L'Antroxu
Fae munchos sieglos que Don Carnal pasó a tar presente nel calendariu
festivu de los pueblos, y, dende llueu, tuvo siempre mayor ésitu popular
que la so inmediata sucesora, Doña Cuaresma, la austera.
La práctica de faer mazcaraes en Febreru ta espardía pel
Occidente cuantayá más de 2.000 años, pudiendo dicise que
los primeros fueron los griegos, que celebraben nesti mes les Antesteries,
n'honor a Dioniso.
El carnaval n'Asturies, recibe'l nome d'Antroxu, coles variantes de antroido,
antroiro, antroyu, antrueyu o entrogio, toes elles col sinificáu de
entrada, procedente del latin introitus, por pasar darréu a la Cuaresma,
Semana Santa y Pascua.
Pa saber cuando cae l'Antroxu, lo meyor ye la cuenta la vieya.
Localizáounel calendariu'l Domingu de Pascua, que cierra la Semana
Santa, contamos 7 semanes atrás. Na cabera afinca el miércoles de
Ceniza que anicia la Cuaresma, y que ta precedíu del "sábadu
frixueleru, domingu lardeiru, llunes gordu y martes d'Antroxu".
Y ye que a l'ayunu y l'astinencia cuaresmales val más llegar bien
fartucos. L'Antroxu sacaba la tripa del mal añu y estremábase
pelos arreventones na comida y na bebida.
La cocina d'estes feches tien comu pegollu o platu principal el gochu en toles
sos variantes: sopa de fégadu, picadiyu, butiellu o botiechu,
morcón, pote d'antroxu, rapón, borona o bollos preñaos,
etc. El postre tradicional son los frixuelos o fayueles y les picatostes o
rustidos, bollines y buñuelos de vientu.
Pero les celebraciones aniciaben antes. N'Asturies yera costumbre muy
xeneralizada que los Compadres xuntarense el penúltimu xueves y les
comadres l'últimu enantes de Cuaresma. Lo de los paisanos, que se
celebraba con muncha folixa y batoriciu nel pasáu, fae ya 100
años que se perdió del too, pero les muyeres siguieron
celebrándolo .
Güei 'l xueves de Comadres sigue siendu fiesta perimportante na Pola Siero
(conservase'l recorríu y la celebración, pero sin el
sentiú tradicional) y en Xixón onde perduró la costume de
reunise les muyeres, sobre too poles cigarreres y les pescaderes, y onde cada
vegada se mueven más d'espicha, a cenar el menú d'Antroxu o de
discoteca, que la última moda nesti día son los emporricamientos
masculinos, fechos por rapazos profesionales d'ello.
Los disfraces o mázcares son lo más señero del Antroxu.
Nel principiu, tiznabase la cara de negro con un corchu untáu en ciescu
o faciénse dos furacos nun cartón, trapu o madera, a guisa
caretu. Les mázcares tradicionales yeren d'animal , con peyellos d'oveya
o tiestes d'osu o mula y teles pal cuerpu. Lo más estendío yeren
los zarrapastros, probones o antroxos, que yeren del xéneru de los
guirrias y zamarrones que víamos pel Aguinaldu, y que carreten
tamién cencerros, tosquiles,y fardeles...La inversion de valores ye
santu y seña del Antroxu y por eso una de les práctiques
más estendies yera la de cambiase de home pa muyer y de muyer pa home.
Ún de los personaxes más frecuentes yera'l de la Destrozona.
Tamíen yeren típicos los vieyos gurrumbos, los barberos,
mélicos, cures, militares, etc.
Na actualidá amás de les mázcares individuales, y los
neños mazcaraos de lo que Walt Disney ponga de moda esi añu
abunden tamién los grupos d'indios, pirates, bruxes, payasos, cariocas,
animales, con abundante presencia de elementos animaos.. .La
escenografía algama a monumentos, edificios, coches , cases y calles,
sobre too n'Avilés, Xixón y Mieres .
L'Antroxu arranca la mazcara cotidiana de la xente y descubre'l rostru de los
suaños. El visitante qu'arribe a cualquier puntu de la xeografía
asturiana en febreru puede tar seguru de qu'algamó bon puertu y que
retornará, si nun decide quedar, col embruxu la folixa nos güeyos.
Los peleles, que yeren figures humanes de paya o trapu, manteabense,
insultabense, apaleabense y acababen quemaos, tiraos al mar o enterraos. Nel
papel de chivu espiatoriu alcontrábamonos delles vegaes gallos o gatos,
col mesmu destín quel pelele. A partir del sieglu XIX xeneralizase'l
Entierru la Sardina, que ye'l que güei s'estila.
Pero el mayor bulliciu del Antroxu faíenlu les comparses, que yeren
procesiones de xente mazcarao, que recorrén les calles cantando,
baillando y faciendo bromes pesaes y burles a toul que se cruzara. Los
estrumentos musicales preferíos yeren lates, sartenes, cencerros,
cuernos, pitos y turullos.
Pa Caro Baroja, la "carnálitas" opuesta a la
"spiritualitas", implica tamién faer actos irracionales,
locos, invertir l'orden de les coses, faer de la confusión un
estáu d'alegría. Un estáu nel que ta too permitío ,
especialmente l'humor, la ironía, la sátira. Les coples ocupen un
papel relevante na folixa: canténse y cuéntense les
interioridades de la vida privada y ponense a caer de un burru los personaxes
públicos, denunciase, lamentase, criticase,...
L'Antroxu tuviera prohibíu munchu tiempu por dures ordenances y
reglamentaciones. Asturies recuperólu colos ayuntamientos
democráticos nos años 80. La so importancia queda reflexada en
que munches villes cambiaren nel calendariu la fiesta llocal por esta folixa.
Nun somos Ríu, pero reímonos muncho.
Pilar Sánchez Vicente
|
