El Filandón

Otra celebración típica del tiempu de seronda son los filandones o calechos.

El Filandón consistía nuna reunión de muyeres de toles edaes que se xuntaben pa filar la llana o'l llinu. Sentábense nun local ampliu, enriba de tayueles cola rueca al cuellu y mesaben la llana llevándola al fusu, al palu que garraben na otra mano, que voltiaben faciendo de la llana filos.

Como n'otres celebraciones de les que yá falamos a los mozps permitíase-yos la entrada pa cortexar, pero con control, a la vista. Chisbando y ecucando taben les madres y les güeles, mirando a ver quien taba charrando coles neñes. Y como n'otres ocasiones venía la rápida intervención de los guardianes de la moral; parrocos, bispos y autoridaes civiles y eclesiástiques que publicaben bandos y sermones alvirtiendo de lo peligroses que yeren estes reuniones, de los "peligros" que corríen los mozos y les moces.

Hai tamién munches coples relatives a los filandones, como la que cantaben los mozos a les moces que-yos gustaben...




Texedora, el to telar
d'oru tien la llanzadera
quien la pudiere robar
y al telar y a ti con ella


Tres coses quixere
si dios me les diere
la texedora, el telar y la que texe

O les que cantaben les mesmes texedores nel trabayu...

Cola rueca nuna mano
y el fusu na faltriquera
voi pa casa la vecina
a marmuar de vida ayena

Cola rueca na cintura
yo me gano'l mi dinero
Poco se gana filando
menos se gana dormiendo

Na comarca más occidental d'Asturies, na raya con galicia, llamen al Filandón la Polavila. Yeren famoses les Polaviles que se facíen nel llugarín d'Escanlares, cerca de Grandas de Salime...

Al llugarín d'Escanlares
Chaman-y Montaña Fría
Malhaya l'agua que corre
que bonas rapazas cría

Los mozos cortexaben a les moces y al acabar la Polavila entanábase un cantar de despidida que dicía....
Esta vai por despedida
metida na garmayeira
los que nun somos de dentro
a esocupar a Lareira

Xurde Nel G. Morán