Turismu
Activu
Coles condiciones naturales d'Asturies, les posibilidáes de vivir
esperiencies al aire llibre son illimitáes. Cualquier fecha del
añu ye buena, ya qu'hai actividáes adaptaés a toles
estaciones.
Pa ello, esisten numeroses empreses que s'encarguen de canalizar les
inquietúes de los visitantes, garantizando en tou momentu la so
seguridá personal. Una escelente infraestructura hostelera da cobertura
a cuestiones como la gastronomía y el descansu. N'Asturies hay
más de 70 empreses de turismu activu qu'ufierten: montañismu,
piragüismu, caballos, mountain bike, 4x4, globu, parapente, barranquismu,
espeleoloxía, tiru al arcu, quad, hidrospeed, buceu, esquí, vela,
surf.., por citar los más conocíos.
Dalgunes d'estes empreses xestionen al mesmu tiempu los allugamientos
conocíos comu albergues, qu'en númeru superior a los 70 ufierten
aproximadamente 4.000 places. Los albergues tienen de capacidad entre 8 y 200
places en habitaciones dobles, triples, cuádruples y múltiples,
la mayoría con bañu na planta.
Asturies tá cubierta por una rede de pistes y senderos pa tolos gustos,
que permiten facer dende curtios paseos al atardecer hasta excursiones de
varios díes. Nes montañes y valles del interior, la escalada, el
trekking y les rutes cicloturistes ufiertense comu oportunidá deportiva
al visitante que busca emoción y aventura. Subir a bárbaros picos
o descolgase pelos cañones que'l agua escavó al so caprichu na
tierra, provoquen sensaciones máxiques. A pie, en bicicleta , a caballu
o en tou-terrén, faeremos inolvidables travesíes.
Tamién se puede volar coles propies ales o en globu sobre paraxes
inalgamables, zambullise nel vaciu y dominar d'un sólu golpe vista la
mar y la montaña. O pasear al costín d'un caballu pela playa o
pelos valles interiores. Y adientráse nes entrañes de la tierra
pa investigar lo inexplorao na oscuridá y descubrir llugares
encantáos.
El riesgu y la emoción son el denominador común a tolos deportes
d'aventura, ensin embargu, el riesgu nun ye en toos lo mesmo. El senderismu, el
barranquismu y el puenting, son por exemplu tres formes asemeyaes pero
diferientes de vivir l'aventura. Dende llueu, nun se puede dicir que'l
senderismu sea un deporte arriesgáu. Salvo delles escepciones, los
Senderos de Gran Recorríu nounentrañen nengún peligru ni
esixen una forma física d'altu nivel. Nel barranquismu el riesgu ye
más eleváu, anque coles debíes precauciones nun tien
porque resultar peligrosu. Nesti sí que necesites buena forma
física y conocer técniques específiques, comu'l descensu
con cuerdes, nadar, etc.
Hai que tener tamién los nervios bien templaos, p'afrontar les
situaciones límite que puedan presentase. El puenting, más qu'un
deporte, ye verdadera aventura; más que de músculos falamos de
valor y decisión, qu'hai que tenelos pa saltar al vaciu dende un puente
con una cuerda atada a la cintura. A pesar de lo espectacular, ye una de les
actividaes más segures que existen: el índice d'accidentes en
puenting ye cuasi nulu.
Anque nengún supera los 3.000 metros, los picos asturianos son un
desafíu pa los montañeros. Pero nun sólo falamos
d'ascensiones, la escalada ye ensin dulda el deporte d'aventura que más
tradición tien nesta tierra. Recordemos el míticu Urriellu,
tamién conocí comu'l Naranxu de Bulnes. Tamién la escalada
en xelu, que combina la escalada y l'esquí ye mui frecuente na zona los
Picos d'Europa. Pa rutes mistes, que concentren toles dificultáes
(cascaes, ramples, resaltes..) son clásiques les cares norte de
Peña Santa, Torre Sta. María de Enol y Penubina.
Y si nun quies baxar otra vegada, puedes facelo en parapente. El
paracaídes de pendiente pertenez a la familia del paracaídes y
l'ala delta y anque ye más reciente qu'estos, ta muncho más
estendíu. Metá mineru, metá escalador, el
espeleólogu intérnase nes entrañes de la tierra pa
escuchar el ruidu del silenciu, únicamente allumáu pol carburu
del so cascu.
Los terrenos calizos del oriente son un paraísu pa los amantes de les
cueves. La mountain bike designa no solu'n tipu de bicicleta sino tamién
un deporte. Estes bicicletes toú terrenu (BTT) difieren de les
tradicionales de paséu y permiten dir campu a través y subir y
baxar pendientes. Hai que dir bien preparáu, pero ye ún de los
más gratificantes
Los casi 375 kilometros de costa con más de 100 playes y los sos
caudalosos ríos convierten al Principaú d'Asturies nel escenariu
adecuáu pa los deportes náuticos y acuáticos. Un ampliu
abanicu d'empreses especializaes atienden al visitante y resuelven les
incidencies pa realizar cómodamente estes práctiques deportives.
La variedá de los fondos litorales inviten a la práctica del
submarinismu.
Descubrir puertos marineros o contemplar los Picos d'Europa dende alta mar,
adentrase nes ríes o baxar calces son algunes de les
posibilidáes. L'aventura de navegar polos ríos d'agues braves
nació comu necesidá p'acceder a nuevos sitios, conquistar
territorios inesploraos o tresportar mercancies. Ensin embargu agora hai varios
deportes que tienen por común el descensu de ríos rápidos
y caudalosos en embarcaciones que la corriente arrastra mientres los navegantes
intenten controlar el cursu y la dirección.
El piragüismu incluye dos modalidáes: el kayak (la
embarcación desplázase con una pala de doble fueya) y la canoa
(piragua que que se manexa con una pala d'una sola fueya). El rafting ye una
modalidá d'agues braves que consiste'en descender un ríu en un
bote neumáticu cola ayuda de remos. El hidrobob practicase nun bote con
forma de proyectil sobre el que se desciende sentáu, y non dientru. El
deportista recibe directamente l'agua y la espuma sin que nada y faiga de
parapetu.
Y pa los que busquen emociones fuertes tá'l hidrospeed. Nesti deporte,
navegase sobre una plancha col cuerpu prácticamente dientru l'agua. Les
emociones tan garantizáes. Y tamien pa los amantes del agua, pero de la
mar, los deportes estrella son el surf, el windsurf y el funboard. El surf
básicamente trata de regresar de mar adientru cabalgando sobre les oles
(surf-riding), utilizando l'impulsu creáu pola su propia pendiente y
ayudáos por una plancha. El surf a vela o windsurf combina elementos de
la navegación y permite la mesma. Cuando se fae surf de ola pero con
vela, llámase funboard.
Y nun podemos olvidanos del vehículu más ecolóxicu y
económicu qu'esiste, la bicicleta. Dentro del cicloturismu, qu'asi se
llama al ciclismu non competitivu, podemos distinguir dos tipos: los
ciclodeportistes, que suelen tar organizáos en clubes, entrenáos,
y que recorren kilómetros per carretera o ascienden a puertos
míticos, y los cicloturistes d'alforxes, que son los qu'usen la
bicicleta pa viaxar y conocer mundu. Anque se trate d'actividés
distintes toes tienen un denominador común: que se realicen al aire
llibre. D'alguna manera, el amor a la naturaleza ta presente nellos y delles
vegáes mezclénse toles técniques. Pa toos ellos ye
necesariu tener un migayín d'orientación. Hai que saber
interpretar los mapas, escoyer la escala adecuada, calcular les distancies y,
polo menos, manexar la brúxula. Y atentos a los partes, qu'el tiempu,
tanto nos picos comu na mar, ye mui cambiante.
Una alvertencia pa cualquier deporte: poneivos en manes de profesionales, que
los hai pa toles actividaes. Nun solo diréis más seguros sinon
que llevaránvos a los meyores sitios y col equipu necesariu pa cada
casu. Y, por favor, intentái que'l vuestru pasu se note lo menos
posible. Recordái qu'a Adán y Eva nun los echaron del
Paraísu por comer la mazana sinon por tirar la gaspia al suelu.
Pilar Sánchez Vicente
|
