Los seyes meses de la muerte
El día ún de payares foi la víspera de difuntos, una
celebración tan antigua como la humanidá mesma.
Hai 2.000 años, ochenta xeneraciones p'atrás, los antigos pueblos
d'Europa Occidental celebraben tamién el SAMAIN, una
conmemoración que diba separtar l'añu en dos metades: la metada
de la vida y la metada de la muerte.
Los primeros seyes meses d'esti vieyu calendariu simbolizaben la vida, la lluz,
el sol, les fiestes de branu, nes que la mocedá ye la protagonista. esti
ciclu finaba precisamente cuando llegaben los Difuntos. Entós entamaba
el ciclu de los seyes meses de la muerte, de la escuridá y fríu,
nos que les tiniebles vencíen a la lluz. Los seyes meses nos que los
protagonistes van ser les xeneraciones mayores. Si pel branu yeren
protagonistes los mozos agora van selo los más vieyos que pase a ser el
centru d'atención. Agora toos van a escuchalos falar, nes llargues
nueches de seronda y iviernu, delantre del fueu del llar. Agora van cuntar les
vieyes hestories y aconteceres, les tradiciones tresmitíes de
xeneración en xeneración.
De toles maneres, estes vieyes cultures europees, ente les que taba la de los
astures, nun consideraben la muerte como un horrible fin. pa ellos la muerte
yera parte d'un ciclu natural necesariu que tenía que repetise de
contino...vida/muerte, nueche/día, lluz/escuridá, partes que nun
yeren a separase d'un tou.
El cristianismu conmemoró'l cultu, veneración o alcordanza de los
antepasaos y los seres queríos que nos dexaren solos nel camín
aprovechando precisamente esta fiesta del SAMAIN. Santos católicos
vistieron l'hábitu de dioses prerromanos y superpunxéronse les
creencies, pero la conmemoración permanez.
Son seyes meses que van tener fin el día ún de Mayu, cuarenta
díes enantes del solsticiu de branu o San Xuan; el 1 de mayu nel
qu'antiguamente se celebraba Beltaine, el fueu de Bel. Con ello Belenos, el
dios del sol diba recuperar el so poder, inaugurando un nuevu tiempu pa la
vida.
A lo llargo de les prósimes selmanes diremos viendo lo que facíen
y en munchos casos entá faen los asturianos nestes feches.
Xurde Nel G. Morán
|
