La Senda Verde los Valles del Trubia

La Senda Verde los Valles del Trubia ye ún de los exemplos más ñidios de recuperación del Patrimoniu Hestóricu Industrial, pa la so utilización como recursu económicu del presente.

La Senda Verde ta fecha sobre la caxa la vía l’antigu ferrocarril mineru q’unía los nucleos minero-industriales de Santa Marina (Quirós) y Entragu (Teberga) con Trubia (Uvieu). Los ramales de Quirós y Teberga confluyen en Caranga D’Abaxu (Proaza).Tien una llongura de 40.300 KM. y forma de Y invertida. La anchura media’l trazáu varía entre 2,50 y 3,00 metros.

Cuando falamos de ferrocarril mineru, distínguense dos tipos: los de serviciu xeneral y los d’usu particular. Dientro los primeros, de calter públicu, considérase ferrocarril mineru a tou aquel que tien como razón de ser el tráficu mineru, aunque tamién tresporten mercancíes xenerales y inclusu viaxeros. El material y l’anchu métricu de la vía ye la mesma que la de cualquier otru, pero adaptao pal tránsitu de les mines y les factoríes. La xestión faenla empreses autónomes. N’Asturies incluyímos nesti grupu al FC de Llangreu, los ramales del FC del Norte a Santana y Villabona, el Carreño y el Vasco-Asturianu, ente otros.

Ensin embargu, el términu ferrocarril mineru emplégase, normalmente, pa les lliníes de serviciu particular, propiedá de les empreses mineres, que les usen n’exclusiva pal tráficu de mineral, materiales y persones relacionáu cola explotación minera o industrial. Dientru d'estos cabe distinguir llínies de interior y bocamina, llínies d’esterior y apeaeros. L’anchu la vía suel ser inferior al metru. Güei, al contrariu que nel interior la mina, la rede de ferrocarriles mineros d’esterior, desapareció dafechu, sustituída per camiones y cintes transportaores. Ensin embargu, durante’l sieglu XIX, la zona central d’Asturies conoció la rede de ferrocarriles mineros e industriales más tupida y heteroxénea d’España. Les dos redes más importantes foron les que teníen les dos principales siderurxes asturianes hasta que se montó Ensidesa: Fábrica de Mieres y Duro Felguera.

Pero cásique toes les empreses dde dalguna importancia emplegaben unu pal serviciu les sos explotaciones, y, aparte, existién, comu ya diximos, numberosos ramales de les compañíes ferroviaries públiques.

Los tipos y anchos de vía foron muy estremaos, igual que les máquines. Inicialmente tóos los trenes mineros yeren arrastraos por caballeríes o pelos propios mineros.

Ye en 1879 cuando, per primera vez n'España una llínia de tipu mineru ( La Nicolasa de Fabrica Mieres) emplega una locomotora de vapor, que llueu seríen muy numeroses na rexón y famoses pola variedá los sos oríxenes: habíales belgues, alemanes, ingleses, franceses, americanes y españoles. Tamíen seríen dellos ferrocarriles asturianos (Duro Felguera y Hulleres de Veguín) los primeros del país en ser ellectrificaos.

Otru aspeutu que caracterizó a los ferrocarriles mineros asturianos, ésti debíu a la fuerte orografía, fue la abundante presencia de planos inclinaos, en tramos de mucha pendiente, pelos que subíen y baxaben les vagonetes suxetes per cables. La llínia de Trubia a Quirós yera de la compañía "Mines y Fundiciones de Santander y Quirós" y fue inaugurada en 1884, a la par que’l Payares. A primeros d'esti sieglu allóngóse con un ramal a Teberga.

Estes dos llínies recorríen un trazáu de gran espectacularidá, más de 40. km., con fuertes pendientes y numerosos túneles llabraos en roca viva, nos pasos cazalbos de Peñes Xuntes (Caranga) y nos accesos a Teberga.

Yera’l ferrocarril mineru más llargu de los asturianos, y el más antigua d’anchu de vía de 750 mm. n’España. Tuvon en funcionamientu 80 años y cerróse definitivamente’n 1964.

Agora, ye l'osu la locomotora que arrastra el tren del turismu nos valles del Trubia. Unes 4.000 personas recorren por ociu los fines de semana’l caminu que fixeren les vagonetes y los mineros durante casi un sieglu.

Finada la producción minera, esta ruta taatalantada comu un nuevu espaciu, equipamientu y serviciu comunitariu con implicaciones y usos turísticos, deportivos, culturales, medioambientales y recreativos que potenciarán, sin duda, el desarrollu socioeconómicu desta Comarca.

Pilar Sánchez Vicente