¡ FELIZ AÑU NUEVU !

Nuevu serviciu de traducción nel conceyu de Llangréu

28/12/2000 (Redacción) El conceyu de Llangréu va abrir un serviciu públicu de traducción al asturianu esti mes qu'entra na Casa de la Cultura de Riañu. Esti serviciu ye'l primeru n'Asturies entamáu por un conceyu y va tar a disposición de tolos coleutivos, asociaciones y persones de Llangréu que lo soliciten. Nesta oficina va trabayar un becariu a xornada completa durante ocho meses, anque si la demanda de trabayu lo demandare taría abierta tol añu.
Esti serviciu ye la principal midía que se pon en marcha yá que nun va ser la única. Esti conceyu, que con esto quier impulsar y facer real la cooficialidá qu'aprobó va un tiempu, va entamar tamién dellos cursos d'asturianu p'adultos y pa funcionarios públicos del ayuntamientu en Sama y Riañu. Tamién y al empar va entamase una campaña de retulación de siñales de población en más de trenta localidaes, amás de poner en marcha una campaña dirixida los vecinos del conceyu, animándolos a qu'usen l'asturianu pa dirixise a l'alministración.
L'oxetivu d'estes campañes ye algamar la puesta en marcha, pa dos años, d'una oficina de normalización social del asturianu con personal municipal.
Estes midíes van ser posibles gracies a la collaboración de la corporación municipal, representada por Alejandro López y la La Xunta pola Defensa de la Llingua Asturiana de Llangréu ente otres asociaciones del conceyu.

Opina sobre esta noticia nel Tableru d'Anuncies

El Senáu español afita la recuperación del asturianu

28/12/2000 (Redacción) El plenu del Senáu afitó la selmana pasada la Carta Europea de les Llingües Rexonales Minoritaries, qu'amás de les que tan ratificaes como oficiales, pide que se protexan y se recuperen tamién aquelles llingües que nun tienen reconocíu esi drechu hasta agora, como son los casos del asturianu, aragonés y aranés.
L'Estáu español ye l'octavu sociu européu que firma y asume'l compromisu de la carta nomada, que yá se firmara en 1.992 pero que nun entró en vigor hasta 1.998. La firma d'esta carta supón reconocer a estes tres llingües como llingües rexonales y minoritaries les que protexen los estatutos d'autonomía d'Asturies, Aragón y Cataluña.
Con esta firma dáse un sofitu importante a la llingua asturiana y quita un argumentu más a los personaxes recalcitrantes que na sociedá asturiana tan a la escontra de reconocer los drechos llingüísticos de los sos conciudadanos.
Hai que destacar que la votación nel Senáu foi unánime con un consensu que s'echa en falta nos parllamentarios asturianos nesta tema.

Opina sobre esta noticia nel Tableru d'Anuncies

Entregáronse los premios XEIRA

28/12/2000 (Redacción) L'asociación XEIRA que defiende la recuperación y reconocimientu llegal del gallego-asturianu, entregó'l so X Premiu XEIRA de Narracióis Curtias el pasáu sábadu 23 en A Caridá. La ganadora foi Mª José Fraga Suárez col relatu "Col tempo nos oyos" y dotáu con una cantidá de 75.000 pesetes.
Nel actu tamién se presentaron dos llibros, un col nome de "Lletras novas, úa década del premio XEIRA de narración" qu'axunta les once narraciones qu'algamaron el premiu nes anteriores ediciones, entregando un añu'l premiu ex-aequo. L'otru llibru presentáu foi un de narrativa xuvenil, "Xunta de mitos" de Rafael Cascudo Noceda y con illustraciones d'Alberto Álvarez Peña. Nesti actu tamién se-yos entregó a los autores, una insignia de plata de l'asociación reconociéndo-yos asina'l bon llabor y difícil trabayu como ye n'escribir nesta otra llingua d'Asturies que nun siempre ponemos el suficiente precuru pa con ella.


Opina sobre esta noticia nel Tableru d'Anuncies

Preséntase una nueva revista de música asturiana

28/12/2000 (Redacción) L'Aguañaz, sellu de música asturiana estrenó una nueva revista de música asturiana col nome de "Anuariu de la música asturiana" na edición del 2000, y quier ser un órganu d'espresión de tola enerxía que ta xenerando agora la música asturiana.
Esti anuariu de la música asturiana 2.000 atiende a la música tradicional, al folc y al rock n'asturianu. Nesta edición destaquen dellos artículos sobre la tonada, el taller de gaites de Santu Adrianu, la escuela El Llacín (Porrúa) y la zanfona. Tamién apaez una entrevista al gaiteru Hevia y tres reportaxes sobre dellos aspeutos del panorama actual de la música asturiana y les sos perspeutives.
Na presentación de la revista, Xune Elipe, director del sellu discográficu qu'edita la revista, denunció la falta d'una política musical por parte l'alministración dando un datu que fae ver a les clares esa muestra d'interés dende les instituciones asturianes, como foi la partida presupuestaria pa la música asturiana de dos millones de pesetes y la de 62 millones pal Doctor Music, macroconciertu organizáu por una empresa non asturiana y sin presencia de grupos asturianos que representen la cultura asturiana.

Opina sobre esta noticia nel Tableru d'Anuncies

Escosóse la primer tirada de 2.000 exemplares del Diccionariu

21/12/2000 (Ramón d'Andrés) Los 2.000 exemplares del Diccionariu que l'Academia de la Llingua Asturiana (A.LL.A) punxo nes llibreríes el pasáu llunes 11 d'avientu, taben yá escosaos al llegar el sábadu 16.
La demanda d'esti importante llibru foi tala, que nin l'Academia nin el distribuidor nin la imprenta daben abastu a lo llargo d'estos díes, y acabóse la primera tirada de dos mil exemplares antes de finar la selmana y a quince díes de les Navidaes. Lóxicamente, l'Academia pondrá na cai otra nueva tirada.
Si tenemos en cuenta qu'una bona tirada de llibros n'Asturies son 1.000 exemplares, entenderáse bien que'l Diccionariu ta siendo ún de los "best sellers" más espectaculares de les últimes dómines n'Asturies. Esti diccionariu yá se pue encargar n'ASTURSHOP

Opina sobre esta noticia nel Tableru d'Anuncies

Otra vuelta a pola Especialidá de Filoloxía Asturiana

21/12/2000 (Redacción) El Conseyu d'Universidaes negó en septiembre de 1998 la solicitú de la Universidá d'Uviéu pa crear la especialidá de filoloxía, yá que nun reconocía l'asturianu como llingua. Negóse a incluyila nel catálogu estatal de titulaciones universitaries col argumentu de que l'asturianu nun tenía fundamentos llingüísticos, xurídicos y científicos que-y dieran el caráuter de llingua científica.
La selmana pasada'l Conseyeru d'Educación y Cultura del Principáu, Javier Fernández Vallina, pidió formalmente al Conseyu d'Universidaes que vuelva a estudiar otra vegada la creación de la titulación de filoloxía asturiana. Nel casu de que la comisión d'humanidaes del conseyu acepta la so solicitú, sofitada tamién pol rector Juan Vázquez, el Conseyeru va unviar al conseyu dellos estudios científicos avalando estos estudios, que foron recopilaos por profesores de la Facultá de Filoloxía de la Universidá d'Uviéu. Asina lo confirmaron el rector y el propiu Conseyeru. Dambos los dos tuvieren presentes en Murcia p'asistir a la reunión del Conseyu d'Universidaes.


Opina sobre esta noticia nel Tableru d'Anuncies

Xurde Morán recoyó'l Premiu Andrés Solar 2000

21/12/2000 (Redacción) La Xunta pola Defensa de la Llingua Asturiana, entregó esti sábadu pasáu los Premios Andrés Solar con una bultable asistencia de públicu que casi llenó'l Salón d'Actos del Antiguu Institutu de Xixón. Esti añu'l premiáu foi Xurde Morán como informamos la selmana pasada.
El premiáu agradeció a esta asociación cívica la entrega del premiu y remembró que'l premiu nun sólo lu merecía y yera pa él, sinon que-y lu quixo dedicar a toles persones y profesionales que-y ayudaren a algamalu. Na entrega de premios tuvieren presentes dende la familia del escritor asturianu yá fallecíu y que dio nome a los premios, Andrés Solar, hasta destacaos políticos y periodistes como'l Direutor de la Cadena Ser Xixón. Na pasada edición esti premiu foi entregáu al gaiteru asturianu más internacional, José Ángel Hevia.
Dempués del actu cellebróse una espicha nel restaurante El Cañaveral (La Guía) a la que foron unes 90 persones y dellos músicos qu'animaron la folixa con música y bailles asturianos

Opina sobre esta noticia nel Tableru d'Anuncies

Un suañu que se cumple dempués de 200 años

14/12/2000(Redacción) Gaspar Melchor de Jovellanos fae un poco más de doscientos años naguaba por facer un Diccionariu normativu de la llingua asturiana. L'ilustráu xixonés esplicaba a los sos amigos Carlos González Posada y Caveda y Solares, les característiques d'esi diccionariu y que por delles razones nun pudieron facer.
Dos sieglos dempués, L'Academia de la Llingua Asturiana fae esi suañu realidá y presenta esta selmana'l primer Diccionariu Normativu de la llingua asturiana. Ye la obra central de l'Academia y na que lleva trabayando dende la so fundación fae venti años. El Diccionariu tien alredor de 50.000 entraes en 1.330 páxines editaes en papel biblia. Ye un diccionariu sincrónicu, solo contién pallabres n'usu y nun recueye les variantes de la llingua.
Nesta xera tan importante y llarga trabayaron persones con una llarga y fonda preparación; dende los académicos como Xosé Lluis García Arias, Ana Cano y Ramón d'Andrés, asina como dellos becarios como Fernando Álvarez-Balbuena García, Sara Gutiérrez Rodríguez, Marta Villazón y Paz Fonticiella. Tamién collaboraron Álvaro Arias, Corsino García, Nuria Fernández, Genaro Alonso y Vicente Rodríguez.
Esti Diccionariu yá ta na venta nes llibreríes y esta selmana, hasta'l sábadu 16, va tener un preciu especial de 6.500 pesetes, pasando a un preciu de 10.000 pesetes a partir del llunes 18. Pue mercase N'ASTURSHOP "la to tienda na rede" con esta mesma promoción.

Opina sobre esta noticia nel Tableru d'Anuncies

La sociedá civil respalda'l trabayu de l'Academia nestos 20 años

14/12/2000 (Redacción) Esti miércoles 13 d'avientuna Xunta Xeneral tuvieron presentes representantes de la vida política y social d'Asturies pa sofitar cola so presencia'l nacimientu del Diccionariu y l'aniversariu de los venti años que cumple l'Academia. Representantes de tolos partíos políticos con representación parllamentaria y d'otros que nun la tienen. Pol PSOEtuvieron Jesús Landeira, Faustino Álvarez, José Luis Montes y Mª Luisa Carcedo ente otros; pol PP Juan Morales que dixo del actu que "ye muy importante", Rodrigo Grossi y Javier A. Amandi; por IX asistieron Javier Valledor y Noemí Martín y por URAS Leonardo Verdín.
Tamién tuvieron presentes personalidaes de la vida social y de delles organizaciones cíviques, destacando xente como Graciano García de la Fundación Príncipe d'Asturies, Joaquín Manzanares, Juaco López, Emilio Marcos, Ignacio Martínez secretariu de Caxastur ente otres munches persones qu'abarrotaron la sala onde se presentó esta obra tan importante pa la memoria coleutiva del nuestru pueblu asina como d'utilidá pal futuru de la nuestra llingua llariega.
D'otra manera, como representación institucional asistieron al actu la directora general de cultura Ana Rodríguez, el conseyeru de cultura Javier Fdez. Vallina y el viceconseyeru d'educación José L. Riopedre, echando en falta la mayoría de los asistentes la presencia del Presidente del Gobiernu asturianu, Vicente Álvarez Areces.
Esta ausencia que foi mui comentada polos presentes al actu foi valorada de forma especial polos representantes de la Xunta pola Defensa de la Llingua Asturianaque valoraron l'ausencia como mui negativa "yá que'l presidente nun pierde una presentación d'una etapa ciclista, del Doctor Music Festival o d'una cena d'un conocíu diariu asturianu, cena na que per otru llau, tamién asistieron otres personalidaes que tamién tuvieron na presentación del Diccionariu" sigún dixeron los portavoces d'esta asociación ciudadana y que defende los drechos llingüísticos de los asturianos.


Opina sobre esta noticia nel Tableru d'Anuncies

L'Academia de la Llingua Asturiana cumple venti años

14/12/2000 (Redacción) L'Academia de la Llingua Asturiana (A.LL.A) ta d'aniversariu estos díes yá qu'esti mes d'avientu cúmplese'l XX aniversariu de la so creación. Por esti motivu, esta selmana, na Xunta Xeneral del Principáu d'Asturies celébrase con un actu institucional que tamién va servir pa presentar de mena oficial l'esperáu Diccionariu.
Nel actu-homenax van tar presentes representantes de toles estayes de la sociedá asturiana y como autoridaes, tarán presentes la Presidenta de la Xunta Xeneral del Principáu d'Asturies, María Jesús Álvarez y la Direutora Xeneral de Cultura, Ana Rodríguez Navarro.
L'Academia de la Llingua Asturiana ye una institución del Principáu d'Asturies que se fundó en 1980 por Decretu del Conseyu Rexonal d'Asturies 33/1980 de 15 d'avientu y con Estatutos aprobaos pol mesmu muérganu por Decretu 9/1981, modificaos el 12 d'abril de 1995 (BOPA númberu 136 de 14-6-1995).
L'Academia tien anguañu 20 miembros de númberu, 17 miembros correspondientes y 15 académicos d'honor.

Opina sobre esta noticia nel Tableru d'Anuncies

Entrégase'l Pegollu y la Madreña Purpurina nos Premios Andrés Solar 2000

14/12/2000 (Redacción) La Xunta pola Defensa de la Llingua Asturiana, organiza la entrega de los Premios Andrés Solar que na edición de 2000 tienen los siguientes ganadores: Pegollu 2000: Xurde Morán, Madreña de purpurina 2000: C.P. "Enrique Alonso" d'Avilés . L'actu celebraráse, el sábadu 16 d'avientu, a les 19:30 nel Salón d'Actos del Centru de Cultura "Antiguu Institutu", cai Xovellanos 21, Xixón.
El Pegollu, premiu concedíu a les persones y/o instituciones que más fixeren pa cola Llingua y Cultura asturianes a lo llargo del añu, apúrrese-y al locutor y presentador Xurde Morán por tol llabor positivu como elementu normalizador de la llingua asturiana dientro'l campu de los medios audiovisuales. El premiáu collabora de manera continuada nuna de les emisores de radio con mayor audiencia n'Asturies, Ser Xixón, na que diariamente intervien fomentando l'emplegu normal de la llingua ensin arrequexala necesariamente a espacios específicos de conteníu asturianu. Y, per otra parte, el xuráu nun dexó de valora-y l'esfuerzu d'investigación y promoción de la hestoria, arte y cultura del pueblu asturianu espeyáu notoriamente nos sos trabayos editaos.

La Madreña de Purpurina, premiu concedíu a les persones y/o instituciones que más llabor negativu fixeren pa cola Llingua y Cultura asturianes a lo llargo del añu, al Equipu Directivu del C.P. "Enrique Alonso" d'Avilés pol so descomanáu despreciu al plan d'ufierta d'escolarización de la Llingua Asturiana pal cursu 2000-01. La Direición d'esti Centru, remitió a les families de los escolinos una circular na que s'indicaba que la eleición de Llingua Asturiana implicaba, tanto pal Centru como pa los escolinos, la perda de les enseñances de Francés precoz, asina como recortes d'hores llectives de les enseñances de Llingua española y Conocimientu del Mediu.

Esti llabor ye llaceriosu y criticable de por si; pero, inda lo ye más pol fechu de que tanto la Llei d'Usu, como les Instrucciones de la Viceconseyería d'Educación, desixen la ufierta obligatoria y ensin torgues de la Llingua Asturiana en tolos centros sustentaos con fondos públicos d'Asturies.

Opina sobre esta noticia nel Tableru d'Anuncies

Campañes institucionales en favor del asturianu

14/12/2000 (Ramón d'Andrés) El Gobiernu del Principáu d'Asturies y el Conceyu de Xixón van poner en funcionamientu dos campañes en favor de la llingua asturiana. La primera va desendolcase agora nel mes d'avientu, y faise baxo'l lema "Llibros y música n'asturianu. Diz muncho de ti. Regala n'asturianu". Preténdese con ello que la xente se fixe en que los llibros y los discos n'asturianu puen ser un bon regalu de Navidá.
La segunda campaña piénsase desendolcala en xineru, y tien el lema de "Nomes y apellíos n'asturianu. Diz muncho de ti". Con esta, quier convidase a la xente a qu'asturianice'l so nome o apellíu. Dambes campañes van llegar a los ciudadanos al traviés de los medios de comunicación y de los espositores de les cais.

Opina sobre esta noticia nel Tableru d'Anuncies

Les llingües minorizaes na Escuela de Seronda

7/12/2000 (Redacción) La Escuela de Seronda, qu'entamen los Conseyos de la Mocedá d'Asturies, va celebrar el prósimu vienres 8 d'avientu nel Antiguu Institutu Xovellanos de Xixón, el foru "La Situación Llegal de les Llingües Minorizaes na Unión Europea: dellos modelos y perspectives". El foru ta enmarcáu dientro de les actividaes de la Escuela de Seronda y la organización cuerre a cargu de la Xunta Moza. El programa pal foru va ser el que vien darréu:

1.- (10:00/12:00 hores): Introducción a la situación de la Llingua Galesa, hestoria y campañes del Movimientu de Reivindicación Llingüística de Gales, desenvolvimientu nos últimos años con atención especial a los llogros y avances nel marcu llegal. Esposición de los factores de cambiu llegales: participación/torgues dende les fuercies polítiques, movimientos sociales (campañes concretes) y participación/respaldu popular. Va intervenir: George Jones. Representante del programa Mercator en Gales. Loi Barbón. Representante de laXunta Moza.
2.- (12:30/14:00 hores): La situación llegal de les llingües minorizaes na Unión Europea: dellos modelos y perspectives. Van intervenir: Sergi Vilaró, representante de l'asociación CIEMEN de Cataluña. Fernado Álvarez-Balbuena: Filólogu y miembru de la Xunta pola Defensa de la Llingua Asturiana
3.- (17:00/19:00 hores) Llexislación y marcu xurídicu de la Llingua Asturiana: Evolución hestórica, situación actual y perspectives de futuru. Interpretaciones y estratexes d'aprovechamientu, desenvolvimientu de les disposiciones actuales y la so apilicación. Van intervenir: Amable Concha: Abogáu. Daviz Guardado: Miembru de Xunta Moza. Lluis Álvarez: Académicu de l'ALLA. Nel Ricardo Álvarez y Norberto Martín: Miembros del SUATEA.

Opina sobre esta noticia nel Tableru d'Anuncies

Preséntase l'esperáu Diccionariu de l'Academia

7/12/2000 (Ramón d'Andrés) El Diccionariu de l'Academia va presentase na Xunta Xeneral del Principáu. L’actu institucional de presentación del Diccionariu de la Llingua Asturiana, organizáu en comuña pola Academia de la Llingua Asturiana y la Xunta Xeneral del Principáu, va tener llugar n’Uviéu, nel Salón "Europa" del Palaciu de la Xunta Xeneral del Principáu dende les 7 de la tarde del miércoles día 13 d’avientu. Les dos instituciones mentaes conviden al actu, d’accesu restrinxíu, a una bona representación de la vida social, cultural y política d’Asturies. Nel actu falarán la Presidenta de la Xunta Xeneral, María Jesús Álvarez González, y el Presidente de l’Academia de la Llingua, profesor Xosé Lluis García Arias.
Opina sobre esta noticia nel Tableru d'Anuncies

El númberu 18 de la revista Lliteratura yá na cai

7/12/2000 (Redacción) L'Academia de la Llingua Asturiana, asoleyó esta seronda del 2000 el númberu 18 de la revista lliteraria Lliteratura. Los apartaos van dende la poesía pasando pola narrativa, l'ensayu y la crítica.
Na estaya de poesía preséntense cuatro poemes póstumos de José Antonio García del avientu de 1996. Los ensayos cuerren a cuenta de Roberto Corte que da un repasu al mundu del teatru col títulu de "Un comentariu sobre'l teatru n'asturianu: les dos décades caberes", l'otru ensayu, "Vindicación del panfletu o del discursu áulicu al pensamientu críticu", de Xuan I. Llope onde reflesiona sobre la situación actual d'Asturies y el so reciente pasáu. En narrativa apaecen cuatro rellatos de Adolfo Camilo Díaz, Fran Gayo, Xandro Martino Ruiz y Vítor Álvarez.
Piesllen la revista dos trabayos d'Esperanza Mariño Davila y Xosé Bolado que respeutivamente presenten dos comunicaciones: "Silvia la negra (Rellatos)" sobre la obra de Xulio Vixil y "En mirada ayena" sobre'l poemariu El llugar del Sol de Xuan I. Llope.

Opina sobre esta noticia nel Tableru d'Anuncies