Isidro Martínez Oblanca Senador del PP por Asturies

«Cascos diba ser bonu pa cualquier puestu»
«Nosotros consideramos qu’Altadis tien que facer inversiones pa compensar el pieslle de la Fábrica de Cimavilla. Nun privatizamos Tabacalera pa perder trabayos en Xixón»

Xuan Bello


Dicen que ye la mano derecha de Francisco Álvarez-Cascos. Xixonés hasta la médula («vivo y voi vivir siempre en Xixón») vese en Madrid «coxunturalmente» y piensa qu’Asturies tien un pesu notable a la hora de facer el balance estatal. Na reforma del Estatutu convenció a Álvarez Cascos pa que’l so partíu aceptara la posibilidá de que la Xunta proclamara la oficialidá (hipótesis que’l PSOE refugó y acabó por nun recoyese nel Estatutu d’Autonomía). Con too y con eso piensa que «el PP inda tien que facer muncho pola cultura n’Asturies».

–¿Qué ye lo que nos puede dicir de les inversiones d’Altadis na Fábrica de Tabacos de Cimavilla? ¿Van p’alantre?

-Tamos pendientes toos de qu’Altadis concrete inversiones que de dalguna manera amortigüen el fuerte impactu que va suponer la supresión de la Fábrica de Tabacos de Cimavilla. En principiu nun tenemos otres noticies que les que nos participó Altadis al PP y al Gobiernu asturianu nel sentíu de que paez que va per bon camín el proyectu d’una fábrica de discos ópticos que diba suponer 12.000 millones d’inversión y un bon númberu de puestos de trabayu nuevos. Insisto: les úniques noticies que tenemos d’esa inversión son que los participantes yeren capitales procedentes de diversos países y ello ocasionaba una gran complexidá a la hora de la tramitación. Paez ser qu’ún de los inversionistes reclama una mayor participación y eso tracamundiara’l papeléu. Eso ye lo que nos diz la propia empresa Altadis, ensin que pel momentu echaran p’atrás la inversión. Aparte d’esto, cónstanos qu’Altadis ta intentando concretar dalgunes otres inversiones; non d’esi calibre, pero en principiu esiste un compromisu por parte d’Altadis pa intentar amortiguar el pieslle de la Fábrica de Tabacos. Yo creo que ye un compromisu que respuende a la obligación moral que tien l’antigua Tabacalera pa paliar los efectos que va tener la retirada d’esta fábrica de tabacos.

–Choca un poco que se pieslle una planta a plenu rindimientu que xeneraba beneficios.

–Naturalmente, choca. Y más d’una empresa como Altadis, que tien una gran balance de resultaos na so cuenta de beneficios. Ensin dir más llonxe, 30 mil millones de pesetes nesti primer semestre del añu 2001. El PP nun privatizó Tabacalera pa pesllar puestos de trabayu en Xixón, sinón tolo contrario. Altadis tien una obligación moral y dende llueu dende’l PP esiximos a la empresa que cumpla.

–¿El Gobiernu de José María Aznar puede facer dalgo nesti sentíu?

–Non. Altadis ye una empresa privada y les empreses privaes respuenden únicamente énte los sos accionistes, polo tanto nun se pue facer nada dende’l Gobiernu central. Hai que tener en cuenta tamién que’l pieslle de la Fábrica de Tabacos de Xixón respuende a un plan industrial que la empresa Altadis pautó colos sindicatos, colos representantes de los trabayadores. En nun habiendo un alcuerdu previu ente sindicatos y empresa, el Gobiernu nun aprobaba esi plan industrial. Hai una situación que ye’l resultáu d’un alcuerdu ente sindicatos y empresa. El Gobiernu lo único que pue facer ye mover a cumplir la llei; y la llei, no que se refier a les sociedaes anónimes, diz que los accionistes respuenden énte’l so Conseyu d’Alministración, non énte’l so Gobiernu.

–Usté ta en Madrid. Asturies, dende ellí, ¿vese d’una manera más difusa o más clara?

–Vese igual. El mio papel en Madrid ye coxuntural. Yo, en cuantes tengo la más mínima oportunidá, escapo de Madrid. Ellí toi’l menor tiempu posible, ente otres coses porque la mio tierra ye Asturies, tengo la mio casa en Xixón y pienso vivir en Xixón tola vida. Polo tanto, la visión que se pue tener dende Madrid, pa min, ye mui paecida a la que tengo equí.

–Suel dicise qu’Asturies ye una comunidá con pocu pesu dientro l’Estáu. ¿Esto ye realmente asina o trátase a cencielles d’un tópicu políticu?

–Ensin dulda hubo comunidaes que nel so momentu apelaron a determinaes víes pa obtener les sos realidaes autonómiques, y Asturies optó per otra vía. Ensin dulda les autonomíes históriques tienen más pesu, pero pienso qu’Asturies nun tien nada qu’envidiar en cuanto pesu específicu en Madrid a otres autonomíes similares. Otra manera, yo tamién tengo que dicir qu’hai asturianos en Madrid en puestos de responsabilidá importante a nivel de gobiernu, como puede ser el vicepresidente segundu o mesmamente Francisco Álvarez-Cascos, que creo que tán barriendo muncho p’Asturies. Y hai que dicilo too: esto vese con rocea dende otres comunidaes autónomes.

–¿Álvarez Cascos diba ser un bon presidente pa esta comunidá?

–Álvarez Cascos diba ser bonu pa cualquier cosa, porque un políticu de la talla d’él pue ocupar un puestu de cualquier responsabilidá cola garantía absoluta de que lo pue facer fantásticamente

–¿Va ser el próximu candidatu al PP a la presidencia d’Asturies?

–Ye un debate qu’inda nun tenemos abiertu nel PP. Los debates de candidatos facémoslos cuando toca, como diz José María Aznar. El próximu tocará pa xineru o febreru del añu 2003, polo qu’hasta ésa cualquier especulación ta condenada al fracasu.

–¿Podría esplicame la tensión esistente ente’l Gobiernu asturianu y el central?

–Trátase d’una tensión que nun ye productu de la casualidá. Sobra con ver los antecedentes. Tamos con una comunidá presidida pol Sr. Areces que yá nel so tiempu como alcalde de Xixón dedicóse en cuerpu y alma a facer oposición, a enfrentase al Gobiernu de José María Aznar dende 1996. Polo tanto l’actual situación nun ye nin muncho menos novedosa pa los que conocemos al Sr. Areces. Lleva cinco años, primero como alcalde y agora como presidente d’Asturies, faciendo exactamente lo mesmo: la política de la bronca, de la confrontación, la política d’obleru contra’l PP.

–En ciertos circuitos asturianistes fálase d’usté como una persona sensible a la cultura asturiana. ¿Considera qu’el tema cultural ye ún de los problemes d’Asturies?

–Lo primero que tengo que facer ye agradecer a los que dicen eso de min, porque la verdá ye que me presta como asturianu. Pienso que’l mio partíu inda tien munches coses que facer nel campu de la cultura y específicamente nel campu de la cultura asturiana. Nesti sentíu creo qu’a lo llargo de la historia dexamos munchu tiempu ensin tomar cartes nel asuntu. Dende’l PP podemos facer, nesti campu, coses mui importantes por Asturies.

–¿Como la oficialidá del asturianu?

–Con tola sinceridá, nun la vemos. Ye verdá qu’hai un par d’años, cola reforma del Estatutu d’Autonomía, planteamos la posibilidá de que foren los representantes de los asturianos los que decidieran sobre esa cuestión. El PSOE echóse atrás, y foi una pena.