"Asturies nun tien proyectu de comunidá"

Francisco Javier García Valledor lleó’l Día de la Patria Asturiana un discursu políticu onde analizó la deriva d’una autonomía que funciona, dixo, como una antigua diputación

Xuan Bello

Francisco Javier García Valledor, diputáu por IX, lleó’l Día de la Patria Asturiana, 8 de setiembre, nel escenariu de la Xunta Xeneral, un discursu políticu que superó con muncho les aréngules protocolaries al usu. Valledor consideró que yera’l momentu de «facer una revisión política de la nuesa realidá», yá que se taba faciendo alcordanza de los venti años de l’aprobación del Estatutu d’Autonomía, y polo tanto puntu d’inflexón de la nuesa capacidá d’autogobernanos Nun discursu sensatu, posáu y intelixente, tan abiertu al diálogu como críticu, el diputáu d’IX sentó les bases d’un nuevu proyectu políticu, basáu nel autogobiernu y en base d’una federalización del Estáu español y d’Europa. Valledor, d’esta miente, criticó«un Estáu de les autonomíes desigual y asimétricu y a tenor de los ritmos exasperantes resultantes de les polítiques estatales».

Venti años nun son nada

En tonu elexíacu, Valledor dio-y al tango y remembrónos que «venti años nun son nada» nun discursu íntegramente dichu n’asturianu. Remembró aquella afirmación preautonómica de Pedro de Silva, primer presidente de la Comunidá Asturiana, cuando afirmaba en «Asturias: realidad y proyecto» que «los grandes problemas que Asturias tiene planteados en la actualidad se derivan también de su lamentable inexistencia como comunidad». El diputáu d’IX, serenu, afirma que «desgraciadamente esti diagnósticu que se facía enantes de la nuestra constitución como Comunidá Autónoma sigue valiendo güei», yá que, n’opinión de Valledor, «la nuestra historia como comunidá ye la constatación de la inexistencia d’un proyectu políticu p’Asturies, un proyectu d’autogobiernu qu’articulara políticamente la nuestra conciencia colectiva como pueblu».
Francisco García Valledor criticó que «les competencies y facultaes d’autoorganización y financiación» que foi recibiendo Asturies se fixeran «al marxe de la voluntá de determinación activa de les nueses instituciones polítiques»..
Nesti sen, el diputáu d’IX piensa que «al nuestru país, Asturies, negáron-y la reconocencia de los mesmos derechos políticos, económicos, llingüísticos, institucionales o competenciales que sí se reconocieron a otres nacionalidaes históriques d’España» y too ello «cola complicidá activa de sectores sociales y culturales influyentes, grupos empresariales, ámbitos significativos de los medios de comunicación d’Asturies, y una parte curiosa de les direcciones polítiques del PSOE y del PP». El resultáu de los venti años d’esta dinámica, a xuiciu de Valledor, nun puede ser más probe: «Les nuestres instituciones polítiques, ruines a costafecha, y la negación de los rasgos d’identidá llingüística y cultural mantuvieron el calter provincianu de “Diputación” d’una política basada na xestión de la crisis y del procesu de desindustralización que tuviemos sufriendo».

Un ente alministrativu

La tesis del discursu de Francisco García Valledor ye qu’Asturies, nestos venti años, foi xestionada polos sucesivos gobiernos del PSOE y el PP como un meru ente alministrativu. Asina, nestos venti años «nos que los sucesivos y brutales procesos de reconversión industrial, desaniciu de lo público y pérdiga d’empléu se xustificaben nun modelu nuevu de reindustrialización que nunca llegaba». Consecuencies: «El campu asturiano viose obligáu a zarrar caseríes colo que’l mundu rural sigue, silenciosamente, decayendo y despoblándose. Venti años ensin un sistema públicu de comunicación (radiotelevisión asturiana), ensin instituciones polítiques básiques como’l Defensor del Pueblu, la Sindicatura de Cuentes o’l Conseyu Consultivu». Pa Francisco García Valledor tou esti tiempu «foi un tiempu esperdiciáu pa reconocer un derechu básicu como la oficialidá de la nuestra llingua, y pa desarrollar una política cultural qu’articulara y potenciara los nuestros elementos d’identidá». Tamién criticó «un sistema electoral iguáu artificiosamente en tres circunscripciones pa desfigurar la voluntá espresada nes urnes y viéndonos obligaos a que les nuestres elecciones autónomes tengan que se facer cuando manda una llei estatal (como si fuéramos un ente alministrativu) quitando de facto la posibilidá de disolución anticipada de la Xunta Xeneral».
Presos del pasáu

La frase foi lapidaria: «Anguaño’l nuestru presente sigue esencialmente presu del pasáu», yá que según el diputáu d’IX «el Gobiernu del Sr. Areces nun foi quien a articular y impulsar un proyectu políticu p’Asturies a pesar de lo enfotada que taba nél una parte bien importante de la sociedá asturiana que naguaba por zarrar un ciclu históricu yá vieyu. Güei Asturies ta decayida, ensin gracia, ante una ciudadanía cada día más indiferente y menos capaz d’un proyectu común».
Nesti mesmu orde de coses, Valledor criticó «l’alcuerdu al que llegaron va poco’l PP y el PSOE sobre’l modelu nuevu de financiación», yá que «vuelve a ponenos delantre d’un Gobiernu asturianu que nun quier acordar una propuesta propia dende la nuestra comunidá p’atechase no que-y dea yá acordao la dirección estatal del so partíu, onde, por cierto, les esmoliciones sobre’l modelu de financiación autonómica taben bien lloñe d’Asturies xeográfica y políticamente».
Asina, Valledor criticó ásperamente «los proyectos de cartón piedra y propaganda de calter caudillista de los señores Areces y Cascos», toos dos nuna amarraza pol poder «onde Asturies fai de campu de batalla». Y afirma: «Na Comunidá onde la tasa d’actividá llaboral ye la más baxa del Estáu y la segunda en cuantes a tasa de paru, el discutiniu por llevar el méritu pola baxada qu’hubo del paru ye de pena, y ofiende que la obligada cooperación interinstitucional ente los gobiernos estatal y de la Comunidá pa poner igua a los problemes y torgues de les nuestres infraestructures se convierta tolos díes nuna engarradiella mientres los proyectos van allargándose nel tiempu».
Valledor finalizó’l discursu institucional faciendo un brinde al futuru: «Paeznos qu’Asturies tien qu’entamar un ciclu históricu nuevu, y esto namás pue facese con un proyectu colectivu y plural de la izquierda asturiana, un proyectu políticu pa la construcción de la nuestra Comunidá». Finalmente, enmarcó toes estes idees nun discursu anti-globalizador: «El mundu de la globalización, onde se-y quita conteníu a la capacidá de decisión de les instituciones democrátiques [...] La izquierda tien qu’entamar un proyectu políticu d’autogobiernu que se proyecte más p’allá de les nuestres fronteres. Otra Asturies ye posible si facemos posible otru mundu».