La Esfoyaza

Otra de les celebraciones asturianes típiques d'esti tiempu ye La Esfoyaza, el llabor comunitariu d'esfoyar, de quitar la fueya a les panoyes de maíz. Al ser les colleches d'esti cereal mui abondantes, y ser tamién el maíz l'alimentu básicu del mundu rural asturianu, esti trabayu féxose en comuña durante sieglos.

Vecinos y familiares xuntábense y facíen grandes montones de panoyes, frente a los que se sentaben yá los Esfoyadores a esfoyar. Estos quitaben le fueyes a les panoyes, menos a dos o tres, les más fuertes, que servíen pa que los enrestradores les enrestraren, fixeren con elles una riestra.

El local onde tenía llugar la esfoyaza había ser ampliu y espaciosu, pa ser a trabayar comodamente y la esfoyaza convertíase nuna celebración. Mozos y moces cuntaben cuentos, lleendes y tradiciones.

El trabayu nun quitaba pa que nun hubiera folixa y cantares...



Al comenzar la esfoyaza
nun me tiréis la panoya
que toi faciendo una riestra
y tengo les manes ataes

Al poco entamaben a cantar, facíase ruíu y l'ambiente que se creaba facía que los párrocos protestaren porque se xuntaren homes y muyeres y qu'hasta intervinieren les fuerces d'orden públicu...

El cantar de la panoya
ya nun se puede cantar
porque dicen qu'echa multa
el guardia municipal


Los mozos tiraben panoyes a les moces que-yos gustaben y tamién cantaben aquello de...
Una panoya tirete
y nun me ficisti casu
veras como tu te quedes
pa siempre pa vistir santos

o aquella otra de...
La panoya que m'unviasti
nun la quixi recibir
que mio madre yá nun quier
que cortexe a un mozu ruin

Anque yeren muncho más picardiosos los de los vaqueiros...

Alegrate vaqueirina
qu'esti añu hai bon maíz
tengo yo una panochona
barbada pula raíz

Cuando acababa'l trabayu los dueños de la casa na que se facía la esfoyza preparaben un convite especial; La Garulla. Tamién se celebraben dellos xuegos y deportes tradicionales ente tolos participantes.

Tovía se celebren esfoyaces. Anque más que por necesidá agrícola y económica ye pol enfotu en conservar una tradición qu'adaptada a los nuevos tiempos merez la pena siguir calteniendo.

Xurde Nel G. Morán