Bienveníos al espaciu de la llingua Asturies.com ofrezte, en collaboración con Ramón d'Andrés y Espaciu y Tiempu, información sobre l'actualidá y les novedaes lliteraries referíes a la llingua asturiana. Si tienes dalguna información que crees que paga la pena que seya conocida escribi.

31/3/2000(Redacción) Depués de negatives anteriores del Rexistru del Condceyu de Siero a recibir escritos n'asturianu, el Colectivu Siero pola Oficialidá (vinculáu a la Xunta pola Defensa de la Llingua Asturiana) llevó un notariu esti martes al citáu rexistru pa que certificare la refuga a los testos escritos na nuesa llingua.L'Academia de la Llingua fixo públicu un escritu unviáu al Alcalde, que reproducimos darréu:

L’Academia de la Llingua Asturiana llamenta l’actitú del responsable del rexistru del Ayuntamientu de Siero al tomar iniciatives que van a la escontra del emplegu del asturianu. Al marxe de cuál seya’l xuiciu qu’esti fechu mereza, ta escoyéndose un tratu hostil a ladignificación del idioma d’Asturies.

El fechu de que nun s’almita un escritu n’asturianu nun pudiendo exercese’l drechu alusu del propiu idioma dientro del propiu país nun pue tener namás que dos interpretaciones:
a) Que nun esista llexislación afayadiza que garantice l’usu llexítimu de los ciudadanosa la propia llingua en toles circunstancies.
b) Que les autoriades y funcionarios, perpasando les propies competencies, vayen a la escontra de les lleis y de la llibertá de los ciudadanos. L’Academia en tou casu tien como obligación facer llegar a la opinión pública la sopermanente insatisfaición porque se produzan fechos d’esti calter y pide que se llogre una reconocencia esplícita de la llingua asturiana en tolos niveles de l’Alministración reglamentando’l so usu.

Alvierte l’Academia, de toes maneres, que perconociendo’l facer sistemáticu de l’Alministración, nun hai más camín pal bon entendimientu que reconocer la oficialidá de la llingua asturiana dándo-y llueu un desarrollu llegal afayadizu.

31/3/2000(Ramón d'Andrés) L'Hospital Central d'Asturies acaba d'asoleyar el so Plan Estratéxicu nun CD billingüe asturianu y castellanu. Juan José Fernández, xerente del Hospital, declaró que con esta iniciativa preténdese desaverar el bable de lo simplemente folclórico y acoyese a la vixente Llei d'Usu y Promoción del Asturianu, promulgada pola Xunta Xeneral del Principáu.

Trátase del primer testu sanitariu que, d'una forma oficial, ta redactáu na nuestra llingua. El Plan Estratéxicu del Hospital Central ye un importante documentu técnicu que ta pendiente d'aprobase per parte del Conseyu de Coordinación del mentáu centru.

24/3/2000(Redacción Asturies.com) Reproducimos darréu una nota unviada pola ALLA : "Concursos d'investigación Aconceyáu'l xuráu de los Concursos d'Investigación que convoca l'Academia de la Llingua Asturiana correspondiente al añu 2000, formáu por José Luis García Arias como presidente, Ana María Cano González como vocal y Corsino García Gutiérrez faciendo de secretariu, apáutase nos siguientes acuerdos:

- Na estaya de Recoyida de Material Toponímico:
1. Dáse-y el premiu de 100.000 ptes. al trabayu tituláu Toponimia de la parroquia de Cuevas (Miranda), presentáu por José Álvarez Alba.
2. Dar un accésit de 50.000 ptes. pal trabayu tituláu Toponimia de Samartín de Lluiña (Cuideiru), firmáu por Fernando Ornosa Fernández.
3. Dáse-yos tamién un accésit de 25.000 ptes. a caún de los siguientes trabayos:
- Conceyu d'Ayer: Parroquia de Boo, d'Ánxel Álvarez Llano.
- Parroquia de Sama (Llangréu), de Jorge Alberto García Fernández.
- Na estaya d'Investigación Llingüística: Dáse-y un accésit de 25.000 ptes. al trabayu tituláu La llingua asturiana en Caitano A. Bardón: "Cuentos en dialecto leonés" presentáu por Héctor García Gil.
- Dexar ermu'l correspondiente a la recoyida de léxicu asturianu.

24/3/2000(Ramón d'Andrés) L'Hospital Central d'Asturies acaba d'asoleyar el so Plan Estratéxicu nun CD billingüe asturianu y castellanu. Juan José Fernández, xerente del Hospital, declaró que con esta iniciativa preténdese desaverar el bable de lo simplemente folclórico y acoyese a la vixente Llei d'Usu y Promoción del Asturianu, promulgada pola Xunta Xeneral del Principáu. Trátase del primer testu sanitariu que, d'una forma oficial, ta redactáu na nuestra llingua. El Plan Estratéxicu del Hospital Central ye un importante documentu técnicu que ta pendiente d'aprobase per parte del Conseyu de Coordinación del mentáu centru.

24/3/2000(Redacción Asturies.com) Reproducimos una nota unviada a la nuesa redacción con motivu d'estes xornaes: " L'estudiu de la rïalidá dialectal, histórica y scial del dominiu llingüísticu asturllïonés Marzu y 24, 25 y 26, 2.000 CORPORALES, CABREIRA, PAÍS LLÏONÉS

Las segundas Xornadas Llïonesas d’Estudius Llingüísticus tan entamadas pur Conceyu Xoven a comuña conas principales asociaciones llïonesas de reivindicación llingüística. El sou obxectivu ye constituire un referente de formación sobre la situación de la ñuesa llingua autóctona, la súa caracterización, y la historia del ñuesu dominiu llingüísticu.

Cursu: “El cabreirés y el complexu llingüísticu astur-llïonés: historia y caracterización”.
Requisitus: Abiertu.
Dura: 10 horas
Imparte: Facendera pola Llingua.

Programa del cursu:
1. L’estudiu del dominiu llingüísticu asturllïonés.
2. La llingua a traviés de la historia: manifestaciones lliterarias y situación social.
3. Llingua y variedá dialectal: el cabreirés.

Cursu: “La variedá del falare”.
Requisitus: Certificáu B del IDEL ou equivalente.
Dura: 8 horas.
Imparte: David Guardado, Filólogu y miembru de la Xunta pola defensa de la Llingua.

Programa del cursu:
1. Llinguaxe y llinguas.
2. La llingua, feitu social.
3. La llingua, ferramienta de comunicación.
4. La variedá de las llinguas.
5. Criterius de clasificación de la glotodiversidá.
6. Prexuicius sobre la variedá llingüística.

Val pur 6 créditus pa la consecución del certificáu S del IDEL.

Cursu: “Comunidaes llingüísticas”.
Requisitus: Certificáu B del IDEL ou equivalente.
Dura: 8 horas.
Imparte: Fernando Álvarez Balbuena, filólogu y miembru de la Xunta pola Defensa de la Llingua. Programa del cursu:

1. Sobre’l conceptu de comunidá llingüística.
2. Menas de comunidaes llingüísticas.
3. Lus conceptus de llingua y dialectu.
4. L’asturiano-llïonés cumu llingua: esame llingüísticu y sociollingüísticu.
Esti cursu val pur 6 créditus pa la consecución del certificáu S del IDEL. Actividaes complementarias: - Futbol y Baloncestu. - Sendeirismu. - Amagüestus. - Seranu. Preciu matrícula + pensión completa + tresporte: 5.000.- pesetas
CONTAUTU YA INSCRICIONES Insitutu d'Estudius Llïoneses 987 25 16 07 y CONCEYU XOVEN 987 20 44 99"

17/3/2000(Redacción Asturies.com) Según nos informen dende la Xunta pola Defensa de la Llingua Asturiana yaposible, garcies a un cambéu reciente na llexislación nestatal, camudar l'apellíu de forma asemeyad a como se podía facer hasta agora col nome, p'adaptalu asina a les llingües estatales distintes al castellanu, incluyida la nuestra.

10/3/2000(Ramón d'Andrés) L'Academia de la Llingua Asturiana, n'andecha col Centru de Profesores d'Uviéu, entama'l VII Alcuentru Llingua Asturiana y Educación, que baxo'l títulu xenéricu de "Enseñances Llingüístiques y Competencies Educatives", celébrase los díes 15, 16 y 17 de marzu nel Salón d'Actos de la Escuela Universitaria de Maxisteriu d'Uviéu (C/ Aniceto Sela, s/n).

MIÉRCOLES 15
De 18 a 19 hores.- Conferencia de José Manuel Urroz Barasoain (Direutor del Serviciu de Programación ya Investigación, Departamentu d'Educación y Cultura del Gobiernu de Navarra), col títulu "Calces de formación y reciclaxe del profesoráu d'euskara en Navarra".

De 19 a 19,30 hores.- Comunicación de Beatriz Quirós Madariaga (Profesora d'Educación Secundaria, especialista universitaria en Filoloxía Asturiana), col títulu "Perspeutives pa la xeneralización de la enseñanza del asturianu na Educación Secundaria".

De 19,30 a 20,30 hores.- Conferencia d'Esther García López (Profesora d'Educación Secundaria, esperta universitaria en Filoloxía Asturiana), col títulu "Enseñanza del asturianu y política llingüística".

XUEVES 16
De 18 a 19 hores.- Conferencia de José Manuel Vez Jeremías (Caderalgu de Didáutica de la Llingua y la Lliteratura, Universidá de Santiago de Compostela), col títulu "Argumentos favoratibles a un pautu curricular nes árees llingüístiques".

De 19 a 19,30 hores.- Comunicación de Justo Vázquez Hevia (Profesor d'Educación Primaria), col títulu "La llingua asturiana na rede educativa privada".

De 19,30 a 20,30 hores.- Conferencia de José Luis Atienza Merino (Profesor de Didáutica de la Llingua y la Lliteratura, Universidá d'Uviéu), col títulu "Conflictu llingüísticu ya inconsciente: delles razones suplementaries p'afitar la enseñanza del asturianu".

VIENRES 17
De 18 a 19 hores.- Conferencia d'Àngel Huguet Canalis (Profesor de Psicoloxía, Universidá de Lleida): "Rellaciones ente enseñanza del asturianu y rindimientu en matemátiques. Primeres notes d'una investigación".

De 19 a 19,30 hores.- Comunicación de Concepción Sánchez Álvarez (Profesora d'Educación Infantil, especialista en Llingua Asturiana), col títulu "Necesidá y condiciones del deprendimientu del asturianu na Educación Infantil".

De 19,30 a 20,30 hores.- Conferencia: José Luis Iglesias Riopedre (Direutor Xeneral d'Educación del Principáu d'Asturies): "Midíes de planificación na xeneralización de la enseñanza del asturianu a tolos niveles educativos".

La entrada a toles sesiones ye llibre.

3/3/2000(Ramón d'Andrés) El pasáu vienres día 25 de febreru, conocióse la noticia de que'l Tribunal Constitucional resolvió a favor d'Andecha Astur, partió políticu asturianu que se vio perxudicáu al se-y refugaes les candidatures a les Elecciones Xenerales por presentales en llingua asturiana. El refugu provenía de la Xunta Electoral Provincial d'Asturies.

El Tribunal Constitucional dexó claro que ye perfeutamente llegal y axustao a derechu emplegar l'asturianu na documentación electoral, y d'esta manera valtóse la barrera que-y impedía a esi partíu políticu presentase a les Elecciones, dexando n'evidencia a la Xunta Electoral d'Asturies, que se dexó guiar por criterios restrictivos de tipu pesonal más que por razones de tipu xurídicu. Andecha Astur convocó'l mesmu vienres una rueda de prensa pa dar a conocer la noticia, al empar qu'anunciaba qu'agora va esixir que la Xunta Electoral imprente papeletes n'asturianu.

Puedes lleer la valoración política que d'esta sentencia fai la organización na so web en www.jazzfree.com/jazz4/vanoyite