Bienveníos al espaciu de la llingua Asturies.com ofrezte, en collaboración con Ramón d'Andrés y Espaciu y Tiempu, información sobre l'actualidá y les novedaes lliteraries referíes a la llingua asturiana. Si tienes dalguna información que crees que paga la pena que seya conocida escribi.

28/1/2000(Redacción Asturies.com) Cola novela Mimí al volante Milio Cueto algamó'l primer premiu nesti prestixosu concursu, el de más dotación economica de tol Estáu al que se prerentaron noveles escrites en toles llingües oficiales. Dase la paradoxa de que Milio Cueto, conocíu pola so obra n'asturianu, nun pudo presentase al premiu na nuesa llingua desque, al nun ser ésta una llingua oficial, nun s'almite a concursu. Eso sí, la obra de Cueto va espublizase nes cuatro llingües oficiales del Estáu y en braille.

21/1/2000(Ramón d'Andrés) La revista Lliteratura, de l'Academia de la Llingua Asturiana, con motivu del pieslle del presente mileniu ve conveniente entamar unes Xornaes sobre la situación actual de la producción lliteraria n'asturianu y les sos posibilidaes de futuru. Trátase de xornaes abiertes a toles persones interesaes na nuesa cultura y que, baxo'l títulu xenéricu de "La lliteratura asturiana a lo cabero'l sieglu XX", desendolcaránse los díes 26, 27 y 28 de xineru del 2000 acordies col siguiente programa:

MIÉRCOLES 26
-A les 18,00 hores: Presentación
-A les 18,15 hores: Conferencia "La creación lliteraria", por Carmen Gómez Ojea.
-A les 19,00 hores: Comunicaciones
-Héctor Xil: "Posibilidá y perspectives d'una lliteratura n'asturianu en Lleón".
-Esperanza Mariño Davila: "Silvia la Negra. Rellatos".
-Helena Trejo: "Influencia positiva del cuentacuentos na conocencia de la llingua asturiana".
-Xosé Lluis Campal: "Les noveles curties de Miguel Solís Santos".
-A les 20,00 hores: Descansu.
-A les 20,15 hores: Conferencia "Un comentariu al teatru n'asturianu: les dos décades caberes", por Roberto Corte.

XUEVES 27
-A les 18,00 hores: Conferencia "La narrativa n'asturianu", por Adolfo Camilo Díaz.
-A les 19,00 hores: Conferencia "El llibru electrónicu: nueves posibilidaes pal asturianu n'Internet", por David Guardado.
-A les 20,00 hores: Descansu.
-A les 20,15 hores: "Lliteratura infantil", por Severino Antuña.

VIENRES 28
-A les 18,00 hores: Conferencia "La poesía asturiana cara al 2000", por Xabiero Cayarga.
-A les 19,00 hores: Descansu.
-A les 19,15 hores: Mesa redonda "La edición de llibros n'asturianu". Participen: Alborá Llibros, Ámbitu, Editora del Norte, Llibros del Pexe, Trabe, Vtp Ediciones.
-A les 20,30 hores: Pieslle. Intervienen: Presidente de l'Academia de la Llingua Asturiana, Alcaldesa del Conceyu de Xixón y Conceyala d'Educación.

Toles conferencies y comunicaciones fadránse nel Taller 4, 1er. pisu del Centru de Cultura Vieyu Institutu, C/ Xovellanos, 21, Xixón.

21/1/2000(Asturies.com) La selmana pasada la comisión d'espertos axuntada nel Seminariu d'Uviéu dio anuncia de que la traducción de la Biblia interconfesional (válida pa católicos y protestantes) dende los testos orixinales va acabar los sos trabayos d'equí a poco, poniéndo-y puntu a un trabayu qu'entamó nel añu 1985 y nel que participaron espertos en traducción del hebréu. Esta traducción supón la obra de traducción más importante fecha hasta agora.

14/1/2000(Asturies.com) Como yá informáramos nesta sección, el debate sobre l'asturianu na futura TV asturiana ye ún de los puntos sobre los que nun hai alcuerdu na negociación que tán llevando a cabu los grupos parllamentarios (sacante'l PP que s'autoescluyó de la comisión). IU defende un 50% de programación n'asturianu mentes que'l PSOE nun especifica porcentaxes y caltién qu'ha aplicase la llei d'usu y que seyan los muérganos de dirección los qu'establezan los porcentaxes.

14/1/2000(Asturies.com) L'Academia de la Llingua Asturiana infórmanos que se convoca pal próximu 29 de xineru del 2000 la prueba de conocencia de la llingua asturiana. L'examen fadráse na E.U. de Maxisteriu a las 9'30 de la mañana. El plazu de matrícula ábrese del 17 al 27 de marzu.

Pa matrículase fai falta una semeya tipu carné y cubrir un impresu. L'importe son 2.000 ptes. Pa más información llamái a l'Academia de la Llingua Asturiana. Tfnu. 985.21.18.37 o escribir un e-mail a alla@asturnet.es

7/1/2000 Según datos de fontes cercanes a la Dirección Xeneral d'Educación y les escueles concertaes d'Asturies entamarán la progresivamente la introducción del asturianu nel cursu qu'entra. Nel diseñu del procesu tán interviniendo los sindicatos d'enseñanza y l'Academia de la Llingua. Paez que'l gobiernu inda nun tien claro como llevar a les aules d'enseñanza secundaria la llingua.