriz González Prieto, que llegó a finales del añu pasáu a la conceyalía de cultura. En declaraciones al selmanariu Les Noticies, Beatriz (que pertenez al grupu de conceyales d'IX) diz que confía n'empobinar la normalización "pasu ente pasu" y ensin problemes, desque la situación municipal d'agora (pautu de gobiernu ente PSOE y IX) favorezlo. Nesti sen remembra como na anterior lexislatura, el gobiernu municipal tornó la declaración d'oficialidá promovida por IX, anque col compromisu de emburriar la normalización. Poro, esti impulsu actual quier desenvolver dichu compromisu y dir más p'allá de lo fecho hasta agora (rotulación billingüe de dellos núcleos y documentación billingüe nos impresos) y dir dando pasos enmarcaos na Llei d'Usu". Ún de los oxetivos ye que la política de normalización se faga "dende la transversalidá" en palabres de la conceyala, implicando a tolos departamentos municipales y non solo al área de cultura. Como muestra del compromisu del Ayuntamientu, González Prieto plantea una evaluación al acabar l'añu del cumplimientu de los oxetivos marcaos

Opina sobre esta noticia nel Tableru d'Anuncies

2/5/2001 Con motivu de la Selmana de les lletres Asturianes, Asturies.com saca una páxina especial onde poder consultar los actos entamaos tanto pola Academia de la Llingua como pola Conseyería de Cultura, escueles, etc. Asina mesmo, dase cuenta de la manifestación entamada pola Xunta pola Defensa de la Llingua.

Opina sobre esta noticia nel Tableru d'Anuncies

4/5/2001 Ensertao dientro del programa Keltic, (entamáu pola Unión Europea como parte del "añu eurpéu de les llingües") venti llingüistes de dellos países d'Europa van tar hasta mañana nel auditoriu d'Uviéu debatiando del estáu actual de les llingües minoritaries nel territoriu de la Unión. El llamáu "Alcuentru de Llingües y Cultures" ta organizáu pol Gobiernu asturianu dientro de los actos pa conmemorar la "Selmana d'Europa" que va del 3 al 10 de mayu. El Conseyeru de Cultura, Fernández Vallina, dixo na presentación qu'estes xornaes convierten a Asturies nun "centro de intercambio d'esperiencias", "instrumento de concordia" y en "símbolo de convivencia en la diversidad cultural de Europa". Dixo tamién que la convivencia básase nel respetu profundo a toles llingües. Nesi actu tuvo tamién el presidente en funciones de l'Academia de la Llingua, Miguel Ramos Corrada, la vicerrectora d'estensión universitaria y la directora de l'Alianza Francesa

Opina sobre esta noticia nel Tableru d'Anuncies

2/5/2001 La edición d'esti añu del Conciertu pola Oficialidá desbordó toles previsiones. L'asistencia de públicu anduvo peles tres mil persones, viendo que 2.500 compraron la entrada na mesma puerta. Les actuaciones sucediéronse dende les 7 la tarde del sábadu hasta más de les 5 de la mañana del domingu. A lo llargo de la nueche los miembros de la Xunta tuvieron que reponer delles veces de comida y bébora'l chigre (de sidre, vendiéronse sobre 200 caxes). La Xunta, que calificó esta edición como la de más éxitu de xente, quier da-yos les gracies a tolos participantes nel conciertu pola so collaboración desinteresao

Opina sobre esta noticia nel Tableru d'Anuncies

2/5/2001 Según mos informen dende L.laciana, na Casa de Cultura de Vil.lablinu organízase un cursu curtiu de "pal.luezu", que ye'l nome que-y dan na zona a la variante occidental del asturianu (la mesma de Cangas, pa entendenos). El cursu va facese los díes 5 de mayu (sábadu) de 11 a 14 hores y de 17.30 a 19.30 y el 6 de mayu (domingu) de 11 a 11.30. El cursu organízalu la "Asociación de Amigos de Sierra Pambléi" y la inscrición -que ye gratuita pa los socios- cuesta 1.500 pesetes y puede facese na mesma Casa de Cultura. El cursu va impartilu'l profesor Roberto González Quevedo, escritor, académicu y secretariu de l'Academia de la Llingua Asturiana, que ye natural de Palacios del Sil, pueblu del Bierzu Altu onde la fala tradicional ye'l pal.luezu.

Opina sobre esta noticia nel Tableru d'Anuncies

2/5/2001 Organizaes pol Atenéu de La Calzada y la Fundación Municipal de Cultura, empecipiaron esti llunes les VI Xornaes de Llingua y Cultura Asturianes, nes que van participar once escueles de la zona oeste de la ciudá de Xixón. Hasta'l día 11 , dos mil escolinos d'ente 6 y 12 años van desenvolvese actividaes asgaya en tolos centros d'enseñanza (talleres de trastienda y teatru, actuación del grupu Xentiquina), nel centru municipal d'El Natahoyo (talleres de gaita telares, dances, paxos y pesca) y nel Atenéu, onde van tener llugar talleres d'instrumentos musicales, tonada, teatru caseru, actuaciones del grupu musical Xentiquina, el grupu Quiquilimón y actividaes de cuentacuentos. El día 11, como pieslle de les Xornaes, va celebrase en Parque del Lloredal una "Olimpiada de Deportes Autóctonos": Carreres de zancos y sacos, tiru a la rana, tiru cuerda, bolos y l'actuación del grupu Merlín. Tamién en Xixón, la Conseyería de Cultura celebra'l Día de les Lletres, con un actu central consistente nun homenaxe al escritor Pachín de Melás a les 12.30 hores nel Centru de Cultura Antiguu Instituto. Coincidiendo cola Selmana de les Lletres y hasta'l 25 d'esti mes de mayu, la rede de centros municipales va facer tamién delles actividaes ente les que destaca la muestra "Andrés Solar, el llabrador de pallabres", que s'inaugura mañana xueves a les 19.30

Opina sobre esta noticia nel Tableru d'Anuncies