Bienveníos al espaciu de la llingua Asturies.com ofrezte, en collaboración con Ramón d'Andrés y Espaciu y Tiempu, información sobre l'actualidá y les novedaes lliteraries referíes a la llingua asturiana. Si tienes dalguna información que crees que paga la pena que seya conocida escribi.

Programación III Feria del Llibru y del Discu n'asturianu

Darréu ofrecémoste una guía pa que sepas lo que vas atopa nesta Feria que se fai en Xixón del 29 de mayu al 4 de xunu y qu'entama El Sombreu de Virxilio.

Editoriales y discográfiques presentes na III Feria del Llibru y del Discu n'Asturiano:
ACADEMIA DE LA LLINGUA ASTURIANA
SERVICIU DE PUBLICACIONES DEL PRINCIPÁU D'ASTURIES
ATENÉU OBRERU DE XIXÓN
ALVÍZORAS LLIBROS
EDICIONES VTP
LLIBROS DEL PEXE
EDICIONES TRABE
ALBORÁ LLIBROS
ÁMBITU - LES NOTICIES
FONO ASTUR
DISCOS L'AGUAÑAZ

Qué coses va haber na III Feria del Llibru y del Discu n'Asturiano

BIBLIOTECA D'AUTORES ASTURIANOS N' INTERNET
Esti Diccionariu va presentase'l 29 de mayu a las 19,30 nell Taller 4 del Antiguu Institutu y va poder consultase nel serviciu gratuitu d'Internet que la Feria del Llibru y del Discu n'Asturiano asitia nel recintu de Tomás y Valiente en collaboración cola empresa Telecable.

CICLU DE CONFERENCIES LA LLINGUA BÍFIDA

29 de mayu Taller 4 Nel Alambre, conferencia del realizador Ramón Lluis Bande y proyección del so curtiumetraxe Malu (premiáu nel últimu Festival de Cine de Xixón). Presenta: José Antonio Quirós, director de cine, autor de la película Pídele cuentas al Rey.

30 de mayu Taller 4 Imago Mundi, conferencia del ilustrador Pablo Amargo (recientemente galardonáu en Xixón col Premiu Motiva de diseñu gráficu y Premio Lazarillo d'Ilustración 1999) Presenta: Javier Rodríguez, ilustrador.

31 de mayu Salón d'Actos del A. Institutu Xixón Bravú, conferencia de Xurxo Souto, escritor y vocalista del grupu gallegu Os Diplomáticos de Monte Alto. Presenta: Xulio Elipe, Xune, cantante del grupo Dixebra.

1 de xunu Salón d'Actos del A. Institutu La bola infinita, conferencia del escritor Xuan Bello. Presenta: José Luis García Martín, escritor, director de la revista Clarín y críticu del suplemento El Cultural del diario "El Mundo".

2 de xunu Taller 4 El sitiu de la lliteratura asturiana nel mundu, conferencia de Martín López-Vega, escritor, collaborador de revistes como Clarín o Renacimiento y del suplementu lliterariu La Mirada de "El Correo de Andalucía". Presenta: Rocío Menéndez, redactora y presentadora de TLG.

Toles charres son a les 20:00 hores. Les conferencies de Xurxo Souto, Xuan Bello y Martín López-Vega van facese los mesmos díes nel Centru de Día del Hogar del Pensionista de Cimavilla, como una actividá de la Feria en collaboración cola Obra Social de Cajastur y tien l'obxeto d'averar la creación lliteraria tamién a la xente mayor.

ACTIVIDADES INFANTILES

Ccuentacuentos a cargu de Milio el del Nido y Carmen Martínez, que se van facer peles mañanes ente los díes 30 de mayu y 2 de xunu. Nes ctividaes infantiles d'esti añu van participar de mil escolinos.

ACTUACIONES MUSICALES
La Feria del Llibru y del Discu n'Asturiano ofrez en collaboración col Teatru Xovellanos delels actuaciones, incluyíes dientro del programa Música na Cai. Les actuaciones van facese nel escenariu de la carpa de Tomás y Valiente los díes 3 y 4 de xunu. Nellas van participar dos grupos de música folk: Llume de Llar y Xéliba; un grupu de bossa nova: Moonglow; y cantantes de tonada de la AICA (Asociación d'intérpretes de canción asturiana). Los horarios d'estes actuaciones son:

sábadu 3 de Xunu 12.00 h. LLUME DE LLAR, folk. 17.30 MOONGLOW, bossa nova.

- El sábadu 3 de xunua las 19.00 h. el grupu folk Xéliba ofrez un conciertu de presentación del so últimu discu, editáu por Fono Astur.

domingu 4 de xunu 12.30 h. AICA, tonada.

- domingu 4 de xunu, a les 21.00 h. nel mesmo escenariu de la carpa, va actuar la Bandina Tradicional Biérbene, nel pìeslle de la Feria.

EXPOSICIÓN LA LLINGUA DE PAPEL Dientro de las actividaes complementaries de la III Feria del Llibru y del Discu n'Asturiano ta la instalación de la La llingua de papel (25 años de cartelismu n'asturianu), una exposición fecha pola fundación Belenos que recueye delles muestres de carteles editaos en llingua asturiana dende'l principiu de la transición. Carteles políticos y reivindicativos, anuncies d'actividaes culturales y recreatives, curiosidaes... igüen esta esposición que va inaugurase'l llunes 29 de mayo y va tar abierta al públicu dica'l día 12 de xunu na 1º planta del Centru de Cultura Antiguu Institutu.

PREGONES DIARIOS

Tolos díes, al abrir Produciones Nun Tris van facer un pregón. Nél va facese un apasionáu eloxu de los bonos llibros n'asturianu y en cualquier llingua viva, muerta o inventada, y van anunciase les actividaes diaries.

EL DIBUXANTE

Ente los distintos stands de la carpa de Tomás y Valiente hai ún acutáu pal dibuxante particular de la Feria: Alberto Álvarez Peña. L'ilustrador, salense de nación y xixonés de pación, va facer los sos trabayos nel recintu y va atender toles peticiones del públicu.

AMORIANDO Amoriando ye'l títulu de l'antoloxía de poesía amorosa qu'El Sombreru de Virxilio encargó al críticu y profesor de la Universidá de Uviéu Leopoldo Sánchez Torre pa la so difusión de baldre na Feria. El llibru recueye poemes d' amor y desamor de catorce autores contemporáneos n'asturianu: Felipe Prieto, Manuel Asur, Pablo Ardisana, Concha Quintana, Mª Teresa González, Miguel Rojo, Xuan Bello, Xandru Fernández, Antón García, Berta Piñán, Lourdes Álvarez, Humberto González, Pablo A. Marín Estrada y Xulio Viejo.

SERVICIO DE CONSULTA GRATUÍTA DE INTERNET Tol mundu fala de la Rede, tol mundu anda enredado na Rede y la feria del Llibru nun quier ser menos. Por eso s'ufierta un serviciu de consulta de tolos sitios web n'asturianu que se pueden alcontrar na rede. Amás de la puesta na Rede de la Biblioteca d'Autores Asturianos, celebraránse otres dos actividaes rellacionaes cola presencia de la llingua y la cultura asturianes n'Internet: el martes 30 de mayo a las 19.00 h. nel escenariu de la carpa de Tomás y Valiente, Inaciu Iglesias, director del selmanariu Les Noticies, va presentar el buscador Úlos y la guía de webs asturianes del mesmo nome. El miércoles 31 de mayu a les 19.30 David Guardado, d'Asturia Activa, va facer una presentación de la tienda virtual Asturshop.com.

UN ALCUENTRU CON HEVIA Fecha a confirmar

GUARDERÍA PA NEÑOS REVOLVINOS Una de las novedaes de la III Feria del Discu y del Llibru n'Asturiano ye'l espaciu de guardería pa neños revolvinos que s'ufierta dientro de la carpa. Ye un serviciu pensáu pa pas y masque vayan a la Feria colos rapacinos.

24/5/2000 (Redacción) L'Academia de la llingua entama otru añu los sos cursos de branu nes modalidaes Elemental, Avanzáu, Afondamientu cultural y llingüísticu y Estensión Universitaria.

CURSU ELEMENTAL DE LLINGUA ASTURIANA Empobínase a toles persones, al marxe de la so titulación o nivel d'estudios, y tienen como oxetivu algamar una conocencia básica de la llingua na espresión oral y escrita. Superaes les pruebes afayadices, los participantes llograrán la certificación de Conocencia Básica de la Llingua Asturiana.
Esta Certificación pue algamase tamién pente medies de les pruebes añales (de calter escritu y oral) que l'Academia entama nos meses de xineru y mayu y nes que toles persones interesaes puen amosar la so conocencia práutica del idioma asturianu. Nel Plan d'Estudios inxérense 60 hores llectives que se correspuenden coles siguientes asignatures: * Normes ortográfiques * Sociollingüística aplicada al casu asturianu * Exercicios escritos * Situaciones comunicatives escrites * Situaciones comunicatives orales * Averamientu a la Lliteratura Asturiana
Estos Cursos son especialmente amañosos, como preparación d'aniciu, p'aquelles persones que quieran cursar llueu los estudios de Filoloxía Asturiana na Universidá (títulos d'Espertu y d'Especialista).

CURSU AVANZÁU DE LLINGUA ASTURIANA Va dirixíu a aquelles persones que superaren l'anterior Cursu Elemental o que, al traviés de les pruebes de xineru o mayu, algamaren el certificáu de Conocencia Básica de la Llingua Asturiana. El so oxetivu ye que tola xente, al marxe del so nivel d'estudios, titulación o profesión, pueda llograr una más fonda conocencia práutica de la llingua asturiana. Superaes les pruebes afayadices, los participantes recibirán el certificáu de Conocencia Avanzada de la Llingua Asturiana.

Nel Plan d'Estudios inxérense 60 hores llectives que se correspuenden coles siguientes asignatures: * La llingua asturiana estándar * Llingua y sociedá na Asturies de güei * Exercicios escritos II * Situaciones comunicatives escrites II * Situaciones comunicatives orales II * Lliteratura asturiana contemporánea

L'Academia de la Llingua Asturiana, atendiendo a un enfotu xeneralizáu nos participantes que superen esti Cursu, ufiérta-yos la posibilidá d'inscribise nos Cursos d'Afondamientu Cultural y Llingüísticu.

CURSOS D'AFONDAMIENTU CULTURAL Y LLINGÜÍSTICU Los sos destinatarios son los maestros o llicenciaos que cuenten cola certificación de los Cursos de Llingua Asturiana pa Enseñantes (A.LL.A) y tamién los titulaos universitarios de Filoloxía Asturiana (títulos d'Especialista o d'Espertu). A estos alumnos daráse-yos el Diploma del Cursu d'Afondamientu. Amás podrán inscribise nestos cursos les persones que tengan superáu'l Cursu Avanzáu. A éstes daráse-yos una certificación d'asistencia al cursu d'afondamientu.

Los cursos (de 35 hores llectives) tienen un calter selmanal y l'Academia de la Llingua Asturiana plantega pal presente añu 2000 los siguientes Cursos: 1. Capacitación pa la Traducción al Asturianu (del 31 de xunetu al 5 d'agostu del 2000). 2. Socioloxía y Socio-llingüística d'Asturies (del 31 de xunetu al 5 d'agostu del 2000). 3. La vieya y la nueva música folk n'Asturies (del 31 de xunetu al 5 d'agostu del 2000). 4. Cursu práuticu de Creatividá Lliteraria (del 7 al 12 d'agostu del 2000). 5. Hestoria d'Asturies (del 7 al 12 d'agostu del 2000). 6. Antropoloxía Cultural d'Asturies: criterios d'actualización (del 7 al 12 d'agostu del 2000).

No que cinca a estos Cursos d'Afondamientu Cultural y Llingüísticu, l'Academia de la Llingua Asturiana, col envís de facilitar la participación, ufierta la posibilidá de qu'una mesma persona pueda pre-inscribise en dos Cursos que, temporalmente, seyan compatibles. Del mesmu mou, los actuales estudiantes universitarios de Filoloxía Asturiana (Espertos y Especialistes) tienen la posibilidá de matriculase nestos Cursos, entendiendo que la certificación afayadiza recibiríenla en cuantes amosaren la correspondiente titulación universitaria de Filoloxía Asturiana.

CURSOS EN COLLABORACIÓN COLA UNIVERSIDÁ D'UVIÉU L'Academia de la Llingua Asturiana, darréu del pautu firmáu cola Universidá d'Uviéu, entama Cursos d'Estensión Universitaria dirixíos a los estudiantes de toles estremaes carreres universitaries. Los alumnos que participen nellos podrán algamar, respeutivamente, 6 y 4'5 creitos de llibre configuración.

Los Cursos que, nun principiu, propunxo l'Academia y que sedrán impartíos por profesores de la Universidá d'Uviéu, son los siguientes: 1. Cursu Elemental de Llingua Asturiana. De 40 hores llectives y dirixíu a estudiantes que quieran averase a la conocencia práutica de la Llingua Asturiana. Esti cursu completaráse con 20 hores de clases práutiques. 2. Cursu Avanzáu de Llingua Asturiana De 40 hores llectives y dirixíu a estudiantes que tengan la certificación de Conocencia Básica de la Llingua Asturiana per cualquiera de les víes previstes na convocatoria. Esti cursu completaráse con 20 hores de clases práutiques. 3. Cursu de Capacitación pa la Traducción al Asturianu De 30 hores llectives y dirixíu a estudiantes que tengan una conocencia avanzada de la llingua asturiana y amuesen la certificación correspondiente. Esti cursu completaráse con 15 hores práutiques. 4. Cursu d'Hestoria d'Asturies De 30 hores llectives y dirixíu a estudiantes en xeneral que tengan un ciertu grau de conocencia de la llingua asturiana y quieran afondar n'aspeutos básicos de la hestoria de nueso. Esti cursu completaráse con 15 hores práutiques. L'Academia de la Llingua Asturiana certificará, siguiendo los calces previstos, la superación y calificación llograda nestos cursos y fadrá entrega de les actes a la Universidá d'Uviéu qu'actuará acordies coles bases de la convocatoria.

RESERVA D'ALOXAMIENTU, RECOYIDA D'INFORMACIÓN, PROGRAMES, MATERIALES Y MATRÍCULA Plazu: del 22 de mayu al 2 de xunu Academia de la Llingua Asturiana C/Marqués de Santa Cruz 6-2º-Uviéu Tfnu.: 985.21.18.37 Fax: 985.22.68.16 Horariu: De 9-14 h. y de 16-19 h. e-mail:all@asturnet.es

19/5/2000 (Redacción) Tan acabante espublizase nel BOPA les subvenciones p'actividaes rellacioanes cola promoción del asturianu. Les partíes son asociaciones, empreses, particulares, editores y conceyos. Delles partíes, como la d'estudios, son hasta cuatro vegaes más pequeñes que les d'hai tres años.

19/5/2000 (Redacción)La Xunta pola Defensa de la Llingua fixo públicu un comunicáu nel que critica el procesu de "supuesta xeneralización de la enseñanza. D'acordies cola organización cívica hai escueles nes que la dirección pide espresamente a les families que nun escueyan la opción d'asturianu y n'otres plantéase la asignatura d'asturianu en competición con otres como castellanu, inglés o conocimientu del mediu. La xunta anunció que ta faciendo un informe sobre esti procesu delq ue dará anuncia d'equí a poco.

12/5/2000 (Ramón d'Andrés) Un conxuntu de 140 representantes de la sociedá asturiana apoyen un manifiestu tituláu "Pol consensu en materia de derechos llingüísticos" que publicó'l día 10 de mayu la prensa d'Asturies. Nél constátase que l'asturianu ye una realidá ineludible que, por mor del desdexamientu de les autoridaes, ta nuna verdadera situación de peligru, polo que se pide que se dexen a un llau partidismos y sectarismos ideolóxicos pa llograr un consensu políticu y social que permita'l respetu daveres de los derechos llingüísticos y la continuidá del asturianu como llingua viva.

L'escritu va dirixíu a los representantes políticos del Principáu, y suscríbenlu cola so firma persones tan conocíes como Pedro de Silva, el Rector de la Universidá, el Candidatu a Rector, escritores como Carmen Gómez Ojea, Vicente García Oliva o Corín Tellado; el Director y la Xerente de la Orquesta Sinfónica del Principáu; músicos como José Ángel Hevia y los miembros del grupu "Llan de Cubel"; xugadores del Real Uviéu y del Real Sporting; artistes, profesores, médicos, etc., nun pronunciamientu públicu ensin precedentes. Pue vese'l testu completu del manifiestu, xunto cola llista completa de les firmes.

12/5/2000 (Ramón d'Andrés) Na presentación de la XXI Selmana de les Lletres Asturianes na Facultá de Filoloxía, presidida pol Conseyeru de Cultura, la Decana de la Facultá y el Presidente de l'Academia de la Llingua, ésti últimu anunció que la institución que preside va organizar pal añu 2001 un Conceyu Internacional de Lliteratura Asturiana, acontecimientu novedosu dafechu qu'habrá valir non solo pa da-y puxu y reconocencia a les nuestres lletres, sinón p'afondar nel so estudiu y divulgación fuera de les nuestres llendes.

12/5/2000 El pasáu vienres la Xunta Xeneral aprobó una resolución na que se-y pide al gobiernu que tome les midíes oportunes pa que'l Conseyu d'Universidaes dexe'l pasu llibre pa la llicenciatura d'asturianu. La propuesta foi d'IU y recibió'l votu positivu de tolos grupos (PSOE, PP, IU y URAS).

5/5/2000 Esta selmana aconseyámoste echar una güeayda al nuestru especial, qu'incluye una esposición sobre Antón de Marirreguera en formatu .pdf