Bienveníos al espaciu de la llingua Asturies.com ofrezte, en collaboración con Ramón d'Andrés y Espaciu y Tiempu, información sobre l'actualidá y les novedaes lliteraries referíes a la llingua asturiana. Si tienes dalguna información que crees que paga la pena que seya conocida escribi.

28/4/2000(Redacción) La meyor guía pa conocer les actividaes dedicaes a les nuestres lletres tienesles nesti especial preparáu por Asturies.com; Academia, conseyería, Xunta pola Defensa de la Lingua...

Y hasta la primer retrasmisión d'un partíu de futbol n'asturianu.

28/4/2000(Ramón d'Andrés) El pasáu 25 d’abril, el conseyeru de Cultura, Javier Fernández Vallina, y el presidente de l’Academia de la Llingua Asturiana, Xosé Lluis García Arias, firmaron un protocolu de collaboración sobre dellos aspeutos importantes que toquen a la política llingüística. Quiciabes lo más destacable del documentu ye que la Conseyería de Cultura comprométese a xeneralizar la ufierta de l’asignatura de llingua asturiana a tolos centros dende’l cursu 2000-2001.

Per otru llau, afítense otros asuntos pa una futura collaboración, como son la convocatoria de beques de trabayu y d’investigación; la fechura del atles llingüísticu asturianu; la participación académica en proyeutos del Gobiernu que tengan rellación cola llingua; la política llingüística qu’ha facese na zona Navia-Eo; y la fundación d’una Sociedá d’Amigos de l’Academia.

28/4/2000 (Redacción) Esti añu la Xunta pola Defensa de la Llingua Asturiana axunta a la tradicional reivindicación de la oficialidá, la de que l'asturianu seya la llingua vehicular de la futura TV asturiana. Puedes alcontrar más información na web de la Xunta.

28/4/2000(Ramón d'Andrés) L’Academia de la Llingua y la Conseyería de Cultura celebren anguaño xuntes el Día de les Lletres Asturianes, depués d’abondos años (dende metá de los años 80) d’enfrentamientu y falta d’entendimientu. Los responsables de dambes instituciones felicítense pol acontecimientu y coinciden na necesidá de qu’estes rellaciones seyan bones. Pela parte de l’Academia, Xosé Lluis García Arias afirma qu’esti conseyeru, a diferencia d’otros, sabe escuchalos; pela parte del conseyeru, afírmase que la collaboración cola Academia ye una necesidá. No que nun hai acuerdu nengún ye sobre la oficialidá del idioma.

28/4/2000(Redacción) Andecha Astur ta llevando a cabu en dellos Conceyos d'Asturies concentraciones pidiendo unes ordenances municipales sobro oficialidá de la llingua. Hasta agora yá se lleven feches concentraciones nos conceyos de Riosa, Piloña, La Villa, Carreño y Uviéu. El 13 de mayu celebraráse otra concentración en Llangréu y el 19 en Santolaya de Morcín.

19/4/2000(Redacción) Xosé Nel Comba Paz, un investigador asturianu, ta acabante recibir el prestixosu Premiu Patac por un estudiu sobre la lliteratura asturiana n'asturianu hasta 1975. Nel so estudiu recuye un repertoriu de 400 autores qu'emplegaron la nuestra llingua.

19/4/2000(Redacción) Nel actu institucional del XXIII Día de les Lletres Asturianes que tolos años tien llugar, sacante delles escepciones como los dos últimos años, nel Teatru Campoamor d'Uviéu, l'Academia de la Llingua fadrá un reconocimientu al llabor del grupu musical Llan de Cubel no que toca al usu y espardimientu de la nuestra llingua. Esti actu, nel que'l presidente de l'Academia, Xosé Lluis García Arias fadrá'l so discursu institucional, cuntará cole actuacines de José manuel Collado (tonada), y Vicente Prado "El Pravianu" (gaita), amás de los propios Llan de Cubel..

14/4/2000(Redacción) Según pudo saber Asturies.com el Diccionariu de la Llingua Asturiana, una obra hestórica na que l'Academia de la Llingua lleva trabayando la última década, yá ta zarráu y va presentase el prósimu día de les Lletres Asturianes, el primer vienres de mayu. L'Academia tamién tien nesti momentu n'imprenta'l so llibru de Toponimia na que se recueyen los nomes de conceyos, parroquies y llugares.

7/4/2000(Redacción) La Xunta pola Defensa de la Llingua Asturiana y Xunta Moza llamen a los asturianos y asturianes a una concentración el prósimu día 13 d'abril a les 7 de la tarde delantre la Xunta Xeneral del principáu n'Uviéu pa demandar énte'l gobiernu d'Asturies una TV n'asturianu. Esta concentración ye un complementu a la campaña Por una TV n'asturianu 100% na que la Xunta lleva recoyíes más de 20.000 firmes d'apoyu.

7/4/2000(Redacción) Fernando Alvarez-Balbuena ye'l representante de la Xunta pola Defensa de la Llingua Asturiana que'l prósimu 14 d'abril va participar nuna mesa redonda nes xornaes "sobre lenguas grans y lengua chicotas" qu'entama l'Asociación aragonesa Nogará. La mesa redonda tendrá llugar na Biblioteca de Zaragoza'l día 14 a les 19:30 y xunto con Alvarez-Balbuena va intervenir una representante gallego y un representante catalán.

7/4/2000(Redacción) El Conseyu de la Mocedá de Xixón (CMX), en collaboración col Conseyu de la Mocedá de Llión, entama un viaxe a Miranda col envís de dar a conocer a les asociaciones xuveniles xixoneses la relidá del dominiu llingüísticu astur-llionés. El viaxe fadráse'l prósimu vienres día 14 y nel van participar 50 xixoneses miembros de les más de 50 asociaciones xuveniles que componen el CMX, acompañaos por dellos músicos. Nel mesmu vienres fadráse parada en Xixón onde a la delegación van recibila miembros del Conseyu de la Mocedá de Llión y el sábadu viaxará a Miranda au van ser recibíos por representantes institucionales del Conceyu de Miranda na Cámara Municipal.

7/4/2000(Redacción) Con motivu del Día Européu de les Llingües Minorizaes, Conceyu Xoven de Zamora, IDEL, Facendera pola Llingua y Zamoranos pola Llingua entamen un alderique sobre "La situación llingüística del País Llïonés; presente y futuru", na ciudá de Zamora n'Abril 8 de 2.000.

Esti alderique va ser el Pieslle al Cursu de Llingua d'estes organizaciones que cuntó cola presencia de 35 presonas.

Conceyu Xoven va poner tamién un Autobús que va facer una "Ruta pola Llingua", dende Llión a Miranda de l Douro, pasando per delles localidaes.

7/4/2000(Redacción) L´Academia de la Llingua Asturiana, sabiendo´l fondu interés de munches persones por llograr que se reconoza la so conocencia de la llingua y manifestar asina´l so fondu amor al idioma asturianu. Nesi sen da anuncia de les sos iniciatives pal xeneral conocimientu:

1. Nel mes de mayu celébrense les pruebes, abiertes a toles persones interesaes.
2. Plazu de matrícula el 15 al 25 de Mayu. La prueba semestral fadrase´l dia 27 de Mayu.
3. A les persones declaraes aptes nes citaes pruebes, l´Academia dará-yos un documentu onde s´afite la conocencia nel nivel 1 o básicu según los calces siguíos por esta Institución.
4. Les persones que nun superen les pruebes del nivel 1 podrán presentase a nueves convocatories cuantes vegaes-yos pruya.
5. Pal bon resultáu d´estes pruebes habrá tenese un dominiu básicu de les estayes que vienen darréu:
a. Estaya llingüistica
a.1. Teoría gramatical: conocencia y dominiu del funcionamientu gramatical del asturianu y de la normativa académica.
a.2. Práutica escrita: Emplegu amañosu de la llingua, puestu en práutica gracies a exercicios gramaticales y de composición escrita.
a.3 Práutica oral: Emplegu faláu de la llingua, nuna situación real o imaxinaria, que será valorada nuna conversación colos miembros del xuráu calificador.
b. Estaya de llingua y sociedá
Conocencia del allugamientu de la llingua dientru de la sociedá asturiana asina comu del procesu de normalización en que ta inxerta.
6. La prueba constará de dos partes, una escrita (dictáu, torna, exercicios gramaticales, redaición) y otra falada (conversación). P´algamar el certificáu fairáse preciso superar les dos partes citaes.

Nota. Resulta imprescindible conocer les xeneralidades gramaticales de la llingua asturiana y los aspeutos básicos de la so normativa ortográfica (gramática de la Lingua Asturiana, Academia de la Llingua Asturiana, Uviéu 1999). Asina mesmo aconséyase la llectura de testos fechos acordies cola normativa, como los asoleyaos por esta Academia.