Bienveníos al espaciu de la llingua asturiana Ramón d'Andrés ofrezte, en collaboración con Asturies.com y Espaciu y Tiempu, información sobre l'actualidá y les novedaes lliteraries referíes a la llingua asturiana.
Si tienes dalguna información que crees que paga la pena que seya conocida escribi.

29/10/99 (Ramón d'Andrés) Nel pieslle de les XVIII Xornaes d'Estudiu qu'entamó l'Academia de la Llingua Asturiana na Universidá d'Uviéu, el conseyeru d'Educación y Cultura del Principáu, Javier Fernández Vallina, comprometióse a defender la llingua asturiana por ser un patrimoniu cultural y un niciu d'identidá de los asturianos. Nun precisó, de toes maneres, les midíes concretes. Estes declaraciones fízoles nel actu d'homenaxe al profesor José Luis Pensado Tomé, veteranu filólogu que dende la Universidá de Salamanca trabayó permuncho nel conocimientu del gallego-portugués y del asturianu. Nel mesmu actu intervinieron tamién la decana de la Facultá de Filoloxía d'Uviéu, Ana Cano González; el decanu de la Facultá de Filoloxía de Salamanca, Emiliano Fernández Vallina; el rector de la nuestra Universidá, Julio Rodríguez; y el propiu profesor homenaxáu. Dase la circunstancia de que'l decanu de Salamanca, hermanu del nuestru conseyeru de Cultura, espresóse en tou momentu nun asturianu bastante correutu.

29/10/99 (Ramón d'Andrés/ Redacción) Ún de los puntos de debate ente IU y PSOE nel intentu de consensuar una TV autonómica ye la de la presencia del asturianu. IU pide qu'a lo menos l'asturianu tea presente nun 50% de la programación, posición que tamiñen sofita la Paltaforma de Peridostes pol Asturianu qu'axunta a 100 profesionales de la información.

El sindicatu d'enselñanza SUATEA pide qu tola programación infantil y xuvenil seya n'asturianu y el partíu nacionalista Andecha Astur fai la propuesta formal a Izquierda Xunida de que defenda con ellos que la futura televisión asturiana emita dafechamente nel idioma autóctonu, como mediu de preservar la llingua y la cultura de nueso.

29/10/99 (Ramón d'Andrés) El Príncipe d'Asturies fizo una referencia esplícita a la necesidá de respetar y defender les llingües minoritaries, cuando nel discursu na entrega de los Premios que lleven el so nome, dixo: "La muerte de una lengua, incluso de aquélla susurrada por un puñado de personas en un trozo de tierra perdido, es un empobrecimiento colectivo, es la muerte de un mundo". Munchos quixeron ver nello un ceguñu d'apoyu al llabor de recuperación del asturianu, la llingua minoritaria más cercana al Teatru Campoamor, que yera onde se dicíen eses palabres.

29/10/99 (Redacción) El Conceyu de Mieres convoca el IX Premiu Teodoro Cuesta de Poesia 1999 en collaboración cola Casa de Cultura 'Teodoro Cuesta' de Mieres y la Conseyeria d'Educacion y Cultura del Principau d'Asturies.

Más información en http://www.clar.net/cm/casa-cultura

22/10/99 Esti fin de selmana celébrense na Pola de Gordón los alcuentros qu'organicen tolos años Facendera pola Llingua y Xunta pola Defensa de la Llingua nos que se traten dellos aspectos de la normalización llingüística en tol dominiu astur-lleonés.

22/10/99Con una charla nel chigre l'Abellugu a la qu'asisitieren unes 40 persones interesaes refundóse la pasada selmana la Xunta pola Defensa de la Llingua na cuenca del Caudal. Los y les asistentes comprometíeronse tamién a echar a andar un conceyu de Xunta Moza nel llugar. Por ciertu, dende la Xunta infórmennos tamién de la inminente actualización periódica de la so web, qu'agora ta inactiva, coincidiendo con una publicación en papel del boletín de la organización.

15/10/99 Depués d'un mes de conflictu el Principáu y el MEC algamaronun alcuerdu pol que se van contratar 116 mayestos d'asturianu colo que de xuru finalizarán les protestes d'enseñantes y escolinos.

15/10/99 L'Academia de la Llingua organiza les sos Xornaes d'Estudiu los próximos díes 25, 26 y 27 d'ochobre na Facultá de Filoloxía. Pues consultar el programa que ta na páxina web de l'Academia.

15/10/99 El Premiu de Ciencies Sociales un premiu correspuénde-y al historiador británicu Sir Raymond Carr. Lo que munchos nun saben ye que'l premiáu ye un visitante habitual a Asturies tien amistaes na redacción de la revista "Asturies, memoria encesa d'un país", editada por Belenos de manera que nel penúltimu númberu esta revista publica un escritu suyu n'asturianu.

8/10/99 El presidente de l'Academia de la Llingua, Xosé Lluis García Arias, y el vicepresidente, Roberto González-Quevedo, foron recibíos el día 5 de setiembre pol presidente del parlamentu portugués y pol ministru d'educación d'esi país, faciendo d'anfitrión Júlio Meirinhos, ex-alcalde de Miranda de Douro.
Pa más información: "Alitar Asturies" del 28 de setiembre; últimu númberu de "Lletres Asturianes"; "Les Noticies" del día 15 de setiembre.

8/10/99 Dende'l mes de setiembre, trancáronse na Delegación d'Educación d'Asturies los profesores de llingua asturiana d'Educación Primaria, en protesta pol problema que se vien dando tolos años al empiezu del cursu, que consiste en que'l Ministeriu d'Educación axudica dende Madrid un númberu de places d'asturianu mui perbaxo de les necesidaes educatives. Esti añu sacaron namái que 55 places y necesítense 51 más, colo que'l derechu de los rapacinos y de los pas a recibir enseñanza d'asturianu vese conculcáu claramente. La Delegación del MEC y la Conseyería d'Educación pásense la pelota, echándose les culpes mutuamente.
Los maestros trancaos recibieron l'apoyu, ente otres persones y organizaciones de la presidenta de la Xunta Xeneral del Principáu, de l'Academia de la Llingua, de la URAS, de la Xunta pola Defensa de la Llingua, IU, Andecha Astur o'l BIA,. Amás, claro ta, de los sindicatos de la enseñanza.

8/10/99 Morrió Xosé Antón Fernández, el pasáu 6 de setiembre. Yera maestru d'asturianu, ún de los qu'entamó cola esperiencia de los 6 primeros centros-pilotu nel cursu 1984-85. Foi autor de llibros de didáctica del asturianu.
Pa más información: "Alitar Asturies" del 12 de setiembre; últimu númberu de "Lletres Asturianes", qu'acaba de salir. .

8/10/99 El pasáu branu, na Facultá de Filoloxía de la Universidá d'Uviéu, axudicáronse dos places de Profesor Titular de Filoloxía Asturiana a los doctores Xulio Viejo Fernández y Ramón d'Andrés Díaz. Son les primeres places universitaries que lleven la denomación de Filoloxía Asturiana.

8/10/99 La escritora Ángeles Caso publicó na revista "El Semanal" del pasáu día 3 d'ochobre, un artículu tituláu "La nuestra llingua", que supón una defensa rotunda de la importancia del asturianu como llingua y de la xusticia de la so reivindicación, mesmamente unviando un apoyu a los maestros trancaos n'Uviéu. Ye la primera vegada qu'un "famosu" con nomadía fuera d'Asturies sal en defensa tan clara y valiente de la reivindicación de los derechos llingüísticos, anque nun hai qu'escaecer que tamos falando de la fía del fallecíu profesor José Miguel Caso González, catedráticu de lliteratura y convencíu asturianista que non sólo escribió na nuestra llingua, sinón que tomó postures de claru apoyu, lo que-y valió les enemistaes d'otros catedráticos de la Facultá de Filoloxía.

8/10/99 Investigadores y profesores de la Facultá de Filoloxía participaron nun Congresu d'Onomástica en Santiago de Compostela. Foron: Ana Cano González, Xosé Lluis García Arias, Loreto Díaz, Xulio Viejo y Fernando Alvarez-Balbuena.