Aconceyóse la Mesa Téunica pa la escolarización del asturianu

25/1/2001 (Redacción) Esta selmana los sindicatos d'enseñanza xunto cola Conseyería aconceyáronse pa la negociación del futuru Decretu d'Escolarización en Llingua Asturiana
L'Alministración apurrió un documentu con dos puntos nos que se recueyen per un lláu los títulos qu'habiliten pa dar la Llingua Asturiana na Primaria y na ESO y per otru recueye los principios del Decretu de Currículu de Llingua Asturiana y del de Cultura Asturiana.
La ufierta educativa sedría la siguiente:
Propónse la ufierta obligatoria d'enseñances de Llingua Asturiana y Lliteratura en tolos centros públicos qu'ufierten enseñances de Educación Primaria y Secundaria Obligatoria (ESO).
Nesti sen, ta ellaborándose una Resolución que regularice la ufierta y la distribución horaria de les distintes materies na Educación Primaria. Na ESO tendrá la consideración de materia optativa. Ye dicir, lo mesmo que se tenía, con dos matices. Tolos centros van tar obligaos a facer la ufierta, y na Primaria va recoyese la voluntariedá positiva. N'Infantil siguirá teniendo una presencia aneudótica, nos Bachilleres nun se cunta de mano facer nada, la FP y la Educación d'Adultos nin se menta.
Sindicatu Unitariu y Autónomu de Trabayadores de la Enseñanza d'Asturies - SUATEA yá entamó una recoyida de firmes col enfotu de presionar a l'alministración nesta tema y que la escolarización de la llingua asturiana seya tomada en serio polos gobernantes.
Con too ello, SUATEA informó que na Mesa Téunica, el representante de la Conseyería reconoció que too esto solucionábase cola Oficialidá de la llingua asturiana, colo que los sindicatos presentes, convidáronlu a que-y presentare al Gobiernu asturianu dicha solución.


Opina sobre esta noticia nel Tableru d'Anuncies

El Conseyu de la Mocedá d'Uviéu cola campaña de SUATEA

25/1/2001 (Redacción) El Conseyu de la Mocedá d'Uviéu , sumóse esta selmana a la reivindicación y campaña que ta entamando SUATEA con motivu de les negociaciones abiertes cola alministración en materia d'escolarización de la llingua asturiana.
El Conseyu de la Mocedá d'Uviéu, pide que la llingua asturiana seya reconocida como una asignatura más del curriculum en tolos niveles educativos non universitarios. Asina, tamién reclamen que los horarios de clase d'asturianu tienen de ser amplios pa ufiertar un serviciu de calidá nel procesu d'aprendizaxe de los escolinos.
Pa finar, esti Conseyu propón crear un decretu que recueya la catalogación y creación xurídica de los puestos de trabayu de profesores de llingua asturiana y que convoquen oposiciones de la especialidá de llingua asturiana.

Opina sobre esta noticia nel Tableru d'Anuncies

El programa "KELTIC" va tar presente nes escueles asturianes

25/1/2001 (Redacción) La Unión Europea aprebó un proyeutu asturianu nomáu "KELTIC" pal estudiu, usu y conocimientu de les llingües europees pa meyorar la comunicación.
Esti proyeutu, que va tar dientro de la cellebración del "Añu de les llingües", cuenta col sofitu de les direiciones xenerales d'Asuntos Europeos, Mocedá y Turismu, l'Ayuntamientu de Xixón y l'Academia de la Llingua asturiana.
L'oxetivu d'esti proyeutu ye potenciar la concencia llingüística de los pueblos europeos, sobremanera del Arcu Atlánticu. Falten por concretase munchos puntos del programa, pero el viceconseyeru d'educación, Iglesias Riopedre, adelantó que les actividaes más rescamplantes van ser un congresu internacional n'Uviéu sobre llingües estranxeres, y dempués en Xixón un alcuentru de llingües y cultures estranxeres. Otres actividaes destacaes van ser l'aprendizaxe d'idiomes al traviés d'internet, amás de concursos nes escueles.

Opina sobre esta noticia nel Tableru d'Anuncies

Celébrense los V Alcuentros nel Cordal

18/1/2001 (Redacción) Esi fin de selmana, 20 y 21 de xineru de 2001 celébrense en Felechosa (Ayer) los V ALCUENTROS NEL CORDAL qu'organicen la Xunta pola Defensa de la Llingua Asturiana (Asturies) y Facendera pola Llingua (Llión).
El programa del fin de selmana va ser el que vien darréu:
Día 20: 16'30 h. Ponencia: Les asociaciones de defensa de les llingües minorizaes y la Internet: un programa d'intervención na Rede pa la Xunta pola Defensa de la Llingua Asturiana. Policarpio Mencía (XDLA).
18'00 h. Mesa redonda: El decretu d'escolarización: l'asturianu na encruciyada de la educación del sieglu XXI. Nel Ricardo Álvarez Morán (SUATEA y XDLA), Jesús Feito Calzón (CC.OO y XDLA) y Maximina Fernández Otero (FETE-UXT). El moderador va ser Llinu Álvarez Santidrián (XDLA).
19'30 h. Ponencia: "Aula de cultura cabreiresa": un trabayu de pedagoxía llingüística. Enrique Soto (FPL).
Día 21: 11'00 h. Ponencia: L'asturianu como llingua vehicular nel Ensiñu Mediu: ente l'anormalidá y la clandestinidá. Xosé Candel (XDLA). c..
12'30 h. Mesa redonda: Dominiu llingüísticu y polítiques llingüístiques. Fernando Álvarez-Balbuena (XDLA), Pepe Hidalgo (FPL), Iván Huerga (XDLA) y Xosepe Vega (FPL). La moderadora va ser Yolanda González Huergo (XDLA).
16'30 h. Mesa redonda: Cinco años de reivindicación llingüística n'Asturies y Llión. Fernando Álvarez-Balbuena (XDLA), Xosé Firmu García Cosío (XDLA), J.M. Gonzalo "Eve" (XDLA) y Xosepe Vega (FPL). Va moderar: David Guardado (XDLA).


Opina sobre esta noticia nel Tableru d'Anuncies

II Premiu de Testos Dramáticos "Xovellanos"

18/1/2001 (Redacción) El teatru Xovellanos de Xixón convoca un premiu de textos dramáticos n'asturianu. Los trabayos han presentase por triplicáu enantes del día 14 de marzu de 2001 a la direición Teatru Xovellanos ( C/ Casimiro Velasco - 23, 33201 Xixón). Esti premiu tien una dotación de 500.000 pesetes y la imprentación de la obra, amás de los 25 exemplares que se-y darán al autor.
Na edición del añu pasáu esti premiu quedó ermu, yá que'l xuráu consideró que nenguna obra de les presentaes cumplía los requisitos mínimos pa concedé-y el premiu.


Opina sobre esta noticia nel Tableru d'Anuncies

A vueltes cola dimisión de Xosé Lluis García Arias

18/1/2001 (Redacción) Xosé Lluís García Arias qu'abandonó'l so cargu de presidente de l'Academia de la Llingua Asturiana dempués de venti años, lleva tola selmana recibiendo apoyu y reconocimientu de toles estayes importantes de la sociedá asturiana.
Dende representantes políticos de los cuatro grupos parllamentarios, representantes de munches de les asociaciones de calter asturianista, pasando por escritores, xente del mundu de la cultura, hasta los sos propios collacios de trabayu na Universidá d'Uviéu o l'Academia, collacios qu'aidaron a algamar xunto con él esos oxetivos pergrandes que l'Academia se marcare nestos venti años.
Dempués d'esta dimisión por sorpresa, l'Academia tien de cellebrar una Xunta estraordinaria pa escoyer a un nuevu presidente. Hasta esa fecha, que podría ser enantes del Día de les Lletres, va facese cargu d'esta institución el direutor de la UNED n'Asturies, el profesor y Vicepresidente de l'Academia, Miguel Ramos Corrada.

Opina sobre esta noticia nel Tableru d'Anuncies

Alderique na Universidá sobre Llingua asturiana y Política

11/1/2001 (Redacción) El Circulu Hermenéuticu del Seminariu d'Estética y Semiótica (Seys) organizó esti miércoles 10 de xineru un alderique sobre "Llingua y política n'Asturies: la estraña parexa", a cargu d'Amable Concha, abogáu, y Xandru Fernández, escritor y profesor de filosofía. L'actu foi nel Campus del Milán, Facultá de Filosofía, aula 07, de la Universidá d'Uviéu. Esta foi la primera charra d'un ciclu de tres.
Les siguientres van ser el día 17 de xineru col títulu de " En cuentes de la definición de cultura", a cargu de Roberto González-Quevedo y la última va ser la del día 24, tamién d'esti mes, de Ramón d'Andrés que va a falar de les "Claves de sociollinguística asturiana".
Estes tres charres tan organizaes en collaboración cola Xunta pola Defensa de la Llingua Asturiana.


Opina sobre esta noticia nel Tableru d'Anuncies

Estrena de la páxina web del Conseyu la Mocedá de Xixón

11/1/2001 (Redacción) Conseyu la Mocedá de Xixón ( CMX ) estrenó fae unos díes la so páxina web cola dirección www.cmx.as pa dar más cobertura d'información y asesoramientu a toles asociaciones xuveniles de la ciudá de Xixón
Esta páxina presenta, ente otres, delles seiciones como les de ¿Qué ye'l Conseyu?, Centru de Recursos Mozu, Información sobre l'asociacionismu, Rexistru d'Asociaciones, Actividaes y Actualidá. Esta páxina pue consultase dafechu n'asturianu o castellán sigún se quiera.
Ún de los recursos qu'ufierta d'interés pa les asociaciones de la ciudá ye'l Centru de Recursos Mozu que tien toa esta riestra de recursos pa quien los quiera usar; Servicios: Salón d'Actos, Aula formativa, Aula informática, serviciu de Fax, serviciu de Reprografía y Encuadernación y el Puntu d'información xuvenil del Ária Moza de Xixón, Hotel d'Asociaciones, Asesoríes: Fiscal y cuntable y de Xestión d'asociaciones, amás de tener una Sala d'Esposiciones.

Opina sobre esta noticia nel Tableru d'Anuncies

La Casa Conceyu de Mieres quier potenciar l'asturianu

11/1/2001 (Redacción) El conceyu de Mieres quier impulsar l'usu de la llingua asturiana nel so conceyu con campañes propies y sofitando les dos que la Conseyería de Cultura punxo en marcha'l mes pasáu.
La nueva conceyala de Cultura va ser la encargada de consolidar estes iniciatives. Lo primero que va facer ye poner en marcha cursos, d'iniciación y perfeccionamientu na Casa de Cultura. Estos cursos sedríen les primeres midíes pa fomentar l'usu del nuestru idioma, anque la conceyala yá declarare que nun sedríen les úniques que va tomar.
Nesti conceyu tamién se puen ver les campañes de Nomes y apellíos con terminoloxía asturiana y la de mercar llibros y música n'asturianu de la Conseyería de Cultura.


Opina sobre esta noticia nel Tableru d'Anuncies

Presentación del númberu 8 de la revista "El Canciu'l Cuélebre"

11/1/2001 (Redacción) El Canciu'l Cuélebre ye una revista cultural espublizada pol Conceyu pol Estudiu y Proteición de la Llingua Asturiana que ta acabante de presentar el so númberu 8 de la revista nel Centru Asturianu de Madrid.
La presentación tuvo a cargu de María Xesús Llope, presidenta'l CEPLA, David Rivas, académicu de la Llingua Asturiana, Xuan Porta, direutor de la revista y Xaviel Vilareyo, escritor y collaborador na revista.
La revista presenta nesti númberu trabayos sobre Hestoria d'Asturies, Natura, Vezos, Arqueoloxía, Llingües, Toponimia y una estaya lliteraria.

Opina sobre esta noticia nel Tableru d'Anuncies

El Serviciu de Traducción del Conseyu de la Mocedá de Xixón pieslla

4/1/2001 (Redacción) El serviciu de traducción que punxo en marcha'l Conseyu la Mocedá de Xixón ( CMX ) nun plazu de tres meses pieslla agora con una gran demanda de trabayu.
Esti serviciu que fexo más de cincuenta encargos de traducciones de diferentes asociaciones y organizaciones del conceyu de Xixón, nun va seguir teniendo continuidá yá que la subvención que recibiera terminó. Agora l'oxetivu ye volver a abrir esti serviciu de la forma que seya, con subvención de l'Alministración Local o del Principáu. Los impulsores d'esta iniciativa, Xunta Moza y CMX, esixen qu'esti avance social se consolide y nun desapaeza más.
Per otru llau, Xunta Moza pide qu'esti serviciu de traducción s'incluya como un serviciu más nuna Oficina de Promoción del Asturianu dependiente y creada pola alministración local, como garantía de que lo que se faiga pol asturianu y la normalización social se faga bien y nun se tiren les perres en campañes o actividaes que nun tienen nada que ver cola llingua asturiana.
A esti respectu, la Xunta pola Defensa de la Llingua Asturiana, denunció'l gastu de dineru destináu al asturianu nun llibru de la Selmana Negra editáu en castellán, ensin que los responsables dieren nenguna esplicación.

Opina sobre esta noticia nel Tableru d'Anuncies

L'asturianu presente nel partíu de la selección asturiana

4/1/2001 (Redacción) Nel partíu de fútbol de la selección asturiana, la Xunta pola Defensa de la Llingua Asturiana fexo actu de presencia con un despliegue de pancartes en tol campu de fútbol pidiendo la oficialidá del idioma asina como respetu a los asturiano-falantes.
Nun ambiente totalmente folixeru, militantes de la Xunta y Xunta Moza diéron-y un toque reivindicativu a ún de los acontecimientos hestóricos vivíos nel añu 2000, la recuperación de la Selección Asturiana de fútbol.
Esti despliegue reivindicativu féxose con total normalidá y ensin qu'hubiere nengún incidente, disfrutando del trunfu de la selección y d'un actu de protesta pola discriminación que padez la llingua asturiana.


Opina sobre esta noticia nel Tableru d'Anuncies

La Escuela Horizontal estrenó páxina web

4/1/2001 (Redacción) La Escuela Horizontal de Llingua y Cultura Asturianes asitiada n'Uviéu ta acabante de presentar na rede la so páxina web con seiciones sobre la fala del Navia-Eo y l'asturianu oriental. Dientro de pocu tiempu tamién van poder vese seiciones sobre'l bloque occidental n'Asturies y Llión y la llingua mirandesa.
La Escuela Horizontal de Llingua y Cultura Asturianes son un garrapiellu de persones que tienen un enfotu n'afondamientu de la conocencia de toles estayes de la cultura llariega de la nuestra tierra. Esta escuela llámenla Horizontal porque fuxe del modelu de tresmisión unidireccional del conocimientu; nesta escuela nun hai mayestru, yá que según dicen na so páxina "el mayestru ye en cada momentu la presona que tien daqué que dicir sobro la tema de la que se tea falando; na nuesa escuela nun se respeta nengún poder que nun seya l'autoridá del sabiu".


Opina sobre esta noticia nel Tableru d'Anuncies