| La
Xunta convoca una concentración. 23/2/2001 La Xunta
pola Defensa de la Llinguaconvoca una concentración pa protestar
pola situación d'estancamientu na que s'atopa la política de
normalización social del idioma. La concentración, que va facese
pal xueves día 1 de marzu, a les 19 hores, nel Paséu de los
Álamos d'Uviéu, coincide col tercer aniversariu de la reforma
del Estatutu d'autonomía. La Xunta quier recordar les movilizaciones que
daquella significaron les mayores manifestaciones populares pol futuru del
idioma (manifestaciones multitudinaries, concentraciones, acampaes,
creación de plataformes cíviques, posicionamientu de
partíos y sindicatos...). Nun duru comunicáu, la Xunta
señala lo poco que valió aquella pitición de xusticia
espontánea, acusando a La debilidá parllamentaria del PP y la
soberbia del PSOE, que los llevaron a aprobar un estatutu discriminatoriu y
que nun reconoz el derechu fundamental de los ciudadanos asturianos a usar la
so llingua.
Opina
sobre esta noticia nel Tableru d'Anuncies
La Xunta pola Defensa de
la Llingua Asturiana denuncia la señalización
toponímica 22/2/2001 La Xunta
pola Defensa de la Llingua Asturiana denunció nel Rexistru Xeneral
del Principáu l'incumplimientu de la "Llei
d'Usu del asturianu" no relativo a la señalización de
los topónimos, que según establez esta llei, aprobada pol
parlamentu asturianu en 1998 "tendrán la denominación
oficial na so forma tradicional". Les denuncies sumen un total de 50,
y afecten principalmente a carreteres autonómiques nes que, amás
de conservase los topónimos deformaos, la Alministración sigue
rotulando con tou tipu de formes aberrantes y/o castellanizaes.
La Xunta, como organización cívica de defensa de los
derechos llingüísticos de los asturianos, presentó estes
denuncies a les 12'30 hores del día 21, pero resérvase'l derechu
d'apelar más alantre a otres instancies xurídiques y
alministratives, no que diz col incumplimientu escandalosu del testu llegal.
Como s'anunció d'aquella, la "Llei d'Usu" nun
garantizaba practicamente nengún derechu, al dexar el so desarrollu al
aldu de la voluntá política de turnu, pero'l fechu de que nun se
cumpla siquieramente un tema como'l que s'apaña nel capítulu 15,
que ye de los pocos d'obligáu cumplimientu, ye -n'opinión de la
Xunta- un indicador del pocu enfotu del gobiernu asturianu col idioma. Si nun
se cumple nin lo que ye llei, dicen, ¿Qué se fadrá colo que
depende de la voluntá?. Esta organización fai un llamáu a
asociaciones y particulares "con sensibilidá
llingüística" a presentar denuncies nesti sen. Puedes ver
equí'l comunicáu de la Xunta
Opina
sobre esta noticia nel Tableru d'Anuncies
Presentación del
llibru "La bola infinita" 22/2/2001
Güei a les 8 de la
tarde nel departamentu de llibrería d'El Corte Inglés del centru
comercial de Saleses n'Uviéu, l' escritor Xuan Bello y el dibuxante
Pablo Amargo van presentar y firmar exemplares del so llibru "La
bola infinita", publicáu pola Editorial Ámbitu. Esti
llibru apaña los escritos y illustraciones que fueron apaeciendo col
mesmu nome en selmanariu Les Noticies a lo llargo del añu pasáu.
Xuan Bello, bien conocíu como poeta, ofreznos equí, dende'l
llabor de cuntador de lo cotidiano y reflexonando nos grandes temes de siempre
(la perda de la infancia, l'Asturies que toos quiximos, la universalidá
de lo inmediato o el recursu a lo rural como metáfora del mundu) una
riestra d'escritos que lu presenten como ún de los meyores
"trabayadores" del idioma. Bona prosa y bonos dibuxos.
Opina
sobre esta noticia nel Tableru d'Anuncies
El Conseyu d'
Universidaes va volver a tratar de la llicenciatura d'
asturianu 15/2/2001 (Redacción) El secretariu del
Conseyu d'Universidaes comprometióse esti día con Francisco
García Valledor, presidente de la comisión de cultura de la
Xunta del Principáu y diputáu d'Izquierda Xunida a reabrir
l'espediente pa la creación d'una llicenciatutra en Filoloxía
Asturiana, paralizada pola negativa d'esi mesmu Conseyu, que vien yá
dende 1991. Esti organismu, que tien que dar de pasu les titulaciones nueves de
toles universidaes del Estáu, volvió a negase en 1995 a la
reconocencia de la llicenciatura cola escadiella de que l'asturianu nun yera
una llingua. Daquella p'acá, los órganos de gobiernu de la
facultá de filoloxía y de la propia universidá
d'Uviéu y el mesmu parlamentu asturianu, amás de munches
asociaciones ciudadanes y polítiques pidieron que se reconsiderara esi
bloquéu, ensin llogralo. Agora, esti ente, que depende del Ministeriu
d'Educación y Ciencia, comprometióse por boca del so secretariu,
Vicente Ortega, a convocar la Subcomisión d'Humanidaes pa volver
a estudiar tola documentación. Nesta Subcomisión, van tar
presentes el rector de la Universidá d'Uviéu, Juan
Vázquez y el Conseyeru asturianu de Cultura, Javier
Fernández Vallina.
El resultáu d'esta revisión va elevase a la
Comisión Permanente, lo que podría desbloquear l'asuntu y da-y
pasu por fin a la Llicenciatura en Filoloxía Asturiana. Na
reunión col secretariu del Conseyu, Valledor, como comisionáu del
parllamentu asturianu entregó-y la resolución d'avientu del 97 na
que la Xunta del Principáu pidía la llicenciatura, amás
d'un exemplar de la gramática y el diccionariu de la Academia de la
Llingua.
Al paecer, Ortega sorprendióse de la esistencia d'estes
ferramientes normatives y de que s'impartiera asturianu en primaria y
secundaria pero nun hubiera formación universitaria pa los
profesores.
Opina
sobre esta noticia nel Tableru d'Anuncies
Astérix en
Mirandés 15/2/2001 Reis Quarteu (Miranda) - Redacción La
"lhéngua mirandesa" va ser el próximu idioma
d'Astérix. Esti mes de mayu, la editorial Meribérica de Lisboa va
facer una tirada de tres mil exemplares (papel bono y tapes dures) de la primer
aventura d'Astérix: "Astérix el
Gaulés" , publicada orixinalmente nel añu 1961. Ye
un proyectu ensertáu nes cellebraciones del 40 aniversariu de la
publicación en Portugal de les aventures del heroi galu y del añu
internacional de les llingües minoritaries.
A la presentación del llibru, que va facese en Lisboa,
cuéntase con que vaiga Uderzo, el dibuxante del personaxe
creáu pol desapaecíu René Goscinny, y actual
responsable de la serie. La noticia apaeció nel Jornal de Noticias de la
capital portuguesa, onde aprovechen pa dicir qu'a los potenciales llectores na
propia Tîerra de Miranda podríen sumase tamién otros como
los asturianos.
Opina
sobre esta noticia nel Tableru d'Anuncies
Denuncien la escuela onde
diz que-yos poníen multes a los neños por falar
asturianu 15/2/2001 (Redacción) El sindicatu de la
ensiñanza SUATEA y la Xunta pola Defensa de la Llingua
Asturiana presentaron ayeri, na Viceconseyería d'Educación
del Principáu , un escritu pa pidir la investigación de la
supuesta represión del usu del asturianu nuna escuela de Villaviciosa.
Como yá informó (ver más abaxo) esta mesma sección,
trátase d'un colexu priváu concertáu (Carmelites) onde diz
que-yos poníen multes a los rapacinos por usar l'asturianu en clase. Les
cantidaes diben dende los cinco duros por una palabra hasta 150 por seyes.
Estes dos organizaciones piden a la Inspección Técnica del
Principáu qu'investigue los fechos pa, en casu de ser verdá,
abrir un espediente alministrativu al centru y rescindi-y el conciertu
educativu, pa depués entamar los trámites xudiciales oportunos.
SUATEA y Xunta pola Defensa de la Llingua aleguen tamién la
vulneración de la lletra del Estatutu y del artículu terceru de
la "Llei d'Usu" onde se diz que se garantiza la non
discriminación de los ciudadanos por usar la so llingua.
Opina
sobre esta noticia nel Tableru d'Anuncies
Sal un númberu
nuevu de "Entrambasauguas" 8/2/2001
(Redacción)
Depués de tar una vegada grande ensin apaecer, la revista en
gallego-asturiano Entrambasauguas saca agora un nuevu exemplar, que fai'l
númberu 14. Esta publicación edítala la Secretaría
Llingüística del Navia-Eo, dependiente de l'Academia de la Llingua
Asturiana y ocúpase de temes culturales, históricos,
xeográficos, etnográficos y llingüísticos
rellacionaos cola zona y, por supuestu, escrita dafechu na fala
gallego-asturiana.
Nesta nueva entrega hai artículos que toquen aspectos bien
variaos, dende un repasu a la mitoloxía de lo más occidental
d'Asturies a cargu del profesor Rafael Cascudo o l'análisis de la
tradición que llamen "l'augua das prindas" en Villayón,
hasta un estudiu de la vexetación del valle del Navia, o una comparanza
a la situación de llingües europees que, como la fala de Navia-Eo
tienen pocos falantes (anguaño calcúlense ente 40 y 50.000).
Completétase la revista con collaboraciones lliteraries (Manuel
García) y les secciones habituales d'axenda, testos vieyos en
gallego-asturiano y El Arco da veya pa los nenos, amás de semeyes y
fotografíes vieyes.
Hai que dicir tamién qu'esti númberu introduz dellos
cambeos pa meyor no que ye'l diseñu y el papel, cosa que siempre presta.
Opina
sobre esta noticia nel Tableru d'Anuncies
El Diccionariu vuelve a
les llibreríes 8/2/2001 (Redacción) La primer tirada del
Diccionariu de l'Academia de la Llingua Asturiana, de dos mil exemplares,
vendióse entera en menos d'una selmana yá en mes d'avientu, pero
agora puede atopase nes llibreries una nueva reimpresión d'esta obra,
fiensu fundamental pal llabor normativizador del idioma. Aparte de les
llibreríes tradicionales, puedes conseguir el diccionariu de l'Academia
de la Llingua pel comerciu electrónicu, n'Asturshop,
la tienda asturiana n'Internet.
Per otru llau, otru elementu normativizador importante (xunto cola
gramática y el diccionariu) son les normes ortográfiques, de les
ta p'apaecer agora la quinta edición, qu'apaña toles novedaes
introducíes nestos últimos años y especialmente les que
yá apaecen nel propiu diccionariu.
Opina
sobre esta noticia nel Tableru d'Anuncies
Ataques a la llingua nuna
emisora estatal 8/2/2001 (Redacción) Según informen
dellos oyentes y recueye esta mesma selmana "Alitar Asturies"
(suplementu quincenal d'El Comercio dedicáu a la llingua asturiana), el
conocíu periodista radiofónicu Carlos Pumares, nel so veteranu
programa de cine "Polvo de Estrellas" dedicó una bona
parrafada a esbabayar contra l'asturianu. Como saben bien los que conocen el
programa, Carlos Pumares aparte de falar de cine y poner música de
películes gústa-y echar la llingua a pacer sobre les cuestiones
más variaes (por eso se autroproclama gurú de la nueche).
Ello ye que'l 7 de xineru pasáu, depués d'esbabayar contra
les pintaes n'aragonés y sobre la independencia del Bierzo dixo "Lo
que pasa es que esto justifica muchos sueldos. En Asturias se habla un bable
distinto en cada barrio, pero ahí está la Academia asturiana, con
una academia cobrando sueldos que salen de todos nosotros".
Como ye persabío, los miembros de l'Academia nun cobren sueldu
nengún pol so cargu. Como se ve Gustavo y Sanchez Dragó creen
escuela.
Opina
sobre esta noticia nel Tableru d'Anuncies
El colexu "Jacinto
Benavente" aprueba una escolarización digna del
asturianu. 25/1/2001 (Redacción) El claustru de la
escuela pública "Jacinto Benavente" de Vega, Xixón,
aprobó esta selmana por mayoría delles midíes pa una
escolarización digna del nuestru idioma.
Siguiendo lo afitao na "Llei d'Usu" del 98, que diz que
l'asturianu será materia del curriculum académicu en tolos
niveles de la ensiñanza non universitaria, y cola sida de les
negociaciones del centru cola Conseyería pa la escolarización del
asturianu, d'equí p'alantre la nuestra llingua va considerase una
asignatura igual que les otres, coles mesmes condiciones y horariu abondu
pa garantizar un bon conocimientu al final del ciclu formativu. Amás
d'esto, el claustru declaró tamién la necesidá de
catalogación de los puestos de trabayu de los docentes d'asturianu nos
centros y que se validen oficialmente les titulaciones. El claustru de maestros
pidió tamién qu'estos puestos sían dotaos como cualquiera
otru, pela canal habitual del concursu de tresllaos y enxertando la
especialidá de Llingua Asturiana nes convocatories d'oposiciones.
Opina
sobre esta noticia nel Tableru d'Anuncies
Presentación de la
Xunta en Cangas. 25/1/2001 (Redacción) La Xunta pola Defensa de la
Llingua Asturiana anuncia que va facer la so presentación oficial en
Cangas del Narcea el día 3 de marzu. La Xunta sigue asina'l so
procesu d'espardimientu pel territoriu asturianu, articulando nesti casu una
parte tan importante del país como ye'l suroccidente asturianu. Nesti
momentu, la organización cuenta yá con más de 30
miembros que s'aconceyen regularmente en Cangas y que proceden del propiu
conceyu y d'otros vecinos como Tinéu y Degaña. La
presentación va facese'l sábadu día 3 nel salón
"Auditorium" del Ayuntamientu, a les 7'30 de la tarde, y amás
de xente de la mesma Xunta Pola Defensa de la Llingua va cuntase cola presencia
de Pepe Bisuyu, maestru pioneru na escolarización del asturianu
na comarca y personaxe carísmáticu en Cangas. Habrá
tamién una muestra de música tradicional asturiana a cargu de
dellos grupos de la zona y pesllaráse l'actu con una espicha.
Opina
sobre esta noticia nel Tableru d'Anuncies
Ponen-yos multes a los
rapacinos por dicir palabres asturianes 25/1/2001 (Redacción) Vien ruxéndose per
Villaviciosa dende va meses que nuna escuela del llugar castiguen a los
ñeños por falar asturianu. El casu, que ya lu denunció'l
selmanariu comarcal "El Fielato", referíase al colexu
"San Rafael" (Carmelites), onde diz que se sancionaba a los escolinos
con cinco duros cada vez que dicíen daqué palabra n'asturianu, 50
pesetes por dos palabres y asina. Esta selmana foi Andecha Astur de Villavicosa
la que volvió a denunciar un casu, que si ser ye verdá,
sería un atentáu contra los derechos fundamentales
protexíos pol Estatutu y la Llei d'usu, que garanticen la non
discriminación pol usu de la llingua asturiana, al mesmu tiempu
qu'asoleyaría la contradicción ente una lexislación
ambigua y que nin siquiera se cumple y les polítiques oficiales de
promoción, que nun son pa evitar siquiera aberraciones como ésta.
Opina
sobre esta noticia nel Tableru d'Anuncies
|
