Los Magüestos

La selmana pasada comentábemos qu’entamaba’l ciclu d’ibiernu nes fiestes y tradiciones asturianes. El ciclu que dio comiennzu’l día 1 de Payares, fiesta de Tolos santos, cristianización del antiguu SAMAIN de los pueblos célticos, nel qu’entamaba la segunda parte del añu, la de los meses del fríu y la escuridá, los meses de recoyimientu y de metese en casa, colos mayores como protagonistes.

Fiestes especialmente característiques d’esti tiempu son los magüestos, magüestos de castañes y sidra duce que se celebren en casi tolos pueblos y parroquies asturianes, recuperándose una tradición que tuviera a puntu d’estinguise.

Magüestu vien del asturianu magostar, quemar, turrar, asar, les castañes, productu típicu d’esti tiempu, lo mesmo que la sidra duce. Cola recoyida de castañes y cola sidra duce preparábase una gran fiesta comunitaria na que participaba tol pueblu; la fiesta del magüestu, o amagüestu. Y asina, ente castañes y sidra duce teníen llugar tou tipu d’aconteceres. La xente mayor, animada pola sidra y la fartura apuntábase a cuntar hestories de los antigos, y los rapazos, faciendo qu’escuchaben, aprovechaben pa ver si cortexaben un poco coles vecines.

Les fiestes de los magüestos, como les de los calechos y filandones, yeren especialmente temíes polos guardianes de los bones costumes, pues teníen fama de convertise en fiestes de pecáu y perdición. Nun yeren conmemoraciones relixoses y los párrocos, cures y obispos, alvertíen a los fieles del peligru que suponía qu’homes y muyeres, mozos y moces baliraren xuntos, bebieren xuntos y fixeren de too xuntos. Yera habitual que nel trescursu del magüestu, desapaecieren delles parexes que volvíen al pocu tiempu un tantu sudorosos y acaloraos y nun precisamente pol calor del fueu nin de les castañes.

Pero lo más picardioso solía tener llugar al acabar el magúestu, al volver pa casa, trevesando caminos y perdiéndose peles caleyes. Hai dalguna copla rellativa a esos sucesos.

Madre mía toi en cinta
fía mía cares son
les castañes que comisti
de que castañeru son

Fuisti a la romería
nun me trixisti perdones
cuando vengan les casteñes
maldita la que me comes

L’orixe d’estos magüestos súmese tamién na nueche de los tiempos. Sábese que foren los romanos los qu’espardieren la plantación masiva de castañales per Asturies. Anque según dellos descubrimientos, la castañal yera conocida nel NO peninsular enantes de la conquista romana. Seya como fuere, les castañes yeren la base de l’alimentación en munchs comarques asturianes hasta que se popularizó’l cultivu y consumu de pataques a principios del sieglu XIX. Inda güei, en dalgún pueblu de les montañes podemos topar l’antiguu pote de castañes, casi desapaecíu y que foi durante munchos sieglos el Platu Fuerte de la gastronomía asturiana.

Xurde Nel G. Morán