Entama'l cursu d'asturianu per Internet

26/10/2000 (Redacción) Na páxina web Espaciu y Tiempu va entamar esti xueves 26 d'ochobre, el cursu d'asturianu per internet.
Esti cursu ye una versión nueva d'otros que se fexeren dende va tres años. El temariu consta de doce temes y como novedá presenta una metodoloxía mui afayadiza pa los internautes que lu sigan; van poder facelu escoyendo'l so propiu ritmu d'estudiu. Amás va poder consultase duldes vía email col coordinador del cursu. Pa poder facer estes consultes o aportar suxerencies hai qu'apuntase en Llingua-list.
Otra novedá ye una sección nueva que se va llamar L'Enceráu y que toles selmanes fadrá reparu en puntos interesantes pal correutu deprendimientu del idioma.
El cursu ta iguáu por David Guardado, llincenciáu en filoloxía, y Lluis Orviz, diplomáu en Maxisteriu y espertu en llingua asturiana.

Opina sobre esta noticia nel Tableru d'Anuncies

L'asturianu yá entró en La Carta europea de les llingües minorizaes

26/10/2000 (Redacción) L'asturianu yá ta presente en La Carta de les llingües rexonales y minoritaries. Esti fechu que reconoz al nuesu idioma como llingua a protexer foi aprobáu por unanimidá pola Comisión d'Asuntos Esteriores del Congresu español xunto col aranés y l'aragonés. Dáse la paradoxa que nel casu del asturianu ta reconociéndose-y como llingua en tolos ámbitos y organismos oficiales europeos demientres, equí n'Asturies, nun se quier nin falar d'oficialidá por parte de les instituciones, nin tampoco en dalguna institución estatal como pue ser el Conseyu d'Universidaes que prohibe crear la llicenciatura de filoloxía asturiana.

Opina sobre esta noticia nel Tableru d'Anuncies



La Xunta pola llingua yá prepara los "Andrés Solar"

26/10/2000 (Redacción) La Xunta pola Defensa de la Llingua Asturiana va aconceyase esti fin de selmana en Xixón en convocatoria estraordinaria cola fin d'acordar los XIV Premios Andrés Solar. Esta organización cívica entrega tolos años dos premios en memoria del desaparecíu y mui queríu escritor xixonés Andrés Solar que-yos dio'l nome.
Ún de los premios ye El Pegoyu, que se-y da a la entidá, empresa, coleutivu o persona que fexera una llabor positiva y importante pol espoxigue del asturianu a lo llargo l'añu o na so trayectoria. L'otru premiu ye la Madreña Purpurina "el madreñazu", que ye un premiu negativu pa los que destacaren por despreciar l'idioma, por incumplir derechos llingüísticos o poner pilancos na recuperación de la llingua asturiana.
Esta redacción informará nes selmanes vinientes la identidá de los ganadores asina como'l llugar onde se va cellebrar l'actu d'entrega.

Opina sobre esta noticia nel Tableru d'Anuncies

Acaben les << XIX Xornaes d'estudiu >>

26/10/2000 (Redacción) L'Academia de la Llingua Asturiana peslló les XIX Xornaes d'estudiu cola presentación d'ún llibru nuevu de Xosé Lluis García Arias, "Propuestes Etimolóxiques" que recueye un bon númberu d'artículos de problemes etimolóxicos dende 1975 hasta'l 2000. Tamién nestes xornaes féxose un homenaxe al escritor de los años 50 y 60 Antonio García Oliveros,presentando una obra completa qu'axunta tres títulos. La presentación foi a cargu del direutor de la UNED, Miguel Ramos Corrada.
Les Xornaes tuvieron una participación mui alta d'asistentes en parte pol interés de les ponencies presentaes.

Opina sobre esta noticia nel Tableru d'Anuncies

Consensu políticu al rodiu l'asturianu

19/10/2000 (Redacción) L'Academia de la Llingua Asturiana yá tien fecha pa presentar l'esperáu Diccionariu, va ser el 15 d'Avientu na Xunta Xeneral del Principáu. Esta fecha tamién coincide cola fecha que l'Academia escoyó pa cellebrar el so XX aniversariu.
Amás que va ser el primer llibru o diccionariu que se presente nel parllamentu asturianu hasta la fecha, dióse la curiosidá de que na votación pa dar el vistu buenu a la presentación de la obra na Xunta Xeneral del Principáu hebo unanimidá de tolos grupos, amosando un consensu políticu al que nun mos tienen mui avezaos los políticos asturianos.

Opina sobre esta noticia nel Tableru d'Anuncies

Solicítase la creación d'ún Muséu de la Llingua Asturiana

19/10/2000 (Redacción) Los conceyales de Nueva Izquierdanel Conceyu de Bimenes, tamién conocíos como Partíu Democráticu de la Nueva Izquierda, tan pidiendo dende va tiempu un plenu estraordinariu col oxetu d'adelantar les xestiones pa la puesta en marcha d'ún Muséu de la Llingua Asturiana. La rempuesta del Alcalde hasta'l día de güei ye'l so silenciu, colo que los conceyales de Nueva Izquierda yá tan esixéndo-y que cellebre esi plenu pa debatir la moción.
Dáse'l casu qu'esti conceyu foi'l primeru en reconocer l'asturianu como llingua oficial y la mayoría de los vecinos quieren ver reconocíu aquél apueste pol asturianu nún Muséu pa siguir siendo un símbolu de la reivindicación esistente pola defensa de la llingua asturiana.

Opina sobre esta noticia nel Tableru d'Anuncies



Preséntase una Antoloxía Poética Asturiana

19/10/2000 (Redacción) El filólogu Federico Fierro Botas ta acabante espublizar una antoloxía poética en billingüe. Los dos idiomes escoyíos son l'asturianu y el rusu. Esti llibru ye'l resultáu d'años d'estudiu y trabayu en collaboración cola Universidá Estatal Llingüística de Moscú.
L'antoloxía billingüe ta orientada sobremanera a los hispanistes rusos y a los sos alumnos que son al rodiu de 5.000 persones. Dáse'l casu que yá col réxime anterior, entamó en Rusia un interés nes llingües romances y l'asturianu ta ente elles. Esti llibru ta editáu pol Coleutivu Manuel Fernández de Castro del que Federico Fierro ye'l so presidente.

Opina sobre esta noticia nel Tableru d'Anuncies

La selmana qu'entra entamen les XIX Xornaes d'Estudiu

19/10/2000 (Redacción) Como yá informábemos la selmana pasada, los dés 23, 24 y 25 d'esti mes d'ochobre van cellebrase les XIX Xornaes d'Estudiu de l'Academia de la Llingua Asturiana que s'allugarán nel Salón d'actos de la Facultá de Filoloxía de la Universidá d'Uviéu. Les Xornaes entamarán tolos díes a les 16 hores y vas poder atopar ente otres les conferencies que vienen darréu:
El Llunes 23, Jaime Siles de la Universidá de St. Gallén (Suiza) falará de Llingüística y filoloxía: problemes del lusitanu. Francisco García Pérez, Doctor en Filoloxía y Caderalgu de Lliteratura, echará una güeyada sobre La solombra del asturianu nel periodismu costumista del XIX al XX.
El Martes 24, Francisco Ferrero Campos, de la Universidá de Viena, reflesionará sobre Los aspeutos afeutivos nel billingüismu español. Esti mesmu día Catherine Hanton de la Universidá de Louvain la Neuve falará de la Derivación lésica y derivación antroponímica.
Miércoles 25. Nel últimu día Michael Metzltin de la Universidá de Viena va esponer la so visión sobre Llingua y Identidá. El casu d'Asturies. Tamién esi día Xosé Lluis García Arias presentará'l llibru: Propuestes etimolóxiques 1975-2000.
Si quies matriculate inda tas a tiempu llamando a l'Academia al númberu 985.21.18.37 o unviando-yos un e-mail a la direición alla@asturnet.es. A toles persones daráse-yos un certificáu qu'acredite l'asistencia.

Opina sobre esta noticia nel Tableru d'Anuncies

Sigue pidiéndose la llicenciatura de Filoloxía Asturiana

19/10/2000 (Redacción) Javier García Valledor diputáu d'Izquierda Xunida, aconceyóse esta selmana col Rector de la Universidá d'Uviéu, Juan Vázquez col oxetivu de qu'esti se comprometiera a pidir una vegada más lallicenciatura de Filoloxía Asturiana, y el Rector foi daqué más alló, comprometiéndose a atropar tol sofitu políticu que fuere quién pa da-y d'una vez por toes una solución a esti conflictu que va allargándose dende va tiempu.
D'otra mena les Mocedaes Socialistes van presentar una serie de mociones al congresu que la Federación Socialista Asturiana va cellebrar. Una de les principales enmiendes va ser la de pidir al partíu un compromisu fuerte coles señes d'identidá d'Asturies, y de mena especial cola llingua asuriana. Les Mocedaes Socialistes píden-y al partíu un apueste claru pola oficialidá del idioma asina como la del gallego-asturianu na fastera del Navia-Eo.

El Conseyeru de cultura comprométese cola toponimia

12/10/2000 (Redacción) Javier Fernández Vallinacomprometióse col presidente de l'Academia de la Llingua Asturiana, Xose Lluis García Arias a aceptar como documentu base de correición toponímica el llibru de l'Academia "Nomes de Conceyos, parroquies, pueblos y llugares del Principáu d'Asturies". Arias denunció la grafía impropia y el desafortunáu billingüismu que se taba aplicando nos pueblos d'Asturies, poniendo nos lletreros versiones castellanizaes qu'enxamás s'usaren polos vecinos. Tamién la situación del gallego-asturianu ye dalgo que-y precupa al presidente de la institución asturiana y puntualizó que nun se permitirá nenguna intromisión estraña nesti asuntu.

Opina sobre esta noticia nel Tableru d'Anuncies



Nueves aventures de la "Crónica de Leodegundo"

12/10/2000 (Redacción) L'autor Gaspar Meana estrena dos capítulos nuevos de "La crónica de Leodegundo", un proyeutu ambiciosu que cuenta la hestoria del Reinu d'Asturies y d'una manera perdocumentada. Esto último y la gran calidá de les illustraciones ye lo que fixeron a esti cómic contar con un prestixu abondo dientro y fuera d'Asturies dende que l'autor entamare fae once años colos primeros episodios. Escrites n'asturianu y espublizaes pola editorial Llibros del Pexe, estos díes puen vese en Xixón nel XXIV Salón del Cómic del Principáu d'Asturies.

Opina sobre esta noticia nel Tableru d'Anuncies

Entamen les XIX Xornaes d'Estudiu de l'Academia

12/10/2000 (Redacción) Dende'l llunes 23 al miércoles 25 d'ochobre, tendrán llugar nel Salón d'actos de la Facultá de Filoloxía de la Universidá d'Uviéu, les XIX Xornaes d'Estudiu qu'organiza l'Academia de la Llingua Asturiana. Los horarios de les conferencies pa los tres díes son: 16 hores, 17'30, 19'00 y 19'30 hores. Si quies formalizar la matrícula pues llamar a l'Academia al númberu 985.21.18.37 o unvia-yos un e-mail a la direición alla@asturnet.es. A toles persones que se matriculen darán-yos un certificáu qu'acredite la so asistencia.

Opina sobre esta noticia nel Tableru d'Anuncies

Profesores col rector

12/10/2000 (Ramón d'Andrés) Una representación de profesores universitarios relacionaos cola Filoloxía Asturiana entrevistáronse'l pasáu 5 d'ochobre col Rector de la Universidá d'Uviéu, Juan Vázquez. Nel alcuentru, los profesores Ramón d'Andrés, Miguel Ramos Corrada y Juan Carlos Villaverde ficiéron-y ver al Rector la preocupación y el malestar qu'esiste ente'l profesoráu polos retrasos inxustificaos que ta sufriendo la tramitación de la Llicenciatura d'Asturianu, dexándo-y claro lo qu'entienden que ye un insultu a l'autoridá científica de la Universidá y una perda de credibilidá pa esa institución. El Rector manifestó-yos a los profesores que taba dispuestu a trabayar esi asuntu ante'l Conseyu d'Universidaes, y prometió-yos que falaría col Conseyeru de Cultura pa, xuntos los dos, llevar una mesma voz ante esi órganu.