Bienveníos al espaciu de la llingua Asturies.com ofrezte, en collaboración con Ramón d'Andrés y Espaciu y Tiempu, información sobre l'actualidá y les novedaes lliteraries referíes a la llingua asturiana. Si tienes dalguna información que crees que paga la pena que seya conocida escribi.

30/12/99 (Asturies.com)La selmana pasada informábemos de la esclusión de la llingua asturianu de la declaración de Drechos d'Internet del Senáu. Esta selmana tenemos que rectificar esta noticia. La Xunta pola Defensa de la Llingua infórmanos que la versión que manexamos yera'l borrador col que trabayaba la Comisión y que foi espublizáu en dellos medios amás de n'Asturies.com. De toles maneres, y depués de que la Xunta se punxere en contactu col senador Oblanca, esti unvió a l'Asociación el testu aprobáu, que reproducimos darréu, y qu'incluye l'interesante términu llingües estatutaries en cuenta del usual llingües oficiales, no que paez un intentu d'incluyir a les otres llingües del Estáu que nun foron dlclaraes oficiales nos estatutos.

VII.- Las lenguas y culturas españolas son signos de identidad que nos distinguen y que constituyen un valor añadido de nuestra entrada en el espacio digital. Nuestro idioma es un bien cultural que nos proporciona una ventaja competitiva al interrelacionarnos con la amplísima población mundial de hispanohablantes. Se establecerá un programa para consolidar y aumentar significativamente la implantación de contenidos en español dentro de la Red, incrementando la asignación presupuestaria al Instituto Cervantes, a través del cual también se iniciará un programa de conocimiento y divulgación de las lenguas estatutarias. Asimismo se dedicará especial atención a la comunicación en estos idiomas.

30/12/99 (Ramón d'Andrés) El pasáu 21 d'avientu morrió nel so Mieres natal la destacada folclorista Fini Suárez. Foi cofundadora del grupu "L'Aniciu" de Mieres y del grupu etnográficu "Muyeres", onde, amás d'executar instrumentos musicales, desendolcó un importante llabor como investigadora de variaos aspeutos del folclor musical popular. Collaboró con importantes músicos asturianos d'anguaño (hermanos Tejedor, grupu "Lliberdón", Jorte Areces...) y con delles bandes de gaites. Dirixía'l grupu "San Félix" de Candás y el grupu "Xorrecer" de Mieres y Vil.layana. Foi ganadora del Premiu Muestra de Folclor 1995, organizáu pola Fundación Municipal de Cultura d'Uviéu. Nos últimos tiempos daba clases de baille asturianu ne Escuela Municipal de Música de Mieres. La desapaición de Fini Suárez causó una fonda tristeza nos ambientes lligaos al mundu folclóricu y musical d'Asturies.

24/12/99 (Asturies.com) La Declaración de los drechos d'Internet aprobada pola Comisión d'Internet del Senáu escluye na so redacción al asturianu. El testu diz que "les llingües les y cultures españoles son signos d'identida que nos estremen y que constituyen un valor añedíu de la nuesa entrada nel espaciu dixital". Anque darréu especifícase qu'emplegando les infraestructures y l'apoyu a la difusión del castellanu nel Institutu Cervantes "entamaráse un programa de conocimientu y divulgación del gallegu, l'euskera y el catalán" y que tamién "se-y dedicará especial atención a la comunicación nestes tres llingües". El fechu ye especialmente grave si nos dacatamos que'l presidente de la Comisión ye l'asturianu Isidro Fernández Oblanca, un senador del PP que yera consideráu ente los sectores favorables a la oficialidá de la llingua como una de les persones afines a esta reivindicación.

24/12/99 (Ramón d'Andrés) Esta selmana ufiértamoste una rellación de les novedaes bibliofráquies n'asturianu del añu 1999. Puedes vela nesta páxina,

17/12/99 (Ramón d'Andrés) La Comisión d’Asuntos Estranxeros del Congresu de Diputaos d’España aprobó’l pasáu día 15 d’avientu el dictame del proyeutu de llei de ratificación de la Carta Europea de les Llingües Rexonales o Minoritaries, onde se compromete a defender tanto les llingües estaturiamente oficiales en comunidaes autónomes como les d’ámbitu más reducíu, como ye’l casu del asturianu, del aragonés o l’aranés.

Nel testu de la declaración establezse qu’España entiende por llingües rexonales minoritaries les reconocíes como oficiales nos estatutos d’ autonomía de Cataluña, Comunidá Valencia, Balears, País Vascu, Navarra y Galicia. Pero gracies a otra emienda transaccional, tamién s’inxertaron como llingües dignes de proteición aquelles non oficiales falaes n’Asturies, Aragón y Cataluña, en referencia al asturianu, l’aragonés y l’aranés, respeutivamente, anque nun son mentaes a costa fecha nel documentu.

La declaración defende l’usu de les llingües rexonales o minoritaries na educación preescolar, na enseñanza primaria y secundaria y na formación profesional, amás del so fomentu na enseñanza superior. Tamién se contemplen midíes de proteición nel ámbitu de la xusticia, l’alministración pública, los medios de comunicación y l’actividá económica. Ye d’esperar que’l Gobiernu español y l’asturianu asuman la decisión tomada pola comisión del Parlamentu central y nun s’escaezan del acuerdu, sinón que lu apliquen con midíes efectives.

17/12/99 (Redacción Asturies.com) Dende l'Academia de la Llingua lléganos esta nota que reproducimos dafechu; L'Academia de la Llingua Asturiana quier facer llegar a la opinión pública la so posición favoratible a la declaración que fexo la Comisión d'Esteriores del Congresu pela que se reconoz l'asturianu como llingua del Estáu. Declaraciones d'esta mena siempre son necesaries cuando tolos díes hai que s'esguedeyar por facer ver a los más intranxisentes y curtios d'información que la defensa de la llingua asturiana nun respuende a una zuna particular sinón a un fondu aliendu democráticu que se dexa sentir con puxu ente munchos pueblos y ciudadanos.

La declaración d'Esteriores tien, per otru llau, un valir exemplar qu'afala a los poderes asturianos a tomar en serio tou tipu de previsiones llegales ensin desarrollar y que van dende les constitucionales hasta les estatutaries. Porque hai que llamentar, por exemplu, qu'entá nun se pueda facer llibremente usu del idioma asturianu dientro les llendes del Principáu d'Asturies en toles circunstancies, que güei siga ensin xeneralizar la escolarización del idioma y que les peticiones feches, una vegada y otra, pola Facultá de Filoloxía favoratibles a la reconocencia de la llicenciatura en Filoloxía Asturiana, entá nun foren xestionaes de mou amañosu polos responsables de la Universidá.

L'Academia de la Llingua conoz con bona información les nueves y favoratibles perspeutives abiertes peles tresferencies educatives. Llograes éstes persabe que ye fácil facer les coses bien iguaes, coles previsiones que lleven a esa naguada xeneralización de la enseñanza del nuesu idioma que, per otru llau, encóntase nuna llarga y bona acoyida ente la nuesa xente.

Tamién l'Academia sigue con procuru tolo rellativo a la futura y conveniente televisión asturiana. Al mesmu tiempu que llamenta qu'entá nun se dieren los pautos aconseyables pa un futuru prestosu, llama a un bon entendimeintu pa que la televisión ufierte la totalidá de la so programación en llingua asturiana. Esa programación, ensin prexulgar los detalles, habrá echar man de toles posibilidaes daes poles nueves tecnoloxíes que puen resolver problemes hasta agora difíciles d'iguar.

La declaración de protección a la llingua asturiana afitada nel Congresu español, anque seronda, ta bien y ye necesaria. Pero ello nun ye abondo. A les declaraciones, pa tener sentíu fai-yos falta llueu que los poderes públicos tomen les midíes amañoses que les faigan vidables.

17/12/99 (Redacción Asturies.com) Y esta ye la nota que ta acababte univanos la Xunta pola Derfensa de la LLingua Dende las Xunta pola Defensa de la Llingua Asturiana queremos tresmiti-y a la xente d'Asturies el gran pasu que se dio ayeri cuando el Congresu de los Diputaos aprobó la carta Europea de les Llingües Minorizaes, na que s'incluye a la llingua asturiana.

Hasta agora la Llei d'Usu del asturianu recononoz-y a la nuesa llingua la categoría d'idioma, pero ún de los problemes p'algamar que los falantes d'asturianu tuvieren los sos drechos reconocíos yera la falta d'un reconocimientu esplícitu dende instancies estatales. Que'l Congresu apruebe esta Carta y que nella tea incluyida l'asturianu trai pala nuesa llingua unes consecuencies perimportantes y asitia'l debate llingüísticu nun planu distintu y muncho más favorable pa los y les que defendemos la normalización y recuperación de la llingua propia d'Asturies:

1-Un organismu estatal reconoz-y a l'asturianu la categoría de llingua y dánse-y los mesmos drechos qu'a les demás llingües de la UE.

2- Esta reconocencia esplícita de categoría de llingua a protexer, tien de llevar a curtiu o mediu plazu a una declaración d'oficialidá que torne un agraviu comparativu con otres llingües del estáu y que dea cumplimientu al mandatu constitucional de que les llingües españoles han ser oficiales acordies colos estatutos d'autonomía.

Esti fechu amuesa una vegada más la mezquindá, miopía y despreciupa cola nuesa cultura de los partíos políticos que n'Asturies-y ñeguen a la nuesa llingua categoría d'oficialidá cuando el propiu Parllamentu español y la normativa europea reconocen-y categoría d'idioma minoritariu européu.

Poro, dende la Xunta, col apoyu llegal y moral d'esti fechu hestóricu pidimos que s'entame'l procesu de reforma d'Estatutu d'Autonomía que faiga efectiva la oficialidá del asturianu y desanicie asina un anacronismu y una inxusticia que lleva a la conculcación de los drechos de los falantes d'asturianu.

17/12/99 (Redacción Asturies.com) La declaración tien tamién un aspectu negativu enforma; al nun apaecer mencionáu esplicitamente l'estatutu de Castiella y Llión queda fuera de la protección de la carta europea la llingua astur-llionesa falada en Llión y Zamora. L'únicu enfotu pa que la Carta pueda ser aplicada en Llión ye acoyese al artículu que diz qu'ha respetase l'area xeográfica de la llingua minoritaria p'asegurarr que les divisiones alministratives nun son torna pa la so promoción..

14/12/99 (Redacción Asturies.com) La Xunta pola Defensa de la Llingua Asturiana entrega el vienres 17 los Premios Andrés Soar que na so edición de 1999 tienen los siguentes ganadores:

Pegollu: Jose Angel Hevia
Madreña de Purpurina: Premiu ex-aequo al Ministeriu d'Educación y Ciencia y a la Conseyería de Cultura.

La entrega de los Premios fadráse'l vienres 17 d'avientu nel Salón d'Actos del Antiguu Institutu en Xixón (xunta la Plaza'l Parchís) de les 19:30 en delantre..

10/12/99 (Redacción Asturies.com) Col motivu de les fiestes navidiegues l'Academia de la Llingua Asturiana espubliza unes felicitaciones que se vienden nes llibreríes d'Asturies.

10/12/99 (Redacción Asturies.com) Depués d'una bona temporada ensin actualizar la páxina de la Xunta pola Defensa de la Llingua vuelve a incluyir conteníos nuevos, ente ellos una invitación pa firmar pola TV n'asturianu.

10/12/99 (Redacción Asturies.com) L'Academia de la Llingua Asturiana ta acabante espublizar el númberu 9 de la revista Cultures Revista Asturiana de Cultures que ta dedicáu monograficamente al Samartín y a la Cultura del Gochu. Nesti númberu inclúyense per primer vegada artículos de territorios de fuera del Principáu, como Argüeyos o'l llugar de nacencia del director de la publicación, Roberto González Quevedo; Palacios del Sil.

10/12/99 (Redacción Asturies.com) Conceyu Xoven-Zamora, en collaboración con Facendera pola Llingua, el Consejo de la Juventud de Zamora y del Ayuntamiento de Zamora entama un "Curso de Lengua Leonesa. El llïonés de las comarcas zamoranas", dende'l 4 d'avientu. Pa más información, contautar con Facendera ou Conceyu.

10/12/99 (Axencia de noticies CPN, Uviéu, País Asturianu) L'añu 2001 sedrá l'añu européu internacional de les llingües según recién proclamación fecha pola Xunión Europea (XE). Esta proclamación conlleva que la XE destinará nesi añu alrodiu los 1500 millones de pesetes pal fomentu y protección de les llingües d'Europa.

3/12/99 (Ramón d'Andrés) Nel mes de noviembre de 1974, tovía baxo la dictadura de Franco, apaecieron les dos primeres páxines de la sección "Conceyu Bable", dientro de la revista d'información xeneral "Asturias Semanal". Na presentación de la sección apaecía una semeya d'unos rapazos que tovía nun llegaben a los 30 años: Xosé Lluis García Arias, Xuan Xosé Sánchez Vicente y Lluis Xabel Álvarez.

La repercusión social que yá daquella tuvo esta sección foi tremenda, y pue considerase l'entamu de tol movimientu de recuperación llingüística y cultural que vive güei Asturies. "Conceyu Bable" convirtióse al pocu tiempu nuna asociación cultural de muncha influencia na sociedá asturiana de la Transición.

Nel aspeutu cultural, l'Academia de la Llingua Asturiana ye fía directa de "Conceyu Bable", pero tamién les formaciones polítiques de mena asturianista que foron surdiendo al calor de C.B., la primera d'elles Unidá Rexonalista y poco depués el Conceyu Nacionalista Astur.

Venticinco años depués, "Conceyu Bable" ye un referente históricu, pues fizo posible un descomanáu cambiu de mentalidá na sociedá asturiana, anque los resultaos prácticos tán más lloñe de lo que'l cambiu de sieglu esixiría nesta sociedá democrática de nuestro.

3/12/99 (Redacción Asturies.com) Esta selmana presentóse'l proyectu de presupuestos pal añu 2.000 del nuevu gobiernu socialista asturianu. La partida destinada a la llingua asturiana ye de 188 millones de pesetes, esto ye, un 43% menos que l'anterior presupuestu que fora frutu d'un alcuerdu ente'l PP de Marqués y el PAS (partíu agora estraparllamentariu). Esta tayada foi denunciada na Comisión de Cultura del Parllamentu Asturianu polos grupos de IU-IX y URAS.

3/12/99 (Redacción Asturies.com) Esti añu tamién hebo bones noticies pa la nuesa llingua nel Festival de Cine de Xixón. Malu, ún de los tres curtios presentaos n'asturianu, foi'l ganador del Día d'Asturies.

3/12/99 (Redacción Asturies.com) Del 9 al 22 d'Avientu, el Conseyu de la Mocedá de Llión-Consejo de la Juventud de León, Conceyu Xoven y Facendera pola Llingua, col sofitu l'Ayuntamiento de León, van entamar un cursu básicu de llïonés. Les clases pondránse de 18:00 a 21:00 horas na sé del propiu Conseyu. Puedes pidir más información per al Conseyu de la Mocedá, Conceyu Xoven o Facendera pola Llingua.