L'asturianu reconocíu como llingua por España

7/12/2000 (Redacción) La Xunta pola Defensa de la Llingua Asturiana asociación cívica que trabaya pola cultura y l’idioma tradicional d’Asturies, quexo facer públicu’l so posicionamientu so la redacción última de la Carta Europea de les Llingües Rexonales o Minoritaries, fecha n’Estrasburgo’l 5 de payares de 1992 y so'l posicionamientu qu’España, na so declaración, tomó pa con ella y aprebó: "tamién s’entienden por llingües rexonales o minoritaries les que los estatutos d’Autonomía d’Aragón, Asturies y Cataluña, protexen y amparen nos territorios onde tradicionalmente se falen, lo que pa la llingua asturiana supón un respaldu más, nesti casu del Congresu de los Diputaos, y que reconoz, como yá se vien diciendo dende hai años, l’estatus de llingua que tien l’asturianu.
Dao que n’Asturies y n’España tovía esisten persones, estratéxicamente posicionaes nes “altes esferes”, que tovía siguen espardiendo la idea de que l’asturianu ye un dialectu más del castellanu y negando la categoría de llingua que científica y llegalmente tien, taría bien que los responsables d’estes opiniones rancies y insolventes fexeran un pequeñu esfuerzu d’actualización de datos, revisando la redacción d’esta Carta Europea y de la Llei d’Usu y Promoción del Asturianu del 23 de marzu de 1998.
D’otra banda tamién nos diriximos a les autoriades asturianes pa que faigan tolo posible pa que l’idioma asturianu tenga la importancia que merez y que se pongan les bases suficientes pa la so sobreviviencia, esto ye, una declaración d’oficialidá pa garantizar el futuru d’esta parte fundamental de la cultura asturiana y de los derechos de los que la falamos".

Opina sobre esta noticia nel Tableru d'Anuncies

El Mirandés entra nel mercáu editorial

30/11/2000 (Reis Quarteu-Redacción) La editorial portuguesa Campo das Letras va espublizar una colección dedicada a llibros orixinales escritos na llingua mirandesa. Los dos primeros exemplares acaben d'editase y constitúin una novedá nel mercáu editorial portugués.
Jorge Araújo, responsable de la editorial, reconoz que se trata de «un apueste de riesgu», sobremanera pol escasu númberu de falantes de la llingua. Esta colección ta dirixida por Amadeu Ferreira, Facultá de Drechu de Lisboa y autor de testos en mirandés dende 1975, cuando escribió la obra Oubreiros i Camponeses, que foi representada en Sendin y transmitida pela RTP.
La colección abre con Cebadeiros, llibru de poemes d'Amadeu Ferreira. Nel mesmu tiempu foi editáu Cuntas de la Tierra de las Faias, cuentos d'António Bárbolo Alves, profesor de portugués. António Alves, estudiosu del mirandés, ye co-autor de la Convenção Ortográfica da Língua Mirandesa y ta preparando una tesis de doctoráu sobre los cuentos na lliteratura oral mirandesa. La colección va incluyir, nuna primera fase, cinco obres de poesía, ficción, ensayu y una gramática de la llingua mirandesa.
Dende 1999 el mirandés ye, por decretu-llei aprobáu pela Asamblea de la República, la segunda llingua oficial de Portugal.

Opina sobre esta noticia nel Tableru d'Anuncies

Homenax en Cabranes al poeta "Lin de Lon"

30/11/2000 (Redacción) Nel conceyu de Cabranes fexeron un homenax a Jesús Arango que nació en Torazu en 1869 y que foi alcalde republicanu en 1909, amás de ser periodista y poeta n'asturianu. Esti últimu foi'l motivu del homenax; "Lin de Lon", como se facía llamar Jesús Arango, foi un poeta con muncha producción poética y foi mui popular naquella dómina.
En 1906 fundó l'afamáu periódicu "El Eco de Cabranes" del que yera tamién el so direutor y dende les páxines del periódicu lluchó contra'l caciquismu y a favor de la escolarización de tolos neños de seis a doce años.
Nestes xornaes tuvieron Senén Rivero y José Luis Campal, que respeutivamente, falaron de La prensa local d'entamos de sieglu y de les Motivaciones poétiques de Jesús Arango.


Opina sobre esta noticia nel Tableru d'Anuncies

La Xunta pieslla los terceros cursos de formación

23/11/2000 (Redacción) La Xunta pola Defensa de la Llingua Asturiana, pieslla esta fin de selmana (díes 25 y 26 de payares) los sos terceros cursos de formación que yá entamaren hai tres selmanes en Perlora. Y ye xustamente nesti llugar onde se van aconceyar pa tratar sobre delles cuestiones.
El cursu entama'l sábadu qu'entra a les 11 la mañana na Ciudá Residencial, nel albergue que tien acondicionáu esta entidá. El cursu finará'l domingu y el preciu va ser de 3.500, entrando nesti preciu: dos xintes, una cena y un almuerzu, amás de la nueche nel albergue.
La Xunta, quier con estos alcuentros, reflesionar sobre dellos temes rellacionaos col movimientu llingüísticu, asina los conteníos del cursu van ser los que vienen darréu: "El movimientu de reivindicación llingüística n'Asturies (1970-2000)", "Cómo diseñar una política llingüística. Qué ye y cómo trabaya un Serviciu de Normalización Llingüística", " El lmovimientu de reivindicación llingüística y los medios de comunicación: rellaciones y propuestes d'actuación".

Opina sobre esta noticia nel Tableru d'Anuncies

Xornaes de Lliteratura Asturiana en S.M.R.A

23/11/2000 (Redacción) Nel conceyu de Samartín del Rei Aurelio entamaron esta selmana les V Xornaes de Lliteratura Asturiana, que tan organizaes pol Ayuntamientu d'esti conceyu de la cuenca'l Nalón. Les ponencies preséntense toes na Biblioteca Pública de L'Entregu a les 19 hores.
Esti añu tan dedicaes a "Lliteratura y Muyer" y abriéronse con dos ponencies, una de Elena Lorenzo y otra de Marga Alonso que respeutivamente tituláronse: "Una muyer del sieglu XVIII: Xosefa Xovellanos" y "El papel de la muyer nel resurdimientu de la llingua asturiana".
Les prósimes charres van tener como ponentes a Montserrat Garnacho "Elles tienen la pallabra" y a Esther Prieto que va falar de "Les escritores asturianes nos últimos 25 años".

Opina sobre esta noticia nel Tableru d'Anuncies

La Tertulia Cultural El Garrapiellu entrega'l premiu de "Cuentos Curtios"

23/11/2000 (Redacción) La Tertulia Cultural El Garrapiellu concedió esti pasáu 16 de payares el primer premiu del so Novenu Concursu de Cuentos Curtios , al escritor xixonés Quique Faes cola obra "María Vinagre tien un mal". El xuráu, compuestu por personalidaes de la cultura asturiana como Adolfo Camilo Díaz, Carme Martínez Pérez, Xuan Porta Allende y el secretariu de la T. C. El Garrapiellu, Dubardu Puente Fernández, tamién decidió concedé-y un áccesit al cuentu nomáu: "El secretu d'amasar llunes, de la xixonesa Llucía Fernández Marqués. Dase la circunstancia que Quique Faes ya foi ganador del segundu premiu nel Cuartu Concursu de Cuentos Curtios. El so cuentu premiáu "La ñeve d'avientu", recuéyese nel llibru "Cuentos Curtios" espublizáu colos cuentos premiaos nos cincu primeros años d'esti certamen. L'enfotu de la T.C. El Garrapiellu ye espublizar un nuevu llibru qu'atropará los caberos cuentos premiaos nes siguientes cinco ediciones, que se va completar l'añu qu'entra, coincidiendo cola décima edición.

Opina sobre esta noticia nel Tableru d'Anuncies

Declárase ermu'l premiu "Máximo Fuertes Acevedo"

23/11/2000 (Redacción) El xuráu del premiu "Máximo Fuertes Acevedo d'Ensayu" declaró ermu, igual que la selmana pasada'l "Xosefa Xovellanos de Novela". La edición d'esti premiu cumple esti añu'l so décimu aniversariu tuvieron como miembros del xuráu, ente otros a, Xuan Carlos Busto, Roberto Glez. Quevedo, Milio Rodriguez y como presidenta Ana Rodriguez Navarro, Direutora Xeneral de Cultura.
Nesta vegada, el xuráu concedió un áccesit a la obra "La memoria de les dos orielles (Una aprosimación al estudiu de les xeneraciones astur-cubanes)", del escritor asturianu Miguel Solís Santos. El xuráu reconoció-y el so trabayu, asina como la rigurosidá documental y ambición espositiva.
Opina sobre esta noticia nel Tableru d'Anuncies

Los premios "AMIGO" marxinen l'asturianu

16/11/2000 (Redacción)

Los Premios de la Música que concede añalmente la "SGAE", (Sociedá Xeneral d'Autores y Editores d'España), entregó estos Premios nuna gala retransmitía pelos medios informativos. Nesta edición tuvieron espresamente marxinaes y materialmente vetaes del llistáu de nominaciones y pa les diverses categoríes de premios. les canciones escrites o canciaes na llingua asturiana. La Sociedá d'Autores entregó 31 premios que fueron dende'l meyor autor de música pop hasta unos novedosos premios a la meyor canción en catalán, meyor canción n'eusquera y meyor canción en gallegu, marxinando con ello tola producción discográfica editada en llingua asturiana, que nun cuntó con premiu específicu nin polo tanto con promoción mediática. Too ello col agravante de qu'esta sociedá d'autores recibe abondos beneficios económicos provinientes de la mesma industria discográfica asturiana y de la edición de música canciada en llingua asturiana, como de munchos artistes asturianos que nalgún trabayu de so emplegaron esta llingua como ye'l casu de Victor Manuel, qu'anguañu ye un destacáu y activu miembru d'esta Sociedá d'Autores. Artistes gallegos, catalanes, vascos y otros autores en llingua castellana vense beneficiaos pola promoción mediática d'estos premios mentantu que los artistes asturianos que fain el so trabayu en llingua asturiana tán marxinaos dafechu d'estos premios, ñegándose-yos la presencia n'estos premios musicales. La inesistencia d'una categoría especial dientro de les nominaciones a la meyor canción en llingua asturiana pon de manifiestu la vergoña interesao y la marxinación sistemática que sufre la nuestra llingua y el conxuntu del pueblu asturianu que ve cómo se releguen a les canciones asturianes n'asturianu nestes ediciones de los premios de la música española.

Opina sobre esta noticia nel Tableru d'Anuncies

Esta selmana falláronse los premios "Xuan María Acebal" de poesía y "Xosefa Xovellanos" de novela

16/11/2000 (Redacción) Los premios de novela y poesía que la Conseyería de Cultura entrega tolos años premió a dos escritores y dio un áccesit a otru nesta vegada. El premiu de poesía "Xuan María Acebal" foi dáu, esti añu, ex aequo pa dos conocíos escritores asturianos que yá cunten con dellos premios na so biografía lliteraria, como son Xandru Fernández cola obra "Servidume" y Xuan Xosé Sánchez Vicente con "As de corazones yes".
Per otru lláu, el premiu de novela "Xosefa Xovellanos" foi declaráu "ermu" esti añu, anque concedióse-y un áccesit de 250.000 pesetes al escritor de Samartín del Rei Aurelio, Pablo Rodríguez cola obra "Ente semeyances".
Estos premios tan dotaos con 700.000 pesetes y la espublización de la obra de los ganadores.

Opina sobre esta noticia nel Tableru d'Anuncies

La tercer selmana de la Llingua y Cultura asturianes, cellébrase en Grau

16/11/2000 (Redacción) La llingua y la cultura asturiana van tar presentes esta selmana nel conceyu de Grau, onde s'entamaron esti martes unesXornaes de Llingua y Cultura Asturianes. Los actos tan faciéndose na Casa de Cultura del conceyu y van durar hasta esti vienres 17 de payares. Estes xornaes quieren ayudar a la recuperación y promoción de la cultura asturiana y la so presencia nel conceyu de Grau. Les actividaes que tan programaes son, ente otres, un taller d'ellaboración de platos típicos asturianos, un recital de tonada y delles conferencies de calter llingüísticu como van ser les de Xosé Ambás y Xosé Lluis García Arias que falarán de "la variante llingüística de Grau" y sobre "la toponimia de Grau" respeutivamente.

Opina sobre esta noticia nel Tableru d'Anuncies

Educación abre una convocatoria pa mayestros d'asturianu

16/11/2000 (Redacción) La Conseyería d'Educación abrió esta selmana una bolsa de trabayu del Cuerpu de Mayestros de la especialidá de llingua asturiana. Esta ye la primer vegada que la Conseyería fae una convocatoria esclusiva d'asturianu y va servir pa que se cubran les vacantes qu'hai nesti intre nes escueles y tamién pa cubrir les baxes de mayestros/es, col propósitu de que nengún escolín d'asturianu quede ensin escolarizar.
Podría dicise qu'esti ye un pasín más nel difícil y sele procesu d'escolarización en llingua asturiana, que ye ún de los pegoyos más importantes na normalización del idioma.

Opina sobre esta noticia nel Tableru d'Anuncies

El Premiu "Teodoro Cuesta" va pa Xabiero Cayarga

9/11/2000 (Redacción) L'escritor Xabiero Cayarga, de Cangues d'Onís, algamó esti martes 7 de payares el X Premiu de poesía "Teodoro Cuesta" cola obra "Pequeña Europa". El ganador d'esti premiu va recibir la cantidá de 400.000 pesetes y la espublización de la obra. Xabiero Cayarga yá tien asoleyaes delles de les sos obres, como "Güelgues sobre'l llagu" o "Les gatileres del cielu". Ye ún de los escritores asturianos más mozos y con un futuru, nel mundu la poesía, más prometedor.
Esti añu'l premiu cumple diez años y ente los ganadores d'otros años destaquen escritores de nivel como Pablo Antón Marín Estrada, Berta Piñán, Xuan bello, ente otros.
El premiu ye'l más prestixosu de los qu'esisten n'Asturies sobre temática poética y organízalu'l Conceyu de Mieres al traviés de la Casa Cultura "Teodoro Cuesta".

Opina sobre esta noticia nel Tableru d'Anuncies

Los díes 25 y 26 d'esti mes, la "Xunta" en Perlora

9/11/2000 (Redacción) La Xunta pola Defensa de la Llingua Asturiana va facer los díes 25 y 26 de payares, el II Nivel de los cursos de formación de la Xunta y que s'asitiarán, igual que los del primer nivel, en Perlora (Carreño).
El preciu d'estos cursos ye de 3.500 pesetes, y nesi preciu entra la pensión completa de tol fin de selmana. Nos cursos trataránse temes de sociollingüística, asina como un cursu d'afondamientu d'asturianu y dellos temes más. Los cursos van tar abiertos a cualisquier interesáu/ada.
La xente que quéria, pue apuntase mandando un email a cualisquier d'estes direiciones: xunta_aviles@asturies.org, xunta_llangreu@asturies.org, xunta_xixon@asturies.org.

Opina sobre esta noticia nel Tableru d'Anuncies

Avilés y Riosa entamen cursos de llingua asturiana

9/11/2000 (Redacción) La llingua asturiana cada vuelta se pue deprender en más sitios. Coles ayudes de la Conseyería de Cultura del Principáu d'Asturies tan poniéndose en marcha dellos cursos d'asturianu en bien de conceyos. Dos exemplos que valen de muestra puen ser los d'Avilés y Riosa.
Nesti últimu, yá entamó esti sábadu pasáu, un cursu d'aniciu p'adultos y que va tener llugar tolos sábados na Casa Cultura d'esti conceyu.
Per otru lláu, el Conceyu d'Avilés abrió'l plazu de matrícula pa un cursu d'iniciación y otru de perfeccionamientu de llingua asturiana. La fecha d'entamu ye'l día 20 de payares y acaba'l 20 d'avientu y los interesaos puen apuntase hasta'l día 17 d'esti mes. El cursu va dáse nel Institutu José Antonio Suances (Maestría).

Opina sobre esta noticia nel Tableru d'Anuncies

El númberu 17 de la revista Lliteratura yá ta na cai

9/11/2000 (Redacción) L'Academia de la Llingua Asturiana, acaba d'espublizar el númberu 17 de la revista Lliteratura. Esta revista de lliteratura cumplió esti añu'l so décimu aniversariu. Nesti númberu apaecen rellatos de Xulio Viejo, Xabiero Cayarga y Carmela Greciet; amás podemos atopar tamién, poemes de Xosé Bolado y Chechu García. Tamién collaboren nesti númberu, Albino Suárez, Loreto Díaz y Vicente García Oliva.

Opina sobre esta noticia nel Tableru d'Anuncies

El líder del PCE echa contra l'asturianu

2/11/2000 (Redacción) Francisco Frutos, Secretariu Xeneral del Partíu Comunista d'España fexo unes declaraciones descalificantes contra l'asturianu. Paco Frutos utilizó la defensa del asturianu que fae Gaspar Llamazares pa metese con él.
Ente les ayalgues que soltó pela boca el que fuera candidatu a la sucesión de Julio Anguita dixo que " el bable ye una llingua del pueblu asturianu, sí, pero que ye un poco risible que se quiera resucitar un idioma nuevu". Nestes declaraciones Paco Frutos nun dexa mui claro cómo recuperar un idioma nuevu, pero que, por otra parte, nun ye una teoría orixinal d'él yá que con estes declaraciones, esti catalán con fama de comunista ortodoxu súmase a una llista bien llarga de políticos qu'ofenden a la llingua asturiana y a los asturiano-falantes, como puen ser ente otros: Isidro Fdez.Rozada, Jordi Pujol, Tini Areces, Celestino Suárez, etc.
El retruque de Gaspar Llamazares, actual coordinador d'IU foi d'una manera más correcta y educada, falando n'asturianu nuna parte de la so intervención na Asamblea Federal de la coalición y amosando que l'idioma asturianu ye tan dignu como'l catalán.

Opina sobre esta noticia nel Tableru d'Anuncies

Les asociaciones xuveniles de Xixón yá tienen serviciu de traducción

2/11/2000 (Redacción) Nel Centru de Recursos de Xixón yá entamó'l serviciu de traducción al asturianu que se punxo en funcionamientu gracies a un plan estacional y con una duración de tres meses. Esta oficina de torna ta al serviciu de toles asociaciones xuveniles y culturales de la ciudá de Xixón que querian traducir testos al asturianu de cualisquier actividá o documentu que fagan.
Esta oficina, ye ún de los servicios que demandaba'l movimientu asociativu xixonés dende va tiempu y qu'al traviés del Conseyu de la Mocedá de Xixón se fexo realidá. Lo que se quier algamar nestos tres meses na que la oficina va tar abierta, ye que se rexistre una gran demanda col propósitu de que l'ayuntamientu seya'l qu'ufierte, nun futuru, esti serviciu a tola ciudadanía.

Opina sobre esta noticia nel Tableru d'Anuncies

La "Xunta" entama los cursos de formación del añu 2000

2/11/2000 (Redacción) La Xunta pola Defensa de la Llingua Asturina va entamar por tercer añu seguíu los cursos de formación, que tan dirixíos tanto a militantes como a simpatizantes y demás persones que tean interesaes y nun pertenezan a l'asociación.
Nestos cursos trátense temes sociollingüísticos, aspeutos llegales, filolóxicos y pedagóxicos siempre relacionaos cola llingua asturiana. Los cursos tienen dos niveles y van dase en feches diferentes. El primeru d'ellos va ser esti fin de selmana, díes 4 y 5 de payares. El segundu fadránse los díes 25 y 26 d'esti mesmu mes. Toos ellos allugaránse na Ciudá residencial de Perlora.
Si tas interesáu/da, pues apuntate mandando un email a cualisquier d'estes direiciones:xunta_aviles@asturies.org, xunta_llangreu@asturies.org, xunta_xixon@asturies.org.

Opina sobre esta noticia nel Tableru d'Anuncies

L'asturianu sí esiste pa un tribunal de Barcelona

2/11/2000 (Redacción) Un tribunal de Barcelona torgó a unos padres poné-y al so fíu'l nome de "Nacho", ente otres razones porque n'asturianu la pallabra "nacho" ye un axetivu calificativu sinónimu de "chatu" o "cortu" y taría prohibío por perxudicar oxetivamente al neñu.
Paez ser que pa ésti tribunal de Cataluña, l'asturianu sí esiste y pue ser decisivu a la hora de tomar una decisión xudicial, mui diferente a la opinión que tien un paisanu de la mesma tierra que'l tribunal, como Paco Frutos que fexo unes declaraciones a la escontra l'idioma asturianu la selmana pasada. Sobre esta tema, podemos informavos que varios internautes asturianos yá tán mandándo emails a la páxina personal del dirixente comunista pa facé-y llegar el maltar poles sos declaraciones.

Opina sobre esta noticia nel Tableru d'Anuncies